Voice for Girls | పేదరికం చదువును చంపేస్తుంది. కుటుంబ పరిస్థితులు బాల్య వివాహాన్ని ప్రోత్సహిస్తాయి. అజ్ఞానం, అమాయకత్వం లైంగిక వేధింపులను నిలదీయలేని పిరికితనాన్ని నింపుతాయి. వీటన్నిటి నుంచి విముక్తి లభిస్తేనే.. అమ్మాయిలు చదువుకుంటారు, ఉద్యోగాలు చేస్తారు, సాధికారత సాధిస్తారు. ‘వాయిస్ ఫర్ గర్ల్స్’ లక్ష్యం అదేనంటున్నారు ఆ సంస్థ వ్యవస్థాపకురాలు అనూష భరద్వాజ్.
అమ్మాయి పెద్ద మనిషి అయిపోగానే ఆంక్షలు మొదలవుతాయి. ‘ఇలా ఉండాలి. అది చేయొద్దు. ఇది చేయొద్దు. బయటికి పోవద్దు. అబ్బాయిలతో మాట్లాడొద్దు’ వగైరా వగైరా హద్దులు గీస్తారు. చిన్న వయసులో అయితే తక్కువ కట్నంతో పెండ్లి అవుతుందని తల్లిదండ్రులు అనుకుంటారు. వివాహానికి ఒప్పుకొని తీరాలని ఆడపిల్లలపై ఒత్తిడి చేస్తారు. దీనివల్ల వాళ్లు చదువులకు, మంచి భవితకు దూరం అవుతారు. చదువుకునే అమ్మాయిల ఆలోచనల్ని పెండ్లి నుంచి తప్పించి ఉన్నత విద్య, మంచి భవిష్యత్ వైపు నడిపించడమే ‘వాయిస్ ఫర్ గర్ల్స్’ ఆశయం.
గ్రామీణులే లక్ష్యం..
ఆడపిల్లలకు చదువు ప్రాధాన్యం చెప్పి.. బాల్య వివాహాలు, లైంగిక వేధింపులు, గృహ హింస పట్ల అవగాహన కల్పించడం ద్వారా లైంగిక సమానత్వం సాధించవచ్చు. అందుకే, వాయిస్ ఫర్ గర్ల్స్ బాలికలు చదివే విద్యా సంస్థలకు వెళ్లి అమ్మాయిల ఆలోచనల మార్పునకు వివిధ కార్యక్రమాలు నిర్వహిస్తున్నది. గ్రామీణ బాలికలకు బయటి అవకాశాల గురించి తెలియదు. కాబట్టి గ్రామీణ ఇంటర్, డిగ్రీ విద్యార్థులపై ఎక్కువగా దృష్టి పెడుతుంది. ఇప్పటికే, 75 గవర్నమెంట్ రెసిడెన్షియల్ విద్యాసంస్థలతో ప్రత్యేక ఒప్పందం చేసుకున్నాం. దాదాపు 200 విద్యా సంస్థలతో కలిసి పనిచేస్తున్నాం. ఆ ఆవరణలలో ఏడాదికి మూడు క్యాంపులు నిర్వహిస్తాం. మొదటి క్యాంప్లో టీనేజ్లో వచ్చే శారీరక మార్పుల గురించి తెలియజేస్తాం. ఆడపిల్లల ఆరోగ్య సమస్యలు, పీరియడ్స్ సమయంలో పాటించాల్సిన శుభ్రత గురించి అవగాహన కల్పిస్తాం. వాళ్ల సందేహాలు నివృత్తి చేస్తాం. రెండో క్యాంప్లో చదువు, కెరీర్ గురించి అవగాహన కల్పిస్తాం. అమ్మాయిలు కాలేజ్ చదువుకు దూరం కావడానికి ప్రధాన కారణం పెండ్లి. ఈ ప్రమాదాన్ని తప్పించుకుంటే విశ్వవిద్యాలయాల మెట్లెక్కుతారు. ఉన్నతమైన ఉద్యోగాలు సాధిస్తారు. నిజానికి, అమ్మాయిలంతా మంచి కెరీర్నే కోరుకుంటారు. కానీ, దాన్నెలా సాధించాలో తెలియదు. అందుకే చదువుకుంటే జరిగే మేలు ఏమిటన్నది ముందుగా తెలియాలి. ‘పెండ్లి కంటే చదువే ముఖ్యం’ అనే భావన వాళ్లలో పెంపొందించాలి. మూడో క్యాంప్లో మేం చేస్తున్నది అదే.
