Piers Morgan : ఫిఫా వరల్డ్ కప్ ప్రారంభానికి ముందు పోర్చుగల్ స్టార్ ఆటగాడు క్రిస్టియానో రొనాల్డో ఒక బ్రిటీష్ ఛానెల్కు ఇచ్చిన ఇంటర్వ్యూ వివాదస్పదమైన సంగతి తెలిసిందే. ఆ ఇంటర్వ్యూ చేసిన పియెర్స్ మోర్గాన్ అమెరికాలో మాట్లాడుతూ.. ఇంటర్వ్యూ అనంతరం మాంచెస్టర్ యునైటెడ్ క్లబ్తో తన జర్నీ ముగుస్తుందనే విషయం రొనాల్డోకు ముందే తెలుసు. నిజంగా చెప్తున్నా.. రొనాల్డోకు తాను ఏం మాట్లాడుతున్నాడో, దానివల్ల ఏం జరుగుతుందో ముందే తెలుసు అని మోర్గాన్ తెలిపాడు. ఆ ఇంటర్వ్యూలో రొనాల్డో తనతో ఒప్పందం చేసుకున్న మాంచెస్టర్ యునైటెడ్ క్లబ్, మేనేజర్పై తీవ్ర విమర్శలు చేశాడు.
‘మా క్లబ్ మేనేజర్ ఎరిక్ టెన్ హగ్ నన్ను గౌరవించడు. నాకు కూడా అతని మీద గౌరవం లేదు. నేను మోసపోయాను. నన్ను క్లబ్ నుంచి బయటకు పంపించాలని చూస్తున్నారు’ అని ఇంటర్వ్యూలో రొనాల్డో యునైటెడ్ క్లబ్పై తీవ్ర ఆరోపణలు చేశాడు. దాంతో, రొనాల్డోతో తమ కాంట్రాక్టు ముగిసిందని, అందుకు ఇరుపక్షాల అంగీకారం ఉందని యునైటెడ్ క్లబ్ మంగళవారం ఒక ప్రకటనలో తెలిపింది. ఫిఫా వరల్డ్ కప్లో పోర్చుగల్ 3-2గోల్స్ తేడాతో ఘనాపై విజయం సాధించింది.