పుస్తక సమీక్ష

మనం మంచి చేస్తే మంచే జరుగుతుంది. ఆ మంచి మనకే జరగవచ్చు, లేదంటే సమాజంలో పదిమందికీ మేలు చేసేదిగా ఉండొచ్చు. ఎంతోకొంత మంచి అనేది తప్పకుండా జరుగుతుంది. పెద్దింటి అశోక్‌ కుమార్‌ తాజా కథా సంకలనం ‘విత్తనం’లోని విత్తనం కథ ఇదే సందేశాన్ని ఇస్తుంది.

మంచిని కోరుకునే కథలు

మనం మంచి చేస్తే మంచే జరుగుతుంది. ఆ మంచి మనకే జరగవచ్చు, లేదంటే సమాజంలో పదిమందికీ మేలు చేసేదిగా ఉండొచ్చు. ఎంతోకొంత మంచి అనేది తప్పకుండా జరుగుతుంది. పెద్దింటి అశోక్‌ కుమార్‌ తాజా కథా సంకలనం ‘విత్తనం’లోని విత్తనం కథ ఇదే సందేశాన్ని ఇస్తుంది. ఇందులో మరో కథ ‘దూరం’ మత రాజకీయాల కల్మషత్వం ప్రజల జీవితాల్ని ఎంత కల్లోలానికి గురిచేస్తుందనే ఇతివృత్తంతో నడుస్తుంది. ఇక ‘ఏకగ్రీవం’ కథ రాజకీయాలు డబ్బుమయమైపోతే ప్రజాస్వామ్యం, ఓటుహక్కు ఎంత పరిహాసానికి గురవుతాయో కండ్లు తెరిపిస్తుంది. ఓటుహక్కు అమూల్యమైందని, దాన్ని డబ్బుకు అమ్ముకోకూడదనే సందేశం ఈ కథలో ప్రధానంగా కనిపిస్తుంది.

సమాజంలో సంస్కరణ అంత సులువుగా జరగదు. ఒక్కరితో మొదలవుతుంది. ఒక్కరు ఇద్దరవుతారు. ఇద్దరు నలుగురవుతారు. చివరికి ఎక్కడో ఒకచోట మార్పు తప్పకుండా వస్తుందనే సందేశాన్ని ‘ఉల్లిపూసలు’ కథ చాటుతుంది. మహిళల జీవితాల విషయంలో నిర్ణయాధికారం వాళ్లదే అని ఈ కథ స్పష్టం చేస్తుంది. ప్రతీది రాజకీయమయమైన దగ్గర సామాన్యుడి పరిస్థితి ఎలా ఉంటుందో ‘సహగమనం’ కథ చిత్రిస్తుంది. అక్క కాపురం నిలబెట్టడాన్ని తన బాధ్యతగా తీసుకున్న తమ్ముడు ఏం చేశాడనేది ‘విక్కీ’ కథ వెల్లడిస్తుంది. అయితే, కథ ముగింపులో తండ్రి బాధ్యతగా మెలుగుతాడా అనేది ప్రశ్నగా మిగులుతుంది. కథ ఉద్దేశాన్ని బట్టి పాఠకుడు మంచి జరుగుతుందనే ఆశించాలి. ‘విత్తనం’ కథలో రచయిత పేర్కొన్నట్టు ఈ సంకలనంలోని కథలు బాధ్యత కలిగిన సమాజాన్ని కోరుకుంటాయి.