రుతువులను బట్టి మనకు జ్వరాలు వస్తాయి. వెంటనే డాక్టర్ను సంప్రదించి మందులు తెచ్చుకుంటాం. మరి పంటల సంగతి? తెగుళ్లు, వైరస్లు, చీడపీడలు చుట్టుముడితే? శ్యామసుందర్రెడ్డి అనే డాక్టర్ను సంప్రదిస్తాయి. సమస్య తీవ్రంగా ఉంటే.. శాస్త్రవేత్తల పరివారమంతా వాలిపోతుంది. ఎక్కడో నల్లగొండలో ఉన్న చెట్లకు ఆరోగ్యం బాగాలేదని.. హైదరాబాద్లో ఉన్న వైద్యులకు ఎలా తెలుస్తుంది? అదే ‘సంహిత’ ప్రత్యేకత.
‘గగనపు వీధి వీడి వలసవెళ్లిపోయిన నీలిమబ్బు కోసం తరలింది తనకు తానే ఆకాశం.. పరదేశం’ ఈ మాట శ్యామసుందర్రెడ్డికి అతికినట్టు సరిపోతుంది. ఎన్నో ఏండ్ల నుంచీ పండ్ల మొక్కలు, చెట్ల గురించి ఆయన లోతుగా అధ్యయనాలు చేస్తూనే ఉన్నారు. ఆ పరిశోధనల ఫలితమే.. ‘సంహిత క్రాప్ కేర్ క్లినిక్’. డిజిటల్ ట్రీ హెల్త్ ఆడిట్ సిస్టమ్ (డీటీహెచ్ఏఎస్) విధానాన్ని ప్రపంచంలోనే తొలిసారిగా ఈ సంస్థ తెలుగు రాష్ర్టాల్లో ప్రవేశపెట్టింది. ఇది ‘సంహిత సిట్రాన్’ యాప్తో అనుసంధానమై ఉంటుంది. పంటలను ఆశించే చీడపీడలను పసిగట్టే క్లినిక్ ఇది. ప్రస్తుతం రెండు రాష్ర్టాల్లోని బత్తాయి తోటల రైతుల కోసం మాత్రమే పనిచేస్తున్నది. సంహిత సిట్రాన్ సేవల కోసం రిజిస్ట్రేషన్ చేసుకోగానే.. చెట్ల తీరు, నేల స్వభావం, నీరు, తేమ, పురుగు మందుల పిచికారీ, పూత, కాయదశ నుంచి కోత, మార్కెటింగ్ వరకూ ప్రతీది సంబంధిత రైతు సమక్షంలో నిర్వహిస్తారు. చివరికి పంట విక్రయంలో రైతుకే పెద్దపీట వేస్తారు. రైతు తన పేరు నమోదు చేసుకోగానే.. మల్టీ స్పెక్ట్రల్ డిజిటల్ కెమెరాను కలిగిన డ్రోన్తో తోట మొత్తాన్నీ ఏరియల్ స్కానింగ్ చేస్తారు. ఈ స్కానింగ్ ద్వారా తోటలోని సమస్యాత్మకమైన చెట్లను సులభంగా గుర్తిస్తారు. తోట మొత్తంలో ఎన్ని చెట్లు ఉన్నాయి? వాటిలో ఆరోగ్యవంతమైనవి ఎన్ని? అనారోగ్యం పాలైనవి ఎన్ని? వైరస్ సోకి పూర్తిగా ఎండిపోయినవి ఎన్ని?.. అవి ఎక్కడెక్కడ ఉన్నాయి? స్థానికంగా వర్షపాతం ఎలా ఉంది? తదితర విషయాలపై కచ్చితమైన అంచనాకు వస్తారు. ఏ చెట్టు ఎందుకు ఆరోగ్యంగా ఉంది, ఏ చెట్టు ఎందుకు వాడిపోతున్నది?.. అనే ప్రశ్నకూ జవాబు వెతుకుతారు. సంహిత క్రాప్ కేర్ క్లినిక్ పొలంలోని ప్రతి చెట్టు డేటానూ రికార్డు చేస్తుంది. అంతేకాదు, ఫలానా చెట్టుకు కాసిన కాయలెన్ని? ఆ కాయల బ్యాచ్ నంబరు ఎంత? అన్నదీ తెలుసుకోవచ్చు. పంటలు, నేలలు, వైరస్ల గురించి తెలిస్తే.. సగం సమస్య పరిష్కారం అయినట్టే.
