moto g06 power | 7000 ఎంఏహెచ్ భారీ బ్యాట‌రీతో లాంచ్ అయిన మోటోరోలా కొత్త స్మార్ట్ ఫోన్‌.. ధ‌ర రూ.7,499 మాత్ర‌మే..

ప్ర‌స్తుతం చాలా మంది స్మార్ట్ ఫోన్ వినియోగ‌దారులు భారీ బ్యాట‌రీ ఉన్న ఫోన్ల‌నే కొంటున్నారు. స్మార్ట్ ఫోన్ల‌ను గంట‌ల త‌ర‌బ‌డి ఉప‌యోగిస్తుండ‌డంతో ప్ర‌స్తుతం ఫోన్ల‌లో అందిస్తున్న బ్యాట‌రీ బ్యాక‌ప్ స‌రిపోవ‌డం లేదు.

moto g06 power | ప్ర‌స్తుతం చాలా మంది స్మార్ట్ ఫోన్ వినియోగ‌దారులు భారీ బ్యాట‌రీ ఉన్న ఫోన్ల‌నే కొంటున్నారు. స్మార్ట్ ఫోన్ల‌ను గంట‌ల త‌ర‌బ‌డి ఉప‌యోగిస్తుండ‌డంతో ప్ర‌స్తుతం ఫోన్ల‌లో అందిస్తున్న బ్యాట‌రీ బ్యాక‌ప్ స‌రిపోవ‌డం లేదు. దీంతో అధిక బ్యాట‌రీ కెపాసిటీ క‌లిగిన ఫోన్ల కోసం వారు చూస్తున్నారు. అందులో భాగంగానే కంపెనీలు కూడా అలాంటి బ్యాట‌రీలు క‌లిగిన ఫోన్ల‌నే రూపొందించి వినియోగ‌దారుల‌కు అందిస్తున్నాయి. ఈ మ‌ధ్య కాలంలో 7000 ఎంఏహెచ్ భారీ కెపాసిటీ ఉన్న బ్యాట‌రీ క‌లిగిన ఫోన్ల‌ను చాలా కంపెనీలు రిలీజ్ చేస్తున్నాయి. అదేకోవ‌లో మోటోరోలా కూడా జీ06 ప‌వ‌ర్ పేరిట ఓ నూత‌న స్మార్ట్ ఫోన్‌ను భార‌త్‌లో విడుద‌ల చేసింది. ఇందులో ఆక‌ట్టుకునే ఫీచ‌ర్ల‌ను అందిస్తున్నారు. ధ‌ర కూడా త‌క్కువ‌గానే ఉండ‌డం విశేషం.

అద్భుత‌మైన సౌండ్ క్వాలిటీ..

మోటో జీ06 ప‌వ‌ర్ స్మార్ట్ ఫోన్‌లో 6.88 ఇంచుల డిస్‌ప్లేను ఏర్పాటు చేశారు. దీనికి హెచ్‌డీ ప్ల‌స్ రిజ‌ల్యూష‌న్‌ను, 120 హెడ్జ్ రిఫ్రెష్ రేట్‌ను అందిస్తున్నారు. అందువ‌ల్ల డిస్‌ప్లే క్వాలిటీగా ఉంటుంద‌ని చెప్ప‌వ‌చ్చు. ఈ ఫోన్‌లో మీడియాటెక్ హీలియో జి81 ఎక్స్‌ట్రీమ్ ఆక్టాకోర్ ప్రాసెస‌ర్‌ను ఏర్పాటు చేశారు. 4జీబీ ర్యామ్ ల‌భిస్తుంది. ర్యామ్‌ను అద‌నంగా మ‌రో 8జీబీ వ‌ర‌కు వ‌ర్చువ‌ల్ గా పెంచుకునే వీలు క‌ల్పించారు. ఈ ఫోన్‌లో ఆండ్రాయిడ్ 15 ఆప‌రేటింగ్ సిస్ట‌మ్ ల‌భిస్తుంది. వెనుక వైపు 50 మెగాపిక్స‌ల్ మెయిన్ కెమెరా ఉండ‌గా, ముందు వైపు 8 మెగాపిక్స‌ల్ కెమెరాను ఇచ్చారు. ఈ ఫోన్‌కు గాను ఐపీ64 డ‌స్ట్ అండ్ స్ల్పాష్ రెసిస్టెన్స్ ఫీచ‌ర్‌ను అందిస్తున్నారు. డాల్బీ అట్మోస్ స‌దుపాయం కూడా ఉంది. క‌నుక సౌండ్ చాలా క్వాలిటీగా ఉంటుంది. అద్భుత‌మైన ఆడియోను ఆస్వాదించ‌వ‌చ్చు.

