Visit:
హైదరాబాద్‌, ఫిబ్రవరి24 (నమస్తే తెలంగాణ): కాళేశ్వరం ప్రాజెక్టులో భాగమైన మేడిగడ్డ, అన్నారం, సుందిళ్ల బరాజ్‌లపై జస్టిస్‌ ఘోష్‌ కమిషన్‌ విచారణను 27 నుంచి పున:ప్రారంభించనున్నది. ఇప్పటికే ప్రాజెక్టు నిర్మాణంలో భాగస్వాములైన ఇంజినీర్లు, సీసీ డిజైన్లు, ఓఅండ్‌ఎం ఇంజినీర్లు, నిర్మాణ ఏజెన్సీ ప్రతినిధులు సమర్పించిన అఫిడవిట్లపై బహిరంగ విచారణ పూర్తిచేసింది. క్షేత్రస్థాయిలో పనిచేసిన ఇంజినీర్లు, ఇరిగేషన్‌శాఖకు సంబంధించి పూర్వ, ప్రస్తుత సెక్రటరీలు, కమిషన్‌ ఎదుట అఫిడవిట్లు దాఖలు చేసిన రిటైర్డ్‌ ఇంజినీర్లు, స్వచ్ఛంద సంస్థలు, ఎన్జీవోలను సైతం విచారించింది. విచారణ తుది దశకు చేరగా, మరోసారి 27 నుంచి ఇంజినీర్లు, సీడీవో విశ్రాంత సీఈ నరేందర్‌రెడ్డి, కాళేశ్వరం కార్పొరేషన్‌ ఎండీ హరిరాం తదితరులను విచారణకు హాజరుకావాలని నోటీసులు జారీ చేసింది. ప్రభుత్వం కమిషన్‌ గడువును ఇటీవలనే 2 నెలలకు పొడిగించింది.
నరేందర్‌రెడ్డికి సీపీఎస్‌ఈయూ మద్దతు
హైదరాబాద్‌, ఫిబ్రవరి 24 (నమస్తే తెలంగాణ) : కరీంనగర్‌ పట్టభద్రుల ఎమ్మెల్సీ ఎన్నికల్లో పోటీచేస్తున్న వీ నరేందర్‌రెడ్డి(ఆల్పోర్స్‌)కు సీపీఎస్‌ఈయూ మద్దతు తెలిపింది. అసోసియేషన్‌ రాష్ట్ర అధ్యక్షుడు స్థిత్రప్రజ్ఞ, ప్రధాన కార్యదర్శి కల్వల్‌ శ్రీకాంత్‌ సోమవారం మంత్రి డీ శ్రీధర్‌బాబును కలిసి మద్దతులేఖను అందజేశారు.నర్సిరెడ్డి, అశోక్‌కుమార్‌ను గెలిపించండి టీచర్‌ ఎమ్మెల్సీ అభ్యర్థులుగా పోటీచేస్తున్న నర్సిరెడ్డి, అశోక్‌కుమార్‌ను గెలిపించాలని అధ్యాపక, ఉపాధ్యాయ సంఘాలు ప్రకటన లో కోరాయి. టీఎస్‌ యూటీఎఫ్‌, టీపీటీఎఫ్‌, టీజీజేఎల్‌ఏ, గురుకుల జేఏసీ నేతలు చావ రవి, వెంకట్‌, అనిల్‌కుమార్‌, తిరుపతి, సురేశ్‌ సంయుక్త ప్రకటన విడుదల చేశారు.
