The Plated project | ఒక్క ప్లేటుతో 14 మంది పిల్ల‌ల ఆక‌లి తీరుస్తున్న‌రు

January 9, 2022 / 07:56 AM IST

The Plated Project | అన్ని దానాల్లోకి అన్నదానం గొప్పదని అంటారు. అయినా, తాము కడుపునిండా తింటున్న ప్రతిసారీ, పస్తులతో పడుకుంటున్న నిర్భాగ్యుల గురించి ఆలోచించేవారు ఎంతమంది ? ఆస్తి, సంపాదన పక్కనపెడితే.. పేదవాడి కడుపు నింపేవాడే నిజమైన శ్రీమంతుడు. ఇదే ఆలోచనతో అడుగు వేసింది ‘ది ప్లేటెడ్‌ ప్రాజెక్ట్‌’.

ఒక ప్లేటు = 14 మంది పిల్లలకు అన్నం! ది ప్లేటెడ్‌ ప్రాజెక్ట్‌ లెక్క ఇది. ఒక ప్లేటు అమ్మకంతో వచ్చే డబ్బుతో 14 మంది నిరుపేద పిల్లల కడుపులు నింపుతున్నదీ సంస్థ. ‘ప్లేటు కొనండి. పేదోడికి ప్లేటు భోజనం పెట్టండి’ అన్న నినాదంతో ముంబైకి చెందిన చిత్రేశ్‌ సిన్హా 2019లో ఈ అన్న యజ్ఞాన్ని ప్రారంభించారు. మొదటి కొన్ని నెలల్లోనే 40మంది కళాకారులు చేతులు కలిపారు. ఏడాది నుంచీ ప్రపంచవ్యాప్తంగా ఆదరణ లభిస్తున్నది. ఈ రంగురంగుల కంచాలు తినడానికే కాదు, గోడల మీద, షెల్ఫులలో అలంకరణకు కూడా బాగుంటాయి. ఈ ప్లేట్ల ధర రూ.1,420 నుంచి మొదలవుతుంది. ‘ప్రపంచ బాలబాలికలలో నలుగురిలో ఒకరు ఖాళీ కడుపుతో నిద్రపోతున్నట్లు లెక్కలు చెబుతున్నాయి. ఎంతోమంది పిల్లలు పోషకాహార లోపంతో బాధపడుతున్నారు. ఇలాంటి వాస్తవాలెన్నో నా మనసును కదిలించాయి.

అందుకే, మా ప్రాజెక్ట్‌ ద్వారా పేదపిల్లల కడుపులు నింపాలని నిశ్చయించుకున్నా. నాకు కళలంటే ఆసక్తి. నేను కళాకారుణ్ని కాకపోయినా, చిత్రకళ ద్వారా వాస్తవాలను కండ్లకు కట్టినట్లు చూపించే చిత్రకారులంటే చాలా ప్రేమ. అందుకే మా ఆశయానికి దగ్గరగా ఉండేలా కళాత్మకమైన కంచాలను ఎంచుకున్నాం. వీటిని ఆన్‌లైన్‌లోనూ విక్రయిస్తున్నాం. వీటి ద్వారా వచ్చే ప్రతి రూపాయిలో అర్ధ రూపాయి పేదల ఆకలి తీర్చేందుకు ఉపయోగిస్తున్నాం. ఈ మూడేండ్ల కాలంలో మేం ఐదు లక్షల మందికి అన్నం పెట్టాం. మా కస్టమర్లను అదనంగా ఒక్క రూపాయి కూడా అడగట్లేదు. పెద్ద మనసుతో పళ్లాలను కొంటే చాలు. పరోక్షంగా ఈ పుణ్యకార్యానికి సాయం చేసినట్లే’ అంటారు ది ప్లేటెడ్‌ ప్రాజెక్ట్‌ వ్యవస్థాపకుడు చిత్రేశ్‌ సిన్హా.