Visit:
Asian Indoor Championships | శత్రుదేశంగా భావించే చైనా నేలపై భారత జాతీయ గీతం మారుమోగింది. చైనాలోని టియాంజిన్ వేదికగా జరిగిన ఆసియా ఇండోర్ అథ్లెటిక్స్ ఛాంపియన్షిప్ 2026లో భారత అథ్లెట్ తేజస్విన్ శంకర్ అద్భుత ప్రతిభ కనబరిచి పురుషుల హెప్టాథ్లాన్ విభాగంలో స్వర్ణ పతకం సాధించారు. మొత్తం ఏడు ఈవెంట్లతో కూడిన ఈ పోటీలో తేజస్విన్ స్థిరమైన ప్రదర్శనతో 5993 పాయింట్లు సాధించి అగ్రస్థానంలో నిలిచారు. మెడల్ ప్రదానోత్సవ సమయంలో భారత జాతీయ గీతం ‘జనగణమన’ వినిపించడంతో అక్కడి వాతావరణం గర్వభావంతో నిండిపోయింది.ఈ విజయంతో తేజస్విన్ శంకర్ తన పాత జాతీయ రికార్డును తానే అధిగమిస్తూ కొత్త రికార్డు సృష్టించారు.
6000 పాయింట్ల మైలురాయిని చేరడానికి కేవలం 7 పాయింట్ల తేడాతో నిలిచిపోయినా, ఆసియా స్థాయిలో స్వర్ణం సాధించడం విశేషంగా నిలిచింది. రెండు రోజుల పాటు సాగిన ఈ హెప్టాథ్లాన్ పోటీల్లో 60 మీటర్ల స్ప్రింట్, లాంగ్ జంప్, షాట్పుట్, హైజంప్, 60 మీటర్ల హర్డిల్స్, పోల్ వాల్ట్, 1000 మీటర్ల రన్ వంటి విభాగాలు ఉన్నాయి. ప్రతి ఈవెంట్లోనూ తేజస్విన్ నిలకడైన ప్రదర్శన కనబరిచి పాయింట్ల పట్టికలో ముందంజలో కొనసాగారు. ముఖ్యంగా హైజంప్ విభాగంలో సాధించిన అత్యధిక పాయింట్లు ఆయన విజయానికి కీలకంగా మారాయి.
ఈ ఛాంపియన్షిప్లో భారత్కు లభించిన ఏకైక స్వర్ణ పతకం ఇదే కావడం మరింత ప్రాధాన్యతను సంతరించుకుంది. ఇప్పటికే ఆసియా క్రీడల్లో పతకాలు సాధించిన తేజస్విన్, ఇండోర్ అథ్లెటిక్స్లోనూ తన సత్తా చాటుతూ దేశానికి గౌరవాన్ని తీసుకువచ్చారు. చైనా నేలపై త్రివర్ణ పతాకం ఎగరడంతో పాటు భారత జాతీయ గీతం వినిపించడమే దేశవ్యాప్తంగా క్రీడాభిమానులను ఆనందంలో ముంచెత్తింది. ఈ విజయం భారత అథ్లెటిక్స్కు మరో గొప్ప మైలురాయిగా నిలిచింది.
