హిల్ట్‌పై బీఆర్‌ఎస్‌ పోరుబాట.. నేడు, రేపు పారిశ్రామికవాడలో కేటీఆర్‌, హరీశ్‌రావు పర్యటన

నేడు, రేపు పారిశ్రామికవాడలో కేటీఆర్‌, హరీశ్‌రావు పర్యటనగ్రేటర్‌ హైదరాబాద్‌లో హిల్ట్‌ పాలసీ పేరుతో కాంగ్రెస్‌ ప్రభుత్వం రూ.5 లక్షల కోట్ల విలువైన పారిశ్రామిక భూములను ప్రైవేట్‌ వ్యక్తులకు బదలాయించేందుకు చేస్తున్న కుట్రను అడ్డుకునేందుకు బీఆర్‌ఎస్‌