TCS | కరోనా మహమ్మారి నెమ్మదించిన అనంతరం పలు కంపెనీలు ఉద్యోగులను కార్యాలయాల బాట పట్టిస్తున్నా టెక్నాలజీ రంగంలో ఉద్యోగులు మాత్రం నూతన పాలసీకి సర్ధుబాటు కావడంలో ఇబ్బందులు ఎదుర్కొంటున్నారు. వర్క్ ఫ్రం హోం నుంచి వర్క్ ఫ్రం ఆఫీస్ పాలసీకి మారేందుకు టెకీలు విముఖత చూపుతున్నారు. ఆఫీసులకు తిరిగివచ్చేందుకు ఉద్యోగులకు సమస్యలు ఎదురవుతున్నాయని టీసీఎస్ (TCS )హెచ్ఆర్ చీఫ్ మిలింద్ లకాడ్ చెబుతున్నారు.
ఆఫీసుకు తిరిగి రావాలని కంపెనీ కోరుతుండటంతో నిరాకరిస్తూ పెద్దసంఖ్యలో మహిళా ఉద్యోగులు రాజీనామా చేస్తున్నారని కంపెనీ వార్షిక నివేదికలో లకాడ్ వెల్లడించారు. మహిళా ఉద్యోగులు ఇంటి నుంచి పనిచేసేందుకే మొగ్గుచూపుతున్నారని, వారిని ఆఫీసులకు రావాలని కోరుతుండటంతో మహిళా టెకీలు కొందరు తమ ఉద్యోగాలకు రాజీనామా చేస్తున్నారని తెలిపారు.
మహిళా ఉద్యోగుల నిష్క్రమణకు ఇదే కారణమని, వారి పట్ల ఎలాంటి వివక్ష లేదని చెప్పుకొచ్చారు. వర్క్ ఫ్రం ఆఫీస్ పాలసీని వ్యతిరేకిస్తూ ఎంతమంది మహిళా ఉద్యోగులు కంపెనీ నుంచి వైదొలిగారనే వివరాలను టీసీఎస్ వెల్లడించలేదు. సహజంగా టీసీఎస్లో మహిళల నిష్క్రమణ (అట్రిషన్) రేటు పురుషుల కంటే తక్కువగా ఉండటంతో తాజా పరిణామాలు అసాధారణమైనవని పరిశ్రమ నిపుణులు పేర్కొంటున్నారు. ఇక టీసీఎస్లో ఆరు లక్షల మందికి పైగా పనిచేస్తుండగా వీరిలో 35 శాతం మహిళా ఉద్యోగులు కాగా, వీరిలో 70 శాతం మంది కంపెనీలో ఉన్నత స్దానాల్లో ఉన్నారని టీసీఎస్ తెలిపింది.
Read More
Better.com | టెక్ ప్రపంచంలో కొనసాగుతున్న లేఆఫ్స్ : 4000 మందిపై బెటర్.కాం వేటు