ఉద్యోగులన్నాక ఏదో ఒక సందర్భంలో అనుకోకుండా సెలవులు పెట్టడం సహజం. అలా ప్రతి మనిషికీ జరుగుతూనే ఉంటుంది. ఒక్కోసారి సడెన్గా కొన్ని కారణాల వల్ల ఆఫీసుకు రాలేకపోవచ్చు. అలాగే ఏదో పని ఉండటంతో సెలవు పెట్టిందా హెల్త్ వర్కర్. ఆ మరుసటి రోజు ఆస్పత్రికి వెళ్లే సరికి ఆమెపై దాడికి దిగాడో వ్యక్తి.
ఈ ఘటన బిహార్లోని జాముయ్ జిల్లాలో వెలుగు చూసింది. స్థానికంగా ఉన్న ఆస్పత్రిలో ఒక మహిళ ఆక్సిలరీ నర్సుగా పనిచేస్తుంది. బుధవారం నాడు ఏదో కారణం వల్ల ఆమె ఉద్యోగానికి రాలేదు. ఆ మరుసటి రోజు అంటే గురువారం ఉద్యోగానికి వచ్చింది. అలా వచ్చినప్పుడే ఆస్పత్రికి చెందిన ఒక వ్యక్తి ఆమెతో వాగ్వాదానికి దిగాడు.
ఆమె కూడా కొంచెం గట్టిగా మాట్లాడింది. అంతే ఆమెపై దాడి చేసేందుకు ప్రయత్నించాడు. అయితే చుట్టు పక్కల వాళ్లు వెంటనే రంగంలోకి దిగి అతన్ని అడ్డుకున్నారు. ఈ విషయం తెలిసిన హెల్త్ వర్కర్లు అందరూ సదరు ఆస్పత్రి ముందు ధర్నాకు దిగారు.
వ్యాక్సినేషన్ డ్యూటీలో ఉన్న వాళ్లంతా తమ కిట్లతో సహా ఆస్పత్రి ముందు చేరి దాడికి యత్నించిన వ్యక్తిపై చర్యలు తీసుకోవాలని డిమాండ్ చేశారు. ప్రస్తుతం దేశవ్యాప్తంగా కరోనా మరోసారి వేగంగా విస్తరిస్తున్న నేపథ్యంలో వ్యాక్సినేషన్ ప్రక్రియకు ఇలా బ్రేకులు పడటం మంచిది కాదని నిపుణులు అంటున్నారు.