భారత్‌, ఇంగ్లండ్‌ ఆఖరి టెస్టు రీషెడ్యూల్‌

లండన్‌: కరోనా కేసుల కారణంగా భారత్‌, ఇంగ్లండ్‌ మధ్య అర్ధాంతరంగా నిలిచిపోయిన ఐదో టెస్టును వచ్చే ఏడాది నిర్వహించనున్నట్లు ఇంగ్లండ్‌ క్రికెట్‌ బోర్డు (ఈసీబీ) శుక్రవారం స్పష్టం చేసింది. ఐదు మ్యాచ్‌ల టెస్టు సిరీస్‌ కోసం ఈ ఏడాది ఇంగ్లండ్‌ వెళ్లిన టీమ్‌ఇండియా.. నాలుగు మ్యాచ్‌ల తర్వాత కరోనా కలకలంతో ఆఖరి టెస్టు ఆడకుండానే ఐపీఎల్‌ కోసం యూఏఈలో అడుగుపెట్టింది. వచ్చే ఏడాది జూలైలో పరిమిత ఓవర్ల సిరీస్‌లు ఆడేందుకు భారత జట్టు ఇంగ్లండ్‌ వెళ్లనుండగా.. అదే సమయంలో ఈ మ్యాచ్‌ను నిర్వహించాలని నిర్ణయించినట్లు ఈసీబీ తెలిపింది. ఇప్పటి వరకు జరిగిన నాలుగు మ్యాచ్‌ల్లో కోహ్లీసేన 2-1తో ఆధిక్యంలో ఉండగా.. ఆఖరి టెస్టు వచ్చే ఏడాది జూలై 1 నుంచి ఎడ్జ్‌బాస్టన్‌ వేదికగా జరుగనుంది. ‘ఇరు దేశాల బోర్డులు చర్చించుకున్న తర్వాతే అర్ధాంతరంగా నిలిచిపోయిన టెస్టు ను తిరిగి నిర్వహించాలని నిర్ణయించాం’ అని ఈసీబీ శుక్రవారం ఒక ప్రకటనలో తెలిపింది. ఈ టెస్టు అనంతరం భారత్‌, ఇంగ్లండ్‌ మధ్య జూలై 7, 9, 10న మూడు టీ20లు.. జూలై 12, 14, 17న మూడు వన్డేలు నిర్వహించనున్నట్లు పేర్కొంది.