సింధు ఖాతాలో హైలో టైటిల్‌

హైలో ఓపెన్‌ బ్యాడ్మింటన్‌ 500 టోర్నమెంట్‌లో భారత్‌కు ఒకేరోజు డబుల్‌ బొనాంజా. మహిళల, పురుషుల సింగిల్స్‌ టైటిల్స్‌ భారత షట్లర్లే దక్కించుకున్నారు.

• ఫైనల్‌లో కార్స్‌ఫెల్ట్‌పై ఏకపక్ష విజయం
• మెన్స్‌ విభాగంలో విజేతగా లక్ష్యసేన్‌

సార్‌బ్రూకెన్‌ (జర్మనీ): హైలో ఓపెన్‌ బ్యాడ్మింటన్‌ 500 టోర్నమెంట్‌లో భారత్‌కు ఒకేరోజు డబుల్‌ బొనాంజా. మహిళల, పురుషుల సింగిల్స్‌ టైటిల్స్‌ భారత షట్లర్లే దక్కించుకున్నారు. విమెన్స్‌ సింగిల్స్‌ టైటిల్‌ను పీవీ సింధు నెగ్గితే మెన్స్‌ కేటగిరీలో లక్ష్యసేన్‌ విజేతగా నిలిచాడు. ఈ టోర్నీలో రెండో సీడ్‌గా బరిలోకి దిగిన సింధు.. 21-12, 21-14తో డెన్మార్క్‌ షట్లర్‌ లినె కార్స్‌ఫెల్ట్‌ను వరుస గేమ్స్‌లో ఓడించి ఈ సీజన్‌లో జపాన్‌ ఓపెన్‌ తర్వాత రెండో టైటిల్‌ను తన ఖాతాలో వేసుకుంది.

39 నిమిషాల్లోనే పూర్తి ఏకపక్షంగా సాగిన ఫైనల్‌లో సింధు.. ప్రత్యర్థికి కోలుకునే అవకాశమే ఇవ్వకుండా మ్యాచ్‌ను ముగించింది. తొలి గేమ్‌లో సింధు తనదైన క్రాస్‌ కోర్టు విన్నర్లతో 8-5తో ఆధిక్యంలోకి వెళ్లింది. డెన్మార్క్‌ అమ్మాయి ర్యాలీలను పొడిగించేందుకు యత్నించినా ఆమెను నెట్‌వద్దకు తీసుకొచ్చి బోల్తా కొట్టించిన సింధు.. 17-12తో గేమ్‌ను గెలుచుకునేందుకు చేరువైంది. లినె నెట్‌ వద్ద పదే పదే తప్పులు చేస్తుండటంతో దానిని సద్వినియోగం చేసుకుని తొలి గేమ్‌ను నెగ్గిన ఆమె రెండో గేమ్‌నూ పెద్దగా కష్టపడకుండానే ముగించింది.

లక్ష్యకు తొలి టైటిల్‌

ఈ సీజన్‌లో వరుస ఓటములతో డీలాపడ్డ లక్ష్యసేన్‌ హైలో ఓపెన్‌లో సత్తాచాటాడు. మెన్స్‌ సింగిల్స్‌ ఫైనల్స్‌లో అతడు 21-17, 21-10తో ప్రపంచ ఆరో నంబర్‌ షట్లర్‌ జొనాథన్‌ క్రిస్టీ (ఇండోనేషియా)ను ఓడించి ఈ ఏడాది తొలి బీడబ్ల్యూఎఫ్‌ టైటిల్‌ను గెలుచుకున్నాడు. ఈ టోర్నీలో సేన్‌కు ఇది రెండో టైటిల్‌ కావడం విశేషం. తద్వారా హైలో ఓపెన్‌ను రెండుసార్లు గెలుచుకున్న భారత షట్లర్‌గా అతడు రికార్డులకెక్కాడు.