Visit:
Telangana | హైదరాబాద్‌, మే 29 (నమస్తే తెలంగాణ) : తెలంగాణలో కొత్తగా ఐదు బీర్ల సప్లయ్‌ కంపెనీలు అడుగుపెడుతున్నాయి. ఈ మేరకు తెలంగాణ రాష్ట్ర బేవరేజెస్‌ కార్పొరేషన్‌ ఈ ఏడాది ఆయా కంపెనీలకు అనుమతులు ఇచ్చింది. దీంతో ఈ ఐదు కంపెనీలు కలిపి.. సుమారు 27 రకాల బీర్లను తెలంగాణలో ప్రవేశపెట్టనున్నాయి. వీటిలో ఎక్కువగా క్రాఫ్ట్‌ బీర్లే ఉండటం గమనార్హం. తెలంగాణ బేవరేజ్‌ కార్పొరేషన్‌ కొత్తగా అనుమతులు ఇచ్చిన వాటిల్లో లీలాసన్స్‌ ఆల్కా బేవ్‌ ప్రై. లి, ఎక్సోటికా లిక్కర్‌ ప్రై. లి, టాయిట్‌ బ్రేవరీస్‌ ప్రై. లి, మౌంట్‌ ఎవరెస్ట్‌ లి., సోం డిస్టిలరీస్‌ అండ్‌ బేవరేజెస్‌ ఉన్నాయి. ఎక్సైజ్‌శాఖ అనుమతులు ఇచ్చిన కంపెనీల్లో ఒకటైన ‘లీలాసన్స్‌ ఆల్కా బెవ్‌’ సంగారెడ్డి జిల్లాలోని మల్లేపల్లిలో బీర్లను తయారు చేస్తున్నది. ఇదే కంపెనీ ఏపీలో ‘ట్రెడిషనల్‌ ఎక్స్‌లెన్స్‌ ఇన్‌ క్వాలిటీ’ అనే కంపెనీ పేరుతో బీర్లు అమ్మకాలు కొనసాగిస్తున్నది. అలాగే చెన్నైలో ‘సెయింట్‌ పాట్రిక్స్‌’ పేరుతో మద్యం బీర్లు తయారు చేస్తున్నది. దీని రిజిస్టర్‌ స్టేట్‌ మాత్రం మధ్యప్రదేశ్‌. ‘అమెరికన్‌ బ్రూవ్‌ క్రాఫ్ట్‌ లిమిటెడ్‌ (ప్రై)’తో ఇది టైఅప్‌ అయినట్లుగా సమాచారం.
‘బ్లాక్‌ బస్టర్‌’ పేరుతో నాలుగు ఫ్లేవర్లలో బీర్లను ఈ సంస్థ తయారు చేస్తున్నది. కాగా తెలంగాణలో మాత్రం రెండు బ్రాండ్లను మాత్రమే అందుబాటులోకి తీసుకొస్తామని పేర్కొన్నది. అలాగే ఎక్సోటికా లిక్కర్‌ ప్రై. లి. కంపెనీ కూడా సంగారెడ్డి జిల్లా మల్లేపల్లిలో బీర్లను తయారు చేస్తున్నట్లు దరఖాస్తు చేసుంది. అయితే.. రాష్ట్రంలో ఉన్న బీర్ల కొరతను తగ్గించేందుకు కొత్తగా దరఖాస్తు చేసుకున్న సంస్థలకు అనుమతులు ఇచ్చామని రాష్ట్ర ఎక్సైజ్‌శాఖ పేర్కొన్నది.
