IPL | పోటీలోకి వచ్చిన లక్నో.. పంజాబ్‌పై అద్భుత విజయం

ఐపీఎల్‌లో లక్నో సూపర్‌జెయింట్స్‌ పోటీలోకి వచ్చింది. శనివారం జరిగిన మ్యాచ్‌లో లక్నో 21 పరుగుల తేడాతో పంజాబ్‌పై గెలిచింది. లక్నో నిర్దేశించిన 200 పరుగుల లక్ష్యఛేదనలో పంజాబ్‌ 5 వికెట్లకు 178 పరుగులు చేసింది.

• రాణించిన మయాంక్‌, కృనాల్‌, పూరన్‌
• ధవన్‌, బెయిర్‌స్టో పోరాటం వృథా
• చేజేతులా ఓడిన కింగ్స్‌
• లక్నో సూపర్‌జెయింట్స్‌(ఎల్‌ఎస్‌జే) అదరగొట్టింది.

రాజస్థాన్‌తో తొలి మ్యాచ్‌లో ఓటమి నుంచి త్వరగానే తేరుకున్న లక్నో..మలి మ్యాచ్‌లో పంజాబ్‌ కింగ్స్‌ను మట్టికరిపించింది. సొంత ఇలాఖాలో సమిష్టి ప్రదర్శన కనబరుస్తూ లీగ్‌లో పాయింట్ల ఖాతా తెరిచింది. డికాక్‌ అర్ధసెంచరీకి తోడు కృనాల్‌ పాండ్యా, పూరన్‌ ధనాధన్‌ ఇన్నింగ్స్‌తో పోరాడే స్కోరు అందుకున్న లక్నో..పంజాబ్‌ను కట్టడి చేయడంలో సఫలమైంది. ధవన్‌, బెయిర్‌స్టో అదిరిపోయే ఆరంభాన్నిచ్చినా..తమకు అనుకూలంగా మలుచుకోలేకపోయింది. మయాంక్‌ ధాటికివరుస విరామాల్లో వికెట్లు కోల్పోయి.. చేజేతులా మ్యాచ్‌ను చేజార్చుకుంది.

IPL | లక్నో: ఐపీఎల్‌లో లక్నో సూపర్‌జెయింట్స్‌ పోటీలోకి వచ్చింది. శనివారం జరిగిన మ్యాచ్‌లో లక్నో 21 పరుగుల తేడాతో పంజాబ్‌పై గెలిచింది. లక్నో నిర్దేశించిన 200 పరుగుల లక్ష్యఛేదనలో పంజాబ్‌ 5 వికెట్లకు 178 పరుగులు చేసింది. ఓపెనర్లు ధవన్‌ (70), బెయిర్‌స్టో(42) రాణించారు. అరంగేట్రం మ్యాచ్‌ ఆడిన మయాంక్‌ యాదవ్‌ (3/27) మూడు వికెట్లు పడగొట్టగా, మోసిన్‌ఖాన్‌ (2/34) రెండు వికెట్లు తీశాడు. తొలుత డికాక్‌(54), కృనాల్‌పాండ్యా(22 బంతుల్లో 43 నాటౌట్‌, 4ఫోర్లు, 2 సిక్స్‌లు), పూరన్‌(21 బంతుల్లో 42, 3ఫోర్లు, 3 సిక్స్‌లు) రాణించారు. ముఖ్యంగా ఆఖర్లో కృనాల్‌ సుడిగాలి ఇన్నింగ్స్‌తో లక్నో భారీ స్కోరు అందుకుంది. కరాన్‌ (3/28), అర్ష్‌దీప్‌సింగ్‌ (2/30) ఆకట్టుకున్నారు. మయాంక్‌కు ‘మ్యాన్‌ ఆఫ్‌ ద మ్యాచ్‌’దక్కింది.

ధవన్‌, బెయిర్‌స్టో రాణించినా:
లక్నో నిర్దేశించిన లక్ష్యఛేదనలో పంజాబ్‌కు ఓపెనర్లు ధవన్‌, బెయిర్‌స్టో అదిరిపోయే ఆరంభాన్ని అందించారు. లక్నో బౌలర్లను సమర్థంగా ఎదుర్కొంటూ వీరిద్దరు బౌండరీలతో విజృంభించారు. ముఖ్యంగా ధవన్‌ స్వేచ్చగా షాట్లు ఆడుతూ స్కోరుబోర్డును పరిగెత్తించాడు. అయితే ప్రభ్‌సిమ్రన్‌(19), జితేశ్‌శర్మ(6), కరాన్‌(0) నిరాశపర్చడం పంజాబ్‌ గెలుపు అవకాశాలను దెబ్బతీసింది. తన తొలి మ్యాచ్‌లోనే మెరుపు వేగంతో మయాంక్‌ యాదవ్‌..పంజాబ్‌ పతనాన్ని శాసించాడు. కండ్లు చెదిరే వేగంతో పంజాబ్‌ వికెట్లను నేలకూల్చాడు.

పూరన్‌, కృనాల్‌ మెరుపులు:
ఓపెనర్లు డికాక్‌, రాహుల్‌ ఆశించినంత మెరుగైన శుభారంభం అందించలేకపోయారు. ఓ ఎండ్‌లో డికాక్‌ ఫోర్‌తో తన పరుగుల ఖాతా తెరిస్తే..రాహుల్‌ సింగిల్‌తో మొదలుపెట్టాడు. రాహుల్‌..బెయిర్‌స్టోకు క్యాచ్‌ ఇచ్చి తొలి వికెట్‌గా వెనుదిరిగాడు. కెప్టెన్‌ పూరన్‌..చాహర్‌ను లక్ష్యంగా చేసుకుంటూ రెండు భారీ సిక్స్‌లు, ఫోర్‌తో 20 పరుగులు పిండుకున్నాడు. ఈ క్రమంలో వరుస బౌండరీలతో డికాక్‌ అర్ధసెంచరీ మార్క్‌ అందుకున్నాడు. ఆఖర్లో కృనాల్‌ పాండ్యా ఆకాశమే హద్దుగా చెలరేగడంతో లక్నో భారీ స్కోరు అందుకుంది.

సంక్షిప్త స్కోర్లు
లక్నో: 20 ఓవర్లలో 199/8(డికాక్‌ 54, కృనాల్‌ 43 నాటౌట్‌, పూరన్‌ 42, కరన్‌ 3/28, అర్ష్‌దీప్‌సింగ్‌ 2/30), పంజాబ్‌: 20 ఓవర్లలో 178/5(ధవన్‌ 70, బెయిర్‌స్టో 42, మయాంక్‌ 3/27, మోసిన్‌2/34)