ఖేలో ఇండియా పథకం విప్లవాత్మక ప్రాజెక్ట్‌

కొత్త ఖేలో ఇండియా పథకం దేశ క్రీడారంగం రూపురేఖలను మార్చే విప్లవాత్మక ప్రాజెక్ట్‌ అని దిగ్గజ షట్లర్‌ గుత్తా జ్వాల చెప్పింది. ఇలాంటి గేమ్‌ చేంజర్‌ ప్రాజెక్టు ఎప్పుడో రావాల్సిందని అభిప్రాయపడింది.

హైదరాబాద్‌, ఆట ప్రతినిధి: కొత్త ఖేలో ఇండియా పథకం దేశ క్రీడారంగం రూపురేఖలను మార్చే విప్లవాత్మక ప్రాజెక్ట్‌ అని దిగ్గజ షట్లర్‌ గుత్తా జ్వాల చెప్పింది. ఇలాంటి గేమ్‌ చేంజర్‌ ప్రాజెక్టు ఎప్పుడో రావాల్సిందని అభిప్రాయపడింది. 202631 కాలానికి అమలయ్యే ఈ పథకానికి గతంతో పోలిస్తే 8 రెట్లు అధికంగా రూ.29,054 కోట్లను కేటాయించినట్టు భారత క్రీడా ప్రాధికార సంస్థ (సాయ్‌) రీజినల్‌ డైరెక్టర్‌ విష్ణు సుధాకరన్‌ శుక్రవారం హైదరాబాద్‌లో జరిగిన మీడియా సమావేశంలో తెలిపారు. ఈ పథకం ద్వారా లబ్ధి పొందే అథ్లెట్ల సంఖ్యను 30 వేల మందికి విస్తరించాలని లక్ష్యంగా పెట్టుకున్నట్టు తెలిపారు.

ఈ సందర్భంగా మాట్లాడిన జ్వాల ప్రభుత్వ మద్దతుతోనే తాను ఈ స్థాయికి ఎదిగానని, క్షేత్రస్థాయి నుంచి క్రీడల అభివృద్ధిపై దృష్టి పెట్టడం వల్ల చిన్నారులను ఆటల వైపు పంపడానికి తల్లిదండ్రులు సురక్షితంగా భావిస్తారని అభిప్రాయపడింది. కాగా, కేంద్ర-రాష్ర్టాల పరస్పర సహకారంతో రూపుదిద్దుకున్న ఈ పథకం కింద తెలంగాణలో ఇప్పటికే 33 ఖేలో ఇండియా కేంద్రాలు, మేడ్చల్‌-మల్కాజ్‌గిరిలోని స్టేట్‌ సెంటర్‌ ఆఫ్‌ ఎక్సలెన్స్‌ ద్వారా వందలాది మంది అథ్లెట్లు శిక్షణ పొందుతున్నారు. ఈ ఏడాది చివర్లో ఖేలో ఇండియా యూత్‌ గేమ్స్‌కు తెలంగాణ ఆతిథ్యం ఇవ్వనుంది.