చిన్నగా.. చిత్రంగా! మినిమలిస్ట్‌

అంతెత్తు కొండలు.. ఇంతింతే కనిపిస్తాయి. మహావృక్షాలు కూడా.. మరుగుజ్జుల్లా మారిపోతాయి. ఏనుగులేమో.. ఎలుకల్లా; పులులేమో.. పిల్లుల్లా అనిపిస్తాయి.అదంతా మినిమలిస్ట్‌ ఫొటోగ్రఫీ మాయాజాలం. ఫ్రేమ్‌ మొత్తాన్నీ నెగెటివ్‌ (ఖాళీ) స్పేస్‌తో నింపేసి.. ప్రధాన సబ్జెక్ట్‌ను చిన్నగా ఏ మూలకో నెట్టేయడమే మినిమలిస్ట్‌ ఫొటోగ్రఫీ. ఇదో ప్రత్యేకమైన ఫొటోగ్రఫీ శైలి.

అంతెత్తు కొండలు.. ఇంతింతే కనిపిస్తాయి. మహావృక్షాలు కూడా.. మరుగుజ్జుల్లా మారిపోతాయి. ఏనుగులేమో.. ఎలుకల్లా; పులులేమో.. పిల్లుల్లా అనిపిస్తాయి.అదంతా మినిమలిస్ట్‌ ఫొటోగ్రఫీ మాయాజాలం. ఫ్రేమ్‌ మొత్తాన్నీ నెగెటివ్‌ (ఖాళీ) స్పేస్‌తో నింపేసి.. ప్రధాన సబ్జెక్ట్‌ను చిన్నగా ఏ మూలకో నెట్టేయడమే మినిమలిస్ట్‌ ఫొటోగ్రఫీ. ఇదో ప్రత్యేకమైన ఫొటోగ్రఫీ శైలి.

ఫొటోగ్రఫీ ఓ ప్రత్యేకమైన శైలి. ఇందులో మామూలు సబ్జెక్ట్‌ను కూడా మినిమలిస్టిక్‌ (చిన్న)గా మార్చేసి.. అద్భుతమైన కళాఖండంగా చూపిస్తుంది. పొలం గట్టుపైన ఒంటరి చెట్టు, నీలాకాశంలో ఎగిరే పక్షి, సరస్సులో తేలియాడే పడవ, మంచు దుప్పట్లో తిరిగే దున్న, నది ఒడ్డున ఒంటరి భవనం.. ఇవే ఈ ఫొటోగ్రఫీలో కాన్వాసులు. ఇలాంటి చోట అధిక నెగెటివ్‌ స్పేస్‌ దొరుకుతుంది. సబ్జెక్ట్‌ను చిన్నగా చూపిస్తూ.. ఫొటోలను అద్భుతంగా మలిచే అవకాశం కలుగుతుంది. ఫ్రేమ్‌లో చాలా తక్కువ విషయాలు ఉంటాయి. కాబట్టి, ప్రధాన సబ్జెక్ట్‌ను చిన్నగా చూపించినా.. వీక్షకుల దృష్టిమొత్తం దానిమీదే పడుతుంది. అయితే, కొన్ని అంశాలపై పట్టుసాధిస్తే.. మినిమలిస్ట్‌ ఫొటోగ్రఫీలో ఆరితేరొచ్చు. స్మార్ట్‌ఫోన్‌తోనే.. అద్భుతమైన ఫొటోలు తీసుకోవచ్చు.

