బమ్మెరలో బౌద్ధ ఆనవాళ్లు

మహా భాగవత గ్రంథకర్త బమ్మెర పోతనామాత్యుడు పుట్టిన ఊరు బమ్మెరలో శిలాయుగ సంస్కృతితోపాటు బౌద్ధ, జైన చారిత్రక ఆధారాలు ఉన్నట్టు చరిత్ర పరిశోధకుడు రెడ్డి రత్నాకర్‌రెడ్డి తెలిపారు.

• చరిత్ర పరిశోధకుడు రత్నాకర్‌ రెడ్డి వెల్లడి

పాలకుర్తి రూరల్‌, ఏప్రిల్‌ 7: మహా భాగవత గ్రంథకర్త బమ్మెర పోతనామాత్యుడు పుట్టిన ఊరు బమ్మెరలో శిలాయుగ సంస్కృతితోపాటు బౌద్ధ, జైన చారిత్రక ఆధారాలు ఉన్నట్టు చరిత్ర పరిశోధకుడు రెడ్డి రత్నాకర్‌రెడ్డి తెలిపారు. ఇక్కడ ఐదు వేల ఏండ్ల కిం దట ఆది మానవులు జీవించినట్టు తెలుస్తున్నది. ఆ కాలంలో దంచేందుకు, నూరేందుకు ఉపయోగించిన రాతి పనిముట్లు ఇక్కడ లభించాయి. ఇక్కడ శాతవాహనుల కాలం నాటి బౌద్ధ ఆయక స్తంభం శకలాలు ఉన్నట్టు గతంలోనే ప్రసిద్ధ చరిత్ర పరిశోధకుడు ఈమని శివనాగిరెడ్డి ధ్రువీకరించారు.

బమ్మెర సమీప గ్రామం గూడూరులో బౌద్ధ స్తూపం ఉన్నట్టు కూడా తెలిపారు. బమ్మెర శివాలయం చాళుక్యుల కాలం నాటిదని తెలుస్తున్నది. చెరువు మత్తడి పరుపు బండపై బలపం రాయితో చేసిన భైరవి శిల్పం దిగంబరంగా ఉన్నది. పోతన స్మారక మందిరాన్ని ఆనుకొని ప్రాచీన వైష్ణవ ఆలయం ఉన్నట్టు తెలుస్తుండగా ఈ ఆలయానికి అడుగుల ఎత్తయిన ద్వారం ఉన్నది. లలాటబింబంగా తిరునామం, సీతారామచంద్రుల పాదాల బండ, ద్వారం ముందు ఆళ్వార్‌ విగ్రహం ఉన్నదని రెడ్డి రత్నాకర్‌రెడ్డి వెల్లడించారు.