త్రికోణంతో..తిరుగులేకుండా!

ఫొటోగ్రఫీ అంటేనే.. కాంతి కదలికలను కెమెరాలో బంధించడం. అలాంటి కాంతిని నియంత్రించడం అత్యంత కీలకమైన విషయం. ఇందుకు సహాయపడేదే.. ఎక్స్‌పోజర్‌ ట్రయాంగిల్‌.

ఫొటోగ్రఫీ అంటేనే.. కాంతి కదలికలను కెమెరాలో బంధించడం. అలాంటి కాంతిని నియంత్రించడం అత్యంత కీలకమైన విషయం. ఇందుకు సహాయపడేదే.. ఎక్స్‌పోజర్‌ ట్రయాంగిల్‌.ఈ త్రికోణంపై పట్టు సాధించడం ద్వారా.. ఫొటోలు అద్భుతంగా వస్తాయి. డీఎస్‌ఎల్‌ఆర్‌ కెమెరాలో మూడు ప్రధానమైన అంశాలు.. అపర్చర్‌, షట్టర్‌ స్పీడ్‌, ఐఎస్‌ఓ. ఈ మూడూ ఒకదానితో ఒకటి అనుసంధానమై ఉంటాయి. వీటిని సమతుల్యం చేసుకుంటూ.. కెమెరా సెన్సర్‌కు చేరే కాంతి పరిమాణాన్ని నియంత్రించాల్సి ఉంటుంది. అంటే, ఒక సెట్టింగ్‌ను మార్చినప్పుడు.. కాంతిని సరైన స్థాయిలో ఉంచడానికి మిగిలిన రెండిటినీ సర్దుబాటు చేయాల్సి ఉంటుంది. అప్పుడే సరైన ఎక్స్‌పోజర్‌ను పొందవచ్చు. దీనినే ‘ఎక్స్‌పోజర్‌ ట్రయాంగిల్‌’గా వ్యవహరిస్తారు.

అపర్చర్‌ (Aperture):

లెన్స్‌ గుండా వెళ్లే కాంతి పరిమాణాన్ని.. అపర్చర్‌ నియంత్రిస్తుంది. డెప్త్‌ ఆఫ్‌ ఫీల్డ్‌ను అపర్చర్‌ నిర్ణయిస్తుంది. ఇది పెద్దదిగా ఉంటే.. ఎక్కువ కాంతి; చిన్నదిగా ఉంటే.. తక్కువ కాంతి వస్తుంది. అపర్చర్‌ను f-stopలో నిర్ణయిస్తారు.

• చిన్న f-stop: ఎక్కువ లైట్‌ అవసరం ఉన్నప్పుడు, బ్యాక్‌గ్రౌండ్‌ బ్లర్‌ (బొకే) కావాలనుకుంటే.. తక్కువ f-stop (f/1.8, f/2.8) అవసరం అవుతుంది.
• పెద్ద f-stop: బ్యాక్‌గ్రౌండ్‌ సహా దృశ్యం మొత్తం క్లియర్‌గా రావాలంటే.. ఎక్కువ f-stop (f/11, f/16) పెట్టుకోవాలి. దీనిద్వారా సెన్సర్‌పై తక్కువ కాంతి పడుతుంది. మొత్తం దృశ్యం స్పష్టంగా వస్తుంది.

ఐఎస్‌ఓ

• తక్కువ ఐఎస్‌ఓ: పగటిపూట, ఎక్కువ లైట్‌ ఉన్నప్పుడు తక్కువ ఐఎస్‌ఓ (100-200) అవసరం అవుతుంది.
• ఎక్కువ ఐఎస్‌ఓ: రాత్రి పూట, తక్కువ కాంతిలో ఫొటోలు తీయాల్సి వచ్చినప్పుడు ఎక్కువ ఐఎస్‌ఓ (800-6400+) ఉపయోగించాలి.