కెమెరా సెట్టింగ్స్‌

• మినిమలిస్ట్‌ ఫొటోలు తీయాలంటే.. కెమెరాలో కొన్ని ముఖ్యమైన సెట్టింగ్స్‌ చేసుకోవాలి.
• ప్రొ/ మాన్యువల్‌ మోడ్‌ : ఫొటోగ్రఫీని పూర్తిగా నియంత్రించడానికి ప్రొ/ మాన్యువల్‌ మోడ్‌ను ఎంచుకోండి. అప్పడే.. ఐఎస్‌ఓ, అపార్చర్‌, షట్టర్‌ స్పీడ్‌ను సర్దుబాటు చేయడానికి వీలవుతుంది.
• హెచ్‌డీఆర్‌ : సబ్జెక్ట్‌ డిటైల్స్‌ను మెరుగుపరిచేందుకు సహాయపడుతుంది.
• ఎక్స్‌పోజర్‌ : ఫొటోలు మరీ ప్రకాశవంతంగా ఉంటే.. మీరు కోరుకున్న డిటైల్స్‌ సరిగ్గా కనిపించవు. కాబట్టి, ఎక్స్‌పోజర్‌ లెవెల్స్‌ను కొద్దిగా తగ్గించండి.
• ఐఎస్‌ఓ : తక్కువ ఐఎస్‌ఓ (100-200)తో ఫొటోలు తీయండి. దీంతో డిజిటల్‌ నాయిస్‌ తగ్గుతుంది. ఫొటోలు మరింత షార్ప్‌గా కనిపిస్తాయి.
• అల్ట్రా-వైడ్‌ మోడ్‌ : సబ్జెక్ట్‌ చుట్టూ ఉండే ప్రాంతమంతా ఫ్రేమింగ్‌ కావాలంటే.. అల్ట్రా-వైడ్‌ మోడ్‌, ప్యానోరమా మోడ్‌లోకి వెళ్లండి.
• రా మోడ్‌ : ఫొటోలు తీసిన తర్వాత ఎడిటింగ్‌ కోసం హై-క్వాలిటీ డిటైల్స్‌ క్యాప్చర్‌ అవడానికి RAW మోడ్‌ వాడండి.
• రిఫ్లెక్షన్‌ ఫొటోగ్రఫీ : సరస్సుల్లో తేలియాడే పడవలు, పక్షులు, నది ఒడ్డుపై ఉండే నిర్మాణాల ప్రతిబింబాలను క్యాప్చర్‌ చేయండి.

లైటింగ్‌

• మినిమలిస్ట్‌ ఫొటోలు మరింత అందంగా రావాలంటే.. లైటింగ్‌ చాలా అవసరం.
• నేచురల్‌ లైట్‌ : మినిమలిస్ట్‌ ఫొటోగ్రఫీకి గోల్డెన్‌ అవర్‌ (ఉదయం 7గం.- 9గం. వరకు, సాయంత్రం 4గం. – 6 గం. వరకు) మంచి సమయం. ఇప్పుడు వచ్చే కాంతి.. సబ్జెక్ట్‌ను మరింత అందంగా చూపిస్తుంది.
• క్లౌడీ డేస్‌ : ఆకాశం మబ్బులు పట్టినప్పుడు.. ప్రకృతి ఆహ్లాదంగా మారుతుంది. ఇలాంటి సమయంలో తీసే ఫొటోలు మరింత అందంగా వస్తాయి.
• బ్యాక్‌లైటింగ్‌ : సబ్జెక్ట్‌ (చెట్టు, ఇల్లు) వెనుక నుంచి వచ్చే సూర్యరశ్మి.. సబ్జెక్ట్‌ను అద్భుతంగా చూపిస్తుంది.
• కంపోజిషన్‌ టెక్నిక్స్‌ : మినిమలిస్ట్‌ ఫొటోగ్రఫీని మరింత ఆకర్షణీయంగా మార్చే కొన్ని ముఖ్యమైన కంపోజిషన్‌ ట్రిక్స్‌ ఇవి.
• రూల్‌ ఆఫ్‌ థర్డ్స్‌ : స్మార్ట్‌ఫోన్‌ కెమెరాలో గ్రిడ్‌లైన్స్‌ ఆన్‌ చేసి, సబ్జెక్ట్‌ ఒక బాక్స్‌లో వచ్చేలా చూడండి. నెగెటివ్‌ స్పేస్‌, సబ్జెక్ట్‌కు మధ్య సరైన బ్యాలెన్స్‌ ఉండేలా చూసుకోండి. ఈ బ్యాలెన్స్‌డ్‌ కంపోజిషన్‌.. మీ ఫొటోను మరింత అందంగా చూపిస్తుంది.
• నెగెటివ్‌ స్పేస్‌ : మీ ఫ్రేమ్‌ మొత్తాన్నీ నెగెటివ్‌ స్పేస్‌తో నింపేయండి. ప్రధాన సబ్జెక్ట్‌ ఏ మూలనో ఉండేలా చూసుకోండి. ఇందుకోసం మీ సబ్జెక్ట్‌ నుంచి వీలైనంత దూరంగా జరగండి.

ఎడిటింగ్‌ యాప్‌లు

• మినిమలిస్ట్‌ ఫొటోలను మరింత మెరుపరచడానికి కింది యాప్స్‌తో ఎడిటింగ్‌ చేయండి.
• స్నాప్‌సీడ్‌ : బ్రైట్‌నెస్‌, కాంట్రాస్ట్‌, షార్ప్‌నెస్‌ను సర్దుబాటు చేయడానికి.
• అడోబ్‌ లైట్‌రూం మొబైల్‌ : క్లారిటీ – టెక్చర్‌ వివరాలను మరింత మెరుగుపరచడానికి.
• వీఎస్‌సీఓ : ఫొటోలకు ఆర్టిస్టిక్‌ ఫిల్టర్లను జోడించడానికి.

ప్రొ టిప్స్‌ :

• నెగెటివ్‌ స్పేస్‌ పరిమాణం, ప్రధాన సబ్జెక్టు మధ్య సమతుల్యతను సాధిస్తే.. మంచి ఫొటోలు వస్తాయి.
• ఫ్రేమ్‌లో సబ్జెక్టు ప్రత్యేకంగా కనిపించేవరకూ అటూఇటూ తిరగండి. ఫ్రేమ్‌లో అంతరాయాలు రాకుండా ఉండేందుకు ఆకాశంపైకి షూట్‌ చేయండి.
• మినిమలిస్ట్‌ ఫొటోగ్రఫీలో బ్లాక్‌ అండ్‌ వైట్‌ చిత్రాలు మరింత ప్రత్యేకంగా కనిపిస్తాయి. కాబట్టి, నలుపు – తెలుపులో ఫొటోలు తీయడానికి ప్రయత్నించండి.
• బ్లాక్‌ అండ్‌ వైట్‌ ఫొటోలు తీసేటప్పుడు కాంట్రాస్ట్‌ను సెట్‌ చేసుకోండి. లేకుంటే.. విశాలమైన నెగెటివ్‌ స్పేస్‌లో సబ్జెక్ట్‌ సరిగ్గా కనిపించదు.

చివరగా.. మినిమలిస్ట్‌ ఫొటోగ్రఫీ మీ క్రియేటివిటీని మెరుగుపరుస్తుంది. సరైన కాంతి, కంపోజిషన్‌, ఎడిటింగ్‌ టెక్నిక్స్‌ ఉపయోగించి.. అద్భుతమైన ఫొటోలు తీసుకోవచ్చు. వెంటనే మొబైల్‌ తీసుకోండి.. చుట్టుపక్కల ప్రాంతాలను నిశితంగా గమనించండి. రోజూచూసే సబ్జెక్ట్‌నే దూరం నుంచి క్యాప్చర్‌ చేయండి. పెద్దపెద్ద నిర్మాణాలను కూడా.. బుల్లిబుల్లి అద్భుతాలుగా మార్చేయండి. అయితే, నగరాలు, పట్టణాల్లో మినిమలిస్టిక్‌ ఫొటోగ్రఫీ అంత అనుకూలంగా ఉండదు. పల్లెలు, అటవీప్రాంతాలు, కొండలు, బీచ్‌లు, సరస్సులు, ఎడారి ప్రాంతాలు.. ఈ రకమైన ఫొటోగ్రఫీకి అనుకూలంగా ఉంటాయి. ఆయా ప్రాంతాలను సందర్శించినప్పుడు.. మినిమలిస్ట్‌గా ‘క్లిక్‌’మనిపించడం మొదలుపెట్టండి.

-ఆడెపు హరికృష్ణ