హైదరాబాద్‌ సీపీ సజ్జనార్‌ ఔట్‌.. ఫైర్‌ సర్వీసెస్‌ డీజీగా సజ్జనార్‌కు పోస్టింగ్‌
హైదరాబాద్‌ నగర పోలీసు కమిషనర్‌గా ఉన్న వీసీ సజ్జనార్‌కు ప్రభుత్వం ఉద్వాసన పలికింది. ఆయనను సీపీ పోస్టు నుంచి బదిలీ చేస్తూ.. నూతన కొత్వాల్‌గా మహేశ్‌ ఎం భగవత్‌కు ఆ బాధ్యతలు అప్పగించింది.
- హైదరాబాద్‌ సీపీగా మహేశ్‌ భగవత్‌
- జైళ్ల శాఖ డీజీగా స్వాతి లక్రాకు బాధ్యతలు
- ఏసీబీ డీజీగా చారుసిన్హా నియామకం
- మహిళా భద్రత డీజీగా సౌమ్యా మిశ్రా
- ఆర్టీసీ ఎండీగా అనిల్‌కుమార్‌కు బాధ్యతలు
- పౌర సరఫరాల శాఖ కమిషనర్‌గా నాగిరెడ్డి
- లా అండ్‌ ఆర్డర్‌ డీజీగా అకున్‌ సభర్వాల్‌
- టీజీమార్స్‌కు తొలిడైరెక్టర్‌గా స్టీఫెన్‌ రవీంద్ర
హైదరాబాద్‌, నవంబర్‌ 12 (నమస్తే తెలంగాణ) : హైదరాబాద్‌ నగర పోలీసు కమిషనర్‌గా ఉన్న వీసీ సజ్జనార్‌కు ప్రభుత్వం ఉద్వాసన పలికింది. ఆయనను సీపీ పోస్టు నుంచి బదిలీ చేస్తూ.. నూతన కొత్వాల్‌గా మహేశ్‌ ఎం భగవత్‌కు ఆ బాధ్యతలు అప్పగించింది. దీంతోపాటు ఇప్పటివరకూ లా అండ్‌ ఆర్డర్‌ బాధ్యతలు నిర్వర్తించిన మహేశ్‌ భగవత్‌ స్థానంలో వెయిటింగ్‌లో ఉన్న ఏడీజీ అకుల్‌ సభర్వాల్‌ను శాంతిభద్రతల డీజీగా నియమించింది. వీరితోపాటు 21 మంది ఐపీఎస్‌ అధికారులకు బదిలీలు, నూతన పోస్టింగ్‌లు ఇస్తూ, అదనపు బాధ్యతలు అప్పగిస్తూ.. ప్రభుత్వ ప్రధాన కార్యదర్శి సంజయ్‌ జాజు గురువారం ఉత్తర్వులు జారీ చేశారు. పోలీస్‌ శాఖలోని కీలక విభాగాలతోపాటు జైళ్లు, అవినీతి నిరోధక శాఖ (ఏసీబీ), మహిళా భద్రత, గ్రేహౌండ్స్‌, ఆక్టోపస్‌, ట్రాఫిక్‌, రోడ్డు భద్రత, సివిల్‌ సైప్లె తదితర విభాగాల్లో భారీగా మార్పులు చేపట్టింది.
ఈ బదిలీల్లో హైదరాబాద్‌ నగర పోలీస్‌ కమిషనర్‌గా మహేశ్‌ మురళీధర్‌ భగవత్‌ను నియమించడం కీలక పరిణామం. ఇప్పటివరకూ హైదరాబాద్‌ సీపీగా పనిచేసిన వీసీ సజ్జనార్‌ను తెలంగాణ ఫైర్‌, డిజాస్టర్‌ రెస్పాన్స్‌, ఎమర్జెన్సీ అండ్‌ సివిల్‌ డిఫెన్స్‌ విభాగం డీజీగా బదిలీ చేశారు. జైళ్ల శాఖ డీజీగా పనిచేస్తున్న డాక్టర్‌ సౌమ్య మిశ్రాను మహిళా భద్రత, షీటీమ్స్‌, భరోసా విభాగం డీజీగా నియమించారు. హోంగార్డ్స్‌, ఎస్‌పీఎఫ్‌ డీజీగా ఉన్న స్వాతిలక్రాకు జైళ్ల శాఖ బాధ్యతలు అప్పగించారు. ఏసీబీ డీజీగా చారుసిన్హాను పూర్తిస్థాయిలో నియమించారు. తెలంగాణ రాష్ట్ర రోడ్డు రవాణా సంస్థ (టీజీఎస్‌ఆర్టీసీ) ఎండీగా డాక్టర్‌ అనిల్‌కుమార్‌ను నియమించారు. సివిల్‌ సైప్లెకి నూతన కమిషనర్‌గా వై నాగిరెడ్డికి బాధ్యతలు అప్పగించారు. గ్రేహౌండ్స్‌, ఆక్టోపస్‌ ఆపరేషన్స్‌ విభాగం డీజీగా విక్రమ్‌సింగ్‌మాన్‌కు బాధ్యతలు అప్పగించారు. లా అండ్‌ ఆర్డర్‌, ఇంటెలిజెన్స్‌, మల్టీజోన్లు, రైల్వే పోలీస్‌, రోడ్డు భద్రతా విభాగాల్లోనూ కీలక మార్పులు చోటుచేసుకున్నాయి.
టీజీ మార్స్‌కు మొదటి డైరెక్టర్‌గా స్టీఫెన్‌ రవీంద్ర
ఈ బదిలీల్లో తెలంగాణ ట్రాఫిక్‌ మేనేజ్‌మెంట్‌, రోడ్‌ అండ్‌ రైల్‌ సేఫ్టీ బ్యూరో (టీజీ-టీఎంఏఆర్‌ఎస్‌)కు ప్రత్యేక ప్రాధాన్యత కల్పించారు. దీనికి మొదటి డైరెక్టర్‌గా ఎం స్టీఫెన్వ్రీంద్రను ప్రభుత్వం నియమించింది. ఐజీ కే రమేశ్‌నాయుడును రైల్వేస్‌ ఐజీగా, డీ జోయల్‌ డేవిస్‌ను జాయింట్‌ డైరెక్టర్‌ (రోడ్‌ సేఫ్టీ), జాయింట్‌ డైరెక్టర్‌ (ట్రాఫిక్‌)గా నియమించారు. శ్రీబాలాదేవికి డిప్యూటీ డైరెక్టర్‌ (అడ్మిన్‌)గా బాధ్యతలు అప్పగించారు. దీంతో ట్రాఫిక్‌ నియంత్రణ, రైల్వే భద్రత, రోడ్డు ప్రమాదాల నివారణకు సంబంధించిన విభాగాల్లో ప్రత్యేక వ్యవస్థను బలోపేతం చేసే దిశగా ప్రభుత్వం చర్యలు చేపట్టినట్టు కనిపిస్తున్నది.
ఈ బదిలీల్లో కొత్త పోస్టింగులతోపాటు పలు కీలక విభాగాల బాధ్యతలను అదనంగా అప్పగించడం గమనార్హం. సౌమ్య మిశ్రాకు ఆర్గనైజేషన్‌, లీగల్‌ విభాగాలు, స్వాతి లక్రాకు హోంగార్డ్స్‌ విభాగం, చారుసిన్హాకు సీఐడీ, వీసీ సజ్జనార్‌కు ఎస్‌పీఎఫ్‌, విక్రమ్‌సింగ్‌మాన్‌కు పోలీస్‌ హౌసింగ్‌ కార్పొరేషన్‌ బాధ్యతలు అప్పగించారు. అకున్‌ సభర్వాల్‌కు కోఆర్డినేషన్‌, టెక్నికల్‌ సర్వీసెస్‌, కార్తికేయకు ఐసీసీసీ, చందన దీప్తికి జోగుళాంబ జోన్‌, భాసరన్‌కు ఇంటెలిజెన్స్‌, నారాయణనాయక్‌కు బాసర జోన్‌, ఎల్‌ఎస్‌చౌహాన్‌కు చార్మినార్‌ జోన్‌ బాధ్యతలు అదనంగా కేటాయించారు.
Read Today's Latest Telangana News in Telugu and Telugu News
- Follow Us :
-
