Visit:
ఇస్లామ‌బాద్‌: ఇండియ‌న్ బ్యాట‌ర్ సూర్య‌కుమార్ యాద‌వ్ కొడుతున్న షాట్లు క్రికెట్ ప్రేమికుల్ని అల‌రిస్తున్న విష‌యం తెలిసిందే. ఇక అత‌ను ఆడుతున్న వెరైటీ షాట్ల‌ను మాజీ క్రికెట‌ర్లు కూడా మెచ్చుకుంటున్నారు. గ్రౌండ్‌కు అన్ని వైపులా అత‌ను బాదుతున్న తీరు అంద‌ర్నీ స్ట‌న్ చేస్తోంది. వేగ‌వంత‌మైన స్ట్ర‌యిక్ రేటుతో సూర్య ఆడుతున్న వైనం పాకిస్థాన్ మాజీ క్రికెట‌ర్ షాహిద్ అఫ్రిదిని కూడా ఆక‌ట్టుకున్న‌ది.
సూర్య స్ట‌యిల్‌లా ఆడ‌డం నేర్చుకోవాల‌ని పాక్ ఓపెనింగ్ బ్యాట‌ర్ రిజ్వాన్‌కు స‌ల‌హా ఇచ్చాడు అఫ్రిది. నిజానికి రిజ్వాన్ బాగానే ఆడుతున్నా.. అత‌ని స్ట్ర‌యిక్ రేటు మాత్రం స్లోగా ఉంది. అయితే ఇటీవ‌ల సామా టీవీకి ఇంట‌ర్వ్యూ ఇచ్చిన అఫ్రిది.. యాంక‌ర్ అడిగిన ప్ర‌శ్న‌కు బ‌దులిస్తూ సూర్య బ్యాటింగ్‌ను గుర్తు చేశాడు.
సూర్య త‌ర‌హాలో రిజ్వాన్ ఆడాలా అని వేసిన ప్ర‌శ్న‌కు అఫ్రిది స‌మాధానం ఇచ్చాడు. అంత‌ర్జాతీయ మ్యాచుల్లో ఆడ‌టానికి ముందే సూర్య కుమార్ సుమారు 250 దేశ‌వాళీ క్రికెట్ మ్యాచ్‌లు ఆడి ఉంటాడ‌ని, అత‌నికి ఆట స్ట‌యిల్ తెలుసు అని, మంచి బంతుల్ని కూడా అత‌ను టార్గెట్ చేయ‌గ‌ల‌డ‌ని, ఎందుకంటే అత‌ను అలా షాట్స్‌ ప్రాక్టీస్ చేశాడ‌ని, ఈ టీ20 ఫార్మాట్‌లో బ్యాట‌ర్ అలాగే త‌న గేమ్‌ను డెవ‌ల‌ప్ చేసుకోవాల‌న్నాడు.
ఓపెన‌ర్ రిజ్వాన్ రిస్క్ తీసుకుని షాట్లు ఆడాల‌ని అఫ్రిది స‌ల‌హా ఇచ్చాడు. ఆఫ్‌సైడ్ షాట్లు కొట్టేందుకు రిజ్వాన్ ఇంకా నేర్చుకోవాల్సి ఉంద‌న్నాడు. ప్రాక్టీస్ చేస్తేనే ఆ షాట్లు ఆడే అవ‌కాశం వ‌స్తుంద‌న్నాడు. ఆఫ్‌సైడ్ ఫ్రీగా ఆడేందుకు రిజ్వాన్ ఇబ్బందిప‌డుతున్న‌ట్లు అఫ్రిది తెలిపాడు. మిడాఫ్‌, ఎక్స్‌ట్రా క‌వ‌ర్‌లో అత‌ను షాట్లు కొట్ట‌డం నేర్చుకోవాల‌న్నాడు.
