The winner of the interview is yourself | ఇంటర్వ్యూలో విజేత మీరే

ఇంట్రావర్టెడ్ వ్యక్తులు : వీరిని అంతర్ముఖులు అని అంటారు. అంటే తమలో తామే ముడుచుకుపోయి బయటకు ఏదీ మాటల్లో చెప్పుకోలేక ఇబ్బంది పడుతూ ఉంటారు. విపరీమైన మొహమాటం, సిగ్గు ఉంటుంది. కొత్తవారితో కలివిడిగా ఉండలేరు. బిడియం వల్ల ఎవరితో కూడా దీటుగా బదులు ఇవ్వలేరు. అదీగాక తమ స్థితి పట్ల తామే జాలి పడుతూ ఉంటారు. వీరికి తెలివితేటలు పుష్కలంగా ఉంటాయి. అతర్ముఖులుగా ఉండిపోవటం వల్ల వీరు తెలివి తేటలు గలవారని ఎదుటివారికి తెలిసే అవకాశాలు తగ్గిపోతాయి. ఈ కారణాల వల్ల వీరు ఇంటర్వ్యూల్లో విజేతలుగా రాణించలేకపోతుంటారు.
నువ్వు చాలా మారాలి విక్రమ్. తప్పకుండా సర్ చెప్పండి నేనేవిధంగా మారాలో. చెబుతాను గానీ ముందుగా ఒక కథ చెబుతాను. చెప్పండి సర్. ఈ కథ చివర్లో ఒక చిన్న ఫజిల్ ఉంటుంది. బాగా ఆలోచించి సమాధానం చెప్పాలి. అలాగే సర్.

రాము, శ్యాము, కృష్ణ అనే ముగ్గురు యువకులు మంచి స్నేహితులు. వీరొకసారి హిమాలయాలకు వెళ్లి కఠోర తపస్సు చేశారు. వీళ్ల తపస్సుకు మెచ్చి దేవుడు ప్రత్యక్షమై ఏం కావాలో కోరుకొమ్మని అడిగాడు. మొదట రాము వంతు వచ్చింది. అప్పడు రాము నాకు చాలా ధనం, బంగారం, వజ్రాలు, పొలాలు, భవంతులు ఇలా అనేకానేక ఆస్తులు కావాలి అని కోరడం దేవుడు తథాస్తు అనడం రాము క్షణాల్లో ఐశ్వర్యవంతుడిగా మారటం జరిగింది. తరువాత శ్యాము వంతు వచ్చింది. అప్పుడు శ్యాము నేనేం మాట్లాడినా మరుక్షణమే మీడియా అంతా కోడైకూయాలి. నా పేరు లేని వార్త ఉండరాదు. అంత పాపులర్ అయిపోవాలి. ఇంకా నాకు వీలనన్నీ ఆస్తిపాస్తులు, ధనం, బంగారం, వజ్రాలు కూడా ఇవ్వటం మర్చిపోకు దేవుడా! అని కోరుకున్నాడు. దేవుడు తథాస్తు అనటంతో సెలబ్రిటీగా మారాడు శ్యాము. ఇక కృష్ణ వంతు రాగా.. కృష్ణ కళ్లు పెద్దవి చేసుకొని దేవున్ని ఆపాదమస్తకం పులకితుడై చూసి పాదాభివందనం చేసుకొని చాలా చిన్న కోర్కె మూడే మూడు పదాలతో కోరాడు. యథావిధిగా దేవుడు తథాస్తు అనేసి కృష్ణను ప్రేమగా ఒకసారి గాఢాలింగనం చేసుకొని అదృశ్యమయ్యాడు.

రాము, శ్యాము దేవుడిని ఏమడిగారో మనకు తెలుసు. పరిణామాలు కూడా చూశాం. ఇప్పుడు చెప్పు కృష్ణ ఏం కోరుకునుంటాడో! బాగా ఆలోచించి చెప్పు. బాగా ఆలోచించి విక్రమ్ ఏదో చెప్పాడు. కానీ శశాంక్ కాదంటాడు. ఎంత ఆలోచించినా చెప్పలేకపోయాడు విక్రమ్. చివరికి శశాంకే చెప్పాడు. ఇప్పుడు నేను చెప్పబోయే సమాధానం నీకు చాలా ఉపయోగపడుతుంది. కృష్ణ దేవున్ని ఏ మూడు వరాలు అయితే కోరాడో అవి ప్రతి ఇంటర్వ్యూ అభ్యర్థికి అవసరమే. అవి ఏంటంటే 1) ఇంగితం (కామన్ సెన్స్) 2) వాక్చాతుర్యం (కమ్యూనికేషన్ స్కిల్స్) 3) సమయస్ఫూర్తి (ప్రెజెన్స్ ఆఫ్ మైండ్). తనవంతు వచ్చినప్పుడు కృష్ణ దేవున్ని కోరుకున్నవి ఈ మూడే. ఇంటర్వ్యూలో ప్రతి ప్రశ్నకి సమాధానం చెప్పేముందు తులనాత్మకంగా ఆలోచించాలి.
ఈ ప్రశ్న ఎందుకు వేస్తున్నారు? ఈ ప్రశ్న వెనుక ఉన్న అసలు ఉద్దేశం ఏమిటి? హెచ్‌ఆర్ మేనేజర్ నా నుంచి ఏం ఆశిస్తున్నారు? ఇంగితం, సమయస్ఫూర్తి, వాక్చాతుర్యం ఉపయోగించి సమాధానం ఇవ్వాలి.