Bhatukamma : ఒక్కెసి పూవేసి సందామమా..

వికారాబాద్‌ : వికారాబాద్‌ పట్టణంలోని రామయ్యగూడ ప్రాథమిక పాఠశాల ఆవరణలో వికారాబాద్‌ ఐసీడీఎస్ ప్రాజెక్టు ఆధ్వర్యంలో బుధవారం ఘనంగా బతుకమ్మ సంబురాలు నిర్వహించారు. వేడుకల్లో ప్రజా ప్రతినిధులు, అధికారులు పాల్గొని ఆడారు. బతుకమ్మ బతుకమ్మ ఉయ్యాలో.. బంగారు బతుకమ్మ ఉయ్యాలో.. అంటు మహిళలు, యువతులు ఆడి పాడారు. ఇందులో డీడబ్ల్యూవో లలితకుమారి, మున్సిపల్‌ చైర్‌పర్సన్‌ మంజుల, ఎంపీపీ చంద్రకళ ముఖ్య అతిథులుగా హాజరయ్యారు. పట్టణంలోని 25వ వార్డులోని హనుమాన్‌ దేవాలయం వద్ద పెద్ద ఎత్తున బతుకమ్మ సంబురాలు నిర్వహించారు. ఈ సంబురాల్లో వికారాబాద్‌ జిల్లా కలెక్టర్‌ నిఖీల, ఎమ్మెల్యే డాక్టర్‌ మెతుకు ఆనంద్‌, మున్సిపల్‌ చైర్‌పర్సన్‌ మంజుల మహిళలతో కలిసి బతుకమ్మ సంబురాల్లో పాల్గొన్నారు.

వివిధ రకాల పూలతో మహిళలు బతుకమ్మలను అందంగా తయారు చేసి పూజలు చేశారు. బతుకమ్మ ఆట పాటలు నిర్వహిస్తూ భక్తిశ్రద్ధలతో బతుకమ్మలను కొలిచారు. చిన్నారులు, మహిళలు బతుకమ్మ ఆడి పాడారు. అనంతరం బతుకమ్మలను సమీపంలోని కొలనులో నిమజ్జనం చేశారు. ఈ సంబురాల్లో వికారాబాద్‌, తాండూరు, పరిగి మండలాలకు చెందిన సీపీడీవోలు వెంకటేశ్వరమ్మ, రేణుక, ప్రియదర్శిణి, సూపర్‌వైజర్‌ పార్వతీ, అంగన్‌వాడీ టీచర్లు, ఆయ వార్డుల కౌన్సిలర్లు, అధికారులు, ప్రజాప్రతినిధులు పాల్గొన్నారు.