భారత హాకీ జట్లకు నిరాశ

ఎఫ్‌ఐహెచ్‌ ప్రో లీగ్‌లో భారత పురుషుల, మహిళల హాకీ జట్లకు నిరాశ ఎదురైంది. లండన్‌ వేదికగా ఆదివారం గ్రేట్‌ బ్రిటన్‌తో జరిగిన మ్యాచ్‌లలో భారత్‌కు ఓటమి తప్పలేదు.

లండన్‌: ఎఫ్‌ఐహెచ్‌ ప్రో లీగ్‌లో భారత పురుషుల, మహిళల హాకీ జట్లకు నిరాశ ఎదురైంది. లండన్‌ వేదికగా ఆదివారం గ్రేట్‌ బ్రిటన్‌తో జరిగిన మ్యాచ్‌లలో భారత్‌కు ఓటమి తప్పలేదు. తొలి మ్యాచ్‌లో జర్మనీని చిత్తుచేసిన పురుషుల జట్టు ఆదివారం 1-3తో బ్రిటన్‌ చేతిలో అపజయం పాలైంది.

భారత్‌ తరఫున అభిషేక్‌ ఒక్కడే గోల్‌ చేయగా బ్రిటన్‌ నుంచి నికోలస్‌ రెండు, కల్నన్‌ విల్‌ ఓ గోల్‌ చేశారు. ఇక మహిళల విభాగంలోనూ భారత్‌.. 2-3తో పరాభవాన్ని మూటగట్టుకుంది. కౌర్‌ నవ్‌నీత్‌, దేవి షర్మిల భారత్‌కు రెండు గోల్స్‌ అందించగా బ్రిటన్‌ నుంచి చార్లెట్‌ వాట్సన్‌ రెండు, పీటర్‌ ఇసాబెల్లె ఓ గోల్‌ చేసి ఆ జట్టు విజయంలో కీలకపాత్ర పోషించారు.