రన్నరప్‌ పొన్నప్ప జోడీ

సయ్యద్‌ మోడీ అంతర్జాతీయ బ్యాడ్మింటన్‌ టోర్నీ మహిళల డబుల్స్‌లో భారత జోడి తనీష క్రాస్టొ, అశ్విని పొన్నప్ప ద్వయం రన్నరప్‌తో సంతృప్తి చెందింది.

లక్నో : సయ్యద్‌ మోడీ అంతర్జాతీయ బ్యాడ్మింటన్‌ టోర్నీ మహిళల డబుల్స్‌లో భారత జోడి తనీష క్రాస్టొ, అశ్విని పొన్నప్ప ద్వయం రన్నరప్‌తో సంతృప్తి చెందింది. ఆదివారం జరిగిన ఫైనల్లో తనీష-అశ్విని 14-21, 21-17, 15-21తో జపాన్‌ జోడి రిన్‌ ఇవనగ-కీ నకనిషి చేతిలో ఓడిపోయారు. తొలి గేమ్‌ను కోల్పోయిన తనీష-అశ్విని రెండో గేమ్‌ను గెలుచుకుని పోటీలో నిలిచారు. అయితే జపాన్‌ జోడి నిర్ణయాత్మక మూడో గేమ్‌లో ఆరంభంనుంచి ఆధిక్యం ప్రదర్శించి గేమ్‌తోపాటు మ్యాచ్‌ను, టైటిల్‌ను సొంతం చేసుకున్నారు.

ఇతర ఫైనల్స్‌లో చిన్‌ యు జెన్‌ 20-22, 21-12, 21-17తో జపాన్‌కు చెందిన కెంటా నిషిమోటోపై గెలుపొంది పురుషుల సింగిల్స్‌ టైటిల్‌ను, జపాన్‌కు చెందిన నజోమి ఒకుహర 21-19, 21-16తో డెన్మార్క్‌కు చెందిన లినె హోజ్‌మార్క్‌ను ఓడించి మహిళల సింగిల్స్‌ టైటిల్‌ను, ఇండోనీసియాకు చెందిన చూంగ్‌ హాన్‌ జియాన్‌-హైకల్‌ ముహ్మద్‌ 18-21, 21-18, 21-16తో జపాన్‌కు చెందిన అకిరా కోగ-తయాచి సైటొలపై విజయంతో పురుషుల డబుల్స్‌ టైటిల్‌దక్కించుకున్నారు.