భారీ బ్యాట‌రీ..

ఈ ఫోన్‌కు ఉన్న ప్ర‌త్యేక ఆక‌ర్ష‌ణ ఇందులోని 7000 ఎంఏహెచ్ బ్యాట‌రీయే అని చెప్ప‌వ‌చ్చు. ప్ర‌స్తుతం చాలా వ‌ర‌కు స్మార్ట్ ఫోన్ల‌లో ఇదే త‌ర‌హా బ్యాట‌రీని అందిస్తున్నారు. క‌నుక వినియోగ‌దారుల‌కు అద్భుత‌మైన బ్యాటరీ బ్యాక‌ప్ ల‌భిస్తుంది. ఈ ఫోన్‌ను పూర్తిగా చార్జింగ్ చేస్తే క‌నీసం 3 రోజుల వ‌ర‌కు ఉప‌యోగించుకోవ‌చ్చ‌ని కంపెనీ చెబుతోంది. 1000 చార్జింగ్ సైకిల్స్ వ‌ర‌కు ఈ ఫోన్‌లోని బ్యాట‌రీ 80 శాతం మ‌న్నిక‌గా ఉంటుంద‌ని కంపెనీ తెలియ‌జేసింది. అందువ‌ల్ల చాలా ఏళ్ల వ‌ర‌కు ఎలాంటి బ్యాట‌రీ స‌మ‌స్య లేకుండా ఈ ఫోన్‌ను ఉప‌యోగించుకోవ‌చ్చు. ఇక ఈ ఫోన్‌కు గాను 18 వాట్ల ఫాస్ట్ చార్జింగ్ స‌పోర్ట్‌ను అందిస్తున్నారు. చార్జ‌ర్ ఫోన్‌తోపాటు బాక్స్‌లో ల‌భిస్తుంది. 64జీబీ స్టోరేజ్‌ను ఈ ఫోన్‌లో అందిస్తున్నారు. మెమొరీని మైక్రో ఎస్‌డీ కార్డు ద్వారా 1టీబీ వ‌ర‌కు పెంచుకునే స‌దుపాయం క‌ల్పించారు. డ్యుయ‌ల్ సిమ్‌ల‌ను వేసుకోవ‌చ్చు. ఫింగ‌ర్ ప్రింట్ సెన్సార్ ప‌క్క భాగంలో ఉంది. ఇక ఈ ఫోన్‌లో 5జి లేదు. కేవ‌లం 4జి సేవ‌ల‌ను మాత్ర‌మే ఉప‌యోగించుకోవాల్సి ఉంటుంది. డ్యుయ‌ల్ 4జి వీవోఎల్‌టీఈ, డ్యుయ‌ల్ బ్యాండ్ వైఫై, బ్లూటూత్ 6.0, యూఎస్‌బీ టైప్ సి వంటి స‌దుపాయాలను సైతం ఇందులో పొంద‌వ‌చ్చు.

ధ‌ర వివ‌రాలు..

మోటో జీ06 ప‌వ‌ర్ స్మార్ట్ ఫోన్‌ను టెండ్రిల్‌, టాపెస్ట్రీ, లారెల్ ఓక్ క‌ల‌ర్ ఆప్ష‌న్ల‌లో లాంచ్ చేశారు. ఈ ఫోన్‌కు చెందిన సింగిల్ వేరియెంట్ 4జీబీ ర్యామ్‌, 64జీబీ స్టోరేజ్ మోడ‌ల్ ధ‌ర రూ.7,499గా ఉంది. ఈ ఫోన్‌ను ఫ్లిప్‌కార్ట్‌తోపాటు మోటోరోలా ఆన్‌లైన్ స్టోర్‌లో, ఇత‌ర ఆఫ్ లైన్ స్టోర్స్‌లో అక్టోబ‌ర్ 11 నుంచి విక్ర‌యించ‌నున్నారు.