Asian Games | హర్మన్‌ప్రీత్‌కు మరో అవకాశం.. ఆసియా క్రీడలకు 17 ఏళ్ల వికెట్‌ కీపర్..!

Asian Games : వరల్డ్‌కప్‌లో జట్టును సెమీస్ చేర్చలేకపోయినప్పటికీ హర్మన్‌ప్రీత్‌ కౌర్‌ (Harmanpreet Kaur)నే కెప్టెన్‌గా కొనసాగిస్తూ 15 మందితో కూడిన బృందాన్ని ఎంపిక చేశారు.

Asian Games : మహిళల టీ20 ప్రపంచకప్‌లో నిరాశపరిచిన భారత జట్టు మరో మెగా టోర్నీకి సిద్ధమవుతోంది. జపాన్ ఆతిథ్యమిస్తున్న ఆసియా క్రీడల్లో(Asian Games 2026) టీమిండియా బరిలోకి దిగనుంది. సెప్టెంబర్‌లో జరిగే ఈ టోర్నీ కోసం మంగళవారం సెలెక్టర్లు స్క్వాడ్‌ను ప్రకటించారు. వరల్డ్‌కప్‌లో జట్టును సెమీస్ చేర్చలేకపోయినప్పటికీ హర్మన్‌ప్రీత్‌ కౌర్‌ (Harmanpreet Kaur)నే కెప్టెన్‌గా కొనసాగిస్తూ 15 మందితో కూడిన బృందాన్ని ఎంపిక చేశారు. వీరిలో 17 ఏళ్ల వికెట్ కీపర్, బ్యాటర్ జి.కమలిని కూడా ఉంది. ఊహించినట్టుగానే ప్రపంచకప్‌లో ఘోరంగా విఫలమైన యస్తికా భాటియాపై వేటు పడింది.

వచ్చే సెప్టెంబర్‌లో జరుగబోయే ఆసియా క్రీడల కోసం భారత మహిళా సెలక్టర్లు స్క్వాడ్‌ను ప్రకటించారు. టీ20 ప్రపంచకప్‌లో టీమిండియాను సెమీస్ వరకైనా తీసుకెళ్లని హర్మన్‌ప్రీత్‌ కౌర్‌పై మరోసారి నమ్మకం ఉంచుతూ.. ఆమెనే కెప్టెన్‌గా కొనసాగించారు. వరల్డ్‌కప్‌ పోటీలకు ఎంపికైన స్క్వాడ్‌లో ఒకేఒక మార్పు చేశారు సెలెక్టర్లు. మెగా ఈవెంట్‌లో తీవ్రంగా నిరాశపరిచిన యస్తికా భాటియాను తప్పించి.. జి.కమలినికి చోటు కల్పించారు.

🚨 News 🚨

India Women’s squad announced for the 2026 #AsianGames in September.

More Details ▶️ https://t.co/JagEsizajH#TeamIndia pic.twitter.com/jJGddVSr17

— BCCI Women (@BCCIWomen) June 30, 2026

ఇటీవల ఇంగ్లండ్‌లో భారత ఏ జట్టు తరఫున కమలిని 35 పరుగులతో అజేయంగా నిలిచింది. అంతేకాదు.. అండర్‌-19 మహిళల వరల్డ్‌కప్‌లో అత్యధిక పరుగులు చేసిన మూడో బ్యాటర్‌గా నిలిచిందీ వికెట్ కీపర్ దాంతో.. దూకుడుగా ఆడగల కమలినికి ఆసియా గేమ్స్‌ స్క్వాడ్‌లోకి తీసుకున్నారు. అలానే.. కాలి మడిమ గాయంతో వరల్డ్‌కప్‌ నుంచి వైదొలిగిన శ్రేయాంక పాటిల్‌కు 15 మంది బృందంలో చోటు దక్కింది. కానీ, తుది జట్టులో ఎంపిక విషయానికొస్తే.. ఫిట్‌నెస్‌పై ఆధారపడి శ్రేయాంకను ఆడించే అవకాశముంది. నిరుడు చైనాలోని హంగ్జైలో జరిగిన ఆసియా క్రీడల్లో పసిడి పతకం కొల్లగొట్టిన టీమిండియా ఈసారి.. మళ్లీ విజేతగా నిలవాలనే కసితో ఉంది.

భారత స్క్వాడ్‌ : హర్మన్‌ప్రీత్‌కౌర్(కెప్టెన్), స్మృతి మంధాన(వైస్ కెప్టెన్), షఫాలీ వర్మ, జెమీమా రోడ్రిగ్స్, దీప్తి శర్మ, రీచా ఘోష్‌(వికెట్ కీపర్), జి.కమలిని(వికెట్ కీపర్), భారతి ఫుల్‌మాలి, శ్రీ చరణి, రేణుకా సింగ్, క్రాంతి గౌడ్, అరుంధతి రెడ్డి, శ్రేయాంక పాటిల్, రాధా యాదవ్, నందిని శర్మ.