‘నో’ చెప్పాల్సిందే
శారీరక, మానసిక, లైంగిక హింస గురించి చాలామందికి సరైన అవగాహన లేదు. లైంగిక వేధింపులకు గురవుతున్నా అర్థం చేసుకోలేరు. అర్థమైనా ‘నాదే తప్పేమో’ అని భయపడతారు. ఆ హింసను గుర్తించి, విశ్వసనీయ వ్యక్తులతో ఎలా పంచుకోవాలో బోధిస్తాం. చట్టప్రకారంగా ఎలా రక్షణ పొందాలో వివరిస్తాం. ‘నో’ చెప్పడం నేర్పిస్తాం. ఫలానా డియోడరెంట్ వాడితే చాలు.. అమ్మాయిలంతా వెంటపడతారని భ్రమ పడిపోయే అబ్బాయిలు తిరస్కరణను ఫెయిల్యూర్గా భావిస్తారు. అమ్మాయి ఎందుకు కాదన్నదనే కోణంలో ఆలోచించరు. నెగెటివ్ ఉద్వేగాన్ని బుర్రనిండా నింపుకొని ఆత్మహత్య దాకా పోతున్నారు. ‘నన్ను లవ్ చేయాల్సిందే’ అని భయపెడుతున్నారు. ‘నో.. చెప్పడం ఆమె హక్కు’ అని గ్రహించడం లేదు. రిజెక్షన్, ఫెయిల్యూర్ సాధారణం అని అబ్బాయిలకు తెలియజెప్పాలి. ఆ దిశగానూ మేం కృషి చేస్తున్నాం.
సఖి.. శిక్షణ
పైన చెప్పిన మూడు క్యాంప్లలో పాల్గొన్న అమ్మాయిల్లో ఆసక్తి ఉన్నవాళ్లను ‘యంగ్ ఇంటర్న్షిప్ ప్రోగ్రామ్ (సఖి)’కు ఎంపిక చేస్తాం. వివిధ విద్యా సంస్థల్లో శిక్షణ ఇచ్చేందుకు వారిని పంపుతాం. సఖి (వలంటీర్) వయసు, విద్యార్థినుల వయసు ఒకటే కావడం వల్ల వాళ్ల మధ్య ఏర్పడే రిలేషన్షిప్ బ్యూటి ఫుల్గా ఉంటుంది. బిడియం మాయమై పోతుంది. ‘అక్కా! క్లాత్ వాడితే అసౌకర్యంగా ఉంది, ఏం చేయాలి?’, ‘మా పొరుగింటాయన ఇబ్బంది పెడుతున్నాడు. ఎవరికి చెప్పాలి?’, ‘ఐఏఎస్ కావాలంటే ఏం చదవాలి?’.. ఏ సందేహమైనా నిస్సంకోచంగా ముందుంచుతారు. ‘ఏ ప్రశ్న అడగాలన్నా అడగండి. తెలిసినంత చెబుతాను. తెలియనిది తెలుసుకుని చెబుతాను’ అని సఖి ప్రోత్సహిస్తుంది. కాలేజ్ సురక్షితమైన ప్రదేశం. కాబట్టి అమ్మాయిలు ఓపెన్ అవుతారు. ఆ ఆవరణలోనే ఏదైనా సమస్య ఉంటే మేనేజ్మెంట్ జోక్యాన్ని కోరతాం. ఇలా శిక్షణ గొలుసుకట్టుగా సాగిపోతుంది. మా సఖి నుంచి ఇతర ఆడపిల్లలు కూడా స్ఫూర్తి పొందుతారు. ‘ఈ అక్క చదువుకుంటున్నది. కాన్ఫిడెన్స్తో ఉన్నది. ధైర్యంగా మాట్లాడుతున్నది. నేనూ ఈ అక్కలా కావాలి’ అని మిగతా ఆడపిల్లలు కోరుకుంటారు. ఇలా, ఇప్పటి వరకు రెండున్నర లక్షల మందికి అవగాహన కలిగించాం.
…? నాగవర్ధన్ రాయల