జైలు నుంచి పరారైన రిమాండ్‌ ఖైదీ ఆత్మహత్య

పోక్సో కేసులో నిందితుడిగా ఉంటూ హైదరాబాద్‌లోని చంచల్‌గూడ జైలు నుంచి రెండ్రోజుల కిందట పారిపోయిన వనపర్తి జిల్లా ఆత్మకూరు మండలం నందిమల్లకు చెందిన కిశోర్‌కుమార్‌రెడ్డి బుధవారం ఉరేసుకొని ఆత్మహత్యకు పాల్పడ్డాడు. చిన్ననాటి నుంచి కబడ్డీలో ప్రావీణ్యం కనబరిచిన కిశోర్‌ జూన్‌లో గ్రామానికి చెందిన యువతిని ప్రేమ వివాహం చేసుకోగా ఆమె కుటుంబ సభ్యులు అమరచింత ఠాణాలో ఫిర్యాదు చేశారు.

అమరచింత, సెప్టెంబర్‌ 23 : పోక్సో కేసులో నిందితుడిగా ఉంటూ హైదరాబాద్‌లోని చంచల్‌గూడ జైలు నుంచి రెండ్రోజుల కిందట పారిపోయిన వనపర్తి జిల్లా ఆత్మకూరు మండలం నందిమల్లకు చెందిన కిశోర్‌కుమార్‌రెడ్డి బుధవారం ఉరేసుకొని ఆత్మహత్యకు పాల్పడ్డాడు. చిన్ననాటి నుంచి కబడ్డీలో ప్రావీణ్యం కనబరిచిన కిశోర్‌ జూన్‌లో గ్రామానికి చెందిన యువతిని ప్రేమ వివాహం చేసుకోగా ఆమె కుటుంబ సభ్యులు అమరచింత ఠాణాలో ఫిర్యాదు చేశారు.

బాలిక మైనర్‌ కావడంతో అతడిపై పోలీసులు పోక్సో కేసు నమోదు చేసి మహబూబ్‌నగర్‌ జిల్లా జైలులో ఉంచగా అప్పట్లో గోడ దూకి పారిపోయాడు. రెండ్రోజుల తర్వాత గ్రామానికి చేరుకున్న కిశోర్‌ను అమరచింత పోలీసులు అరెస్టు చేసే క్రమంలో ఆత్మహత్యకు యత్నించగా ప్రభుత్వ దవాఖానలో చికిత్స అందించారు. అనంతరం చంచల్‌గూడ జైలుకు రిమాండ్‌ ఖైదీగా తరలించారు.

సోమవారం అక్కడి నుంచి కూడా పారిపోవడంతో సవాల్‌గా తీసుకున్న పోలీసులు నందిమల్ల గ్రామంలో పెద్ద ఎత్తున మోహరించారు. విషయం తెలుసుకొని గ్రామానికి చేరుకునే క్రమంలో భయంతో సమీపంలోని చెట్టుకు ఉరేసుకొని ఆత్మహత్యకు యత్నించాడు. గమనించిన గ్రామస్తులు పోలీసుల సాయంతో ఆత్మకూర్‌ ప్రభుత్వ దవాఖానకు తరలించగా.. అప్పటికే మృతి చెందినట్టు వైద్యులు తెలిపారు.