సెన్సర్లతో పర్యవేక్షణ
సంహితలో రిజిస్టర్ అయిన రైతుల బత్తాయి తోటల్లో అత్యాధునిక ఆటోమెటిక్ సెన్సర్లు అమర్చుతారు. ఇవి వేరు వ్యవస్థ తీరు, తేమ, ఉష్ణోగ్రతలను నిరంతరం నమోదు చేస్తుంటాయి. వీటి సహాయంతో సాగునీటి వినియోగంలో లోపాలను సవరించవచ్చు. బత్తాయి తోట జీవితకాలం, దిగుబడి, కాయ నాణ్యతలను గణనీయంగా పెంచవచ్చు. నేలలోని తేమ హెచ్చుతగ్గుల తీవ్రత ఆధారంగా బత్తాయి తోటలను క్షీణతకు గురిచేసే బంక తెగులు, ఎండు తెగులు వంటివాటిని సులువుగా నియంత్రించవచ్చు. సెన్సర్ల ద్వారానే సమీప వాతావరణ కేంద్రాల నుంచి ఎండ, వాన, గాలిలో తేమ, పగటి-రాత్రి ఉష్ణోగ్రతలు మొదలైన వివరాలను సమీకరించి, బత్తాయి తోటలపై వాటి ప్రభావాన్ని విశ్లేషించవచ్చు. దీనివల్ల పంట దిగుబడి, కాయ నాణ్యతలో గణనీయమైన పురోగతి సాధించవచ్చు. రైతు వివరాలు, బత్తాయితోట కోతకు వచ్చే సమయం, కాయ నాణ్యత తదితర వివరాలు ఆన్లైన్లో ఉండటం వల్ల బత్తాయి కొనుగోలుదారులు, ఎగుమతిదారులు నేరుగా రైతును సంప్రదించే అవకాశం ఉంటుంది. సంహిత సిట్రాన్ సేవ కనీసం నాలుగు సంవత్సరాలకు పైబడిన బత్తాయి తోటలకు మాత్రమే అందుబాటులో ఉంది. రైతుల నుంచి పంట దిగుబడిలో పదిశాతం రుసుముతో ఒప్పందం కుదుర్చుకోవాల్సి ఉంటుంది. ప్రస్తుతం ఈ సేవలు నల్లగొండ, మహబూబ్నగర్, కర్నూలు, అనంతపురం, కడప, ప్రకాశం, నెల్లూరు జిల్లాల్లో అందుబాటులో ఉన్నాయి. ఆసక్తిగల రైతులు 70139 01172 నెంబర్లో కానీ, www.samhitha. ag వెబ్సైట్ ద్వారా కానీ సంప్రదించొచ్చు.
అందరూ నిపుణులే..
డాక్టర్ గున్నంరెడ్డి శ్యామసుందర్రెడ్డి ఎమ్మెస్సీ (అగ్రి) చదివారు. తర్వాత హైదరాబాద్లో ప్లాంట్ పాథాలజీ విభాగంలో పీహెచ్డీ చేశారు. కర్నూలులోని మహానంది కృషి విజ్ఞాన కేంద్రంలో పనిచేశారు. ఇంటర్నేషనల్ ఇన్స్టిట్యూట్ ఆఫ్ ఇన్ఫర్మేషన్ టెక్నాలజీలో వ్యవసాయ శాస్త్రవేత్తగా, అధ్యాపకుడిగా, సేంద్రియ వ్యవసాయ పరిశోధకుడిగా పనిచేశారు. ఏకలవ్య ఫౌండేషన్ కృషి విజ్ఞాన కేంద్రంలో సీనియర్ శాస్త్రవేత్తగా సేవలందించారు. తన స్నేహితులైన జగన్ చిట్టిప్రోలు, కల్యాణ్ ఇంజమూరికి సంహితలో కీలక బాధ్యతలు అప్పగించారు. జగన్ హార్వర్డ్ బిజినెస్ స్కూల్లో చదివారు. ఆర్టిఫీషియల్ ఇంటెలిజెన్స్, డేటా అనలిటిక్స్లో విశేష అనుభవం గడించారు. సంహిత క్రాప్ కేర్ క్లినిక్కు అధ్యక్షుడిగా, ఎండీగా బాధ్యతలు నిర్వహిస్తున్నారు. ఇక కల్యాణ్ కూడా ఎన్జీ రంగా వ్యవసాయ విశ్వవిద్యాలయంలో కీటకశాస్త్రంలో ఎమ్మెస్సీ చేశారు. మూడేండ్లపాటు వ్యవసాయ అధికారిగా, వ్యవసాయ పాలిటెక్నిక్ కాలేజ్లో అధ్యాపకుడిగా పనిచేశారు. ప్రస్తుతం సంహిత క్రాప్ కేర్ క్లినిక్లో ఎక్స్పర్ట్ అడ్వైజర్గా బాధ్యతలు నిర్వర్తిస్తున్నారు.
– రవికుమార్ తోటపల్లి