షట్టర్‌ స్పీడ్‌ (Shutter Speed):

కెమెరా సెన్సర్‌పై ఎంతసేపు (సమయం) కాంతి పడాలో షట్టర్‌ స్పీడ్‌ నియంత్రిస్తుంది. ఫొటోలోని మోషన్‌ ఫ్రీజ్‌, మోషన్‌ బ్లర్‌ను కూడా షట్టర్‌ స్పీడే నిర్ణయిస్తుంది. తక్కువ షట్టర్‌ స్పీడ్‌.. ఎక్కువ కాంతిని అనుమతిస్తుంది. వేగవంతమైన షట్టర్‌ స్పీడ్‌.. తక్కువ కాంతిని కెమెరాలోనికి పంపిస్తుంది.

• ఎక్కువ (ఫాస్ట్‌) షట్టర్‌ స్పీడ్‌: సబ్జెక్ట్‌ వేగం ఎక్కువగా ఉన్నప్పుడు ఎక్కువ షట్టర్‌ స్పీడ్‌ను ఉపయోగించాలి. అప్పుడే సబ్జెక్ట్‌ కదలికలు క్లియర్‌గా ఫ్రీజ్‌ అవుతాయి. ఉదాహరణకు వేగంగా పరిగెత్తే చిరుతపులి, దూసుకెళ్లే కారు, గాలిలో వేగంగా ఎగిరే పక్షిని ఫొటో తీయాలంటే.. షట్టర్‌ స్పీడ్‌ (1/1000 sec) ఎక్కువగా ఉండాలి.
• తక్కువ (స్లో) షట్టర్‌ స్పీడ్‌ : ఫొటోల్లో మోషన్‌ బ్లర్‌ ఎఫెక్ట్‌ కావాలని అనుకున్నప్పుడు షట్టర్‌ స్పీడ్‌ తక్కువగా ఉంచుకోవాలి. ఉదాహరణకు నైట్‌ ఫొటోగ్రఫీ, లైట్‌ ట్రైల్స్‌ ఫొటోలు రావడానికి షట్టర్‌ స్పీడ్‌ (1/10 sec, 5 sec) తక్కువగా ఉండాలి.

ఉదాహరణ:

• పోర్ట్రెయిట్‌ ఫొటోగ్రఫీ కోసం.. అపర్చర్‌ f/1.8 (బొకే), ఐఎస్‌ఓ 100, షట్టర్‌ స్పీడ్‌ 1/200 secగా పెట్టుకోవాలి.
• వైల్డ్‌లైఫ్‌ ఫొటోగ్రఫీ కోసం.. అపర్చర్‌ f/5.6, ఐఎస్‌ఓ 400, షట్టర్‌ స్పీడ్‌ 1/2000 secగా ఉంటే, వేగంగా దూసుకెళ్లే పక్షులు, జంతువుల ఫొటోలు క్లియర్‌గా వస్తాయి.
• ల్యాండ్‌ స్కేప్‌ను ఫొటో తీయాలంటే.. అపర్చర్‌ f/11, ఐఎస్‌ఓ 100, షట్టర్‌ స్పీడ్‌ 1/60 secఉండాలి.
• నైట్‌ స్కై ఫొటోగ్రఫీ కోసం.. అపర్చర్‌ f/2.8, ఐఎస్‌ఓ 3200, షట్టర్‌ స్పీడ్‌ 20 sec గా నిర్ణయించాలి.

చివరగా.. ఎక్స్‌పోజర్‌ ట్రయాంగిల్‌ అనేది ఫొటోగ్రఫీకి ఫౌండేషన్‌ లాంటిది. అపర్చర్‌, షట్టర్‌ స్పీడ్‌, ఐఎస్‌ఓ మధ్య సరైన సమతుల్యం సాధిస్తేనే.. ఫొటోలను మీరు కోరుకున్న విధంగా తీయొచ్చు. అన్నీ సమపాళ్లలో ఉన్నప్పుడే.. లైట్‌, బ్లర్‌, డెప్త్‌, మోషన్‌ ఫ్రీజ్‌/ బ్లర్‌ కలిగిన ఫొటోలు వస్తాయి.

-ఆడెపు హరికృష్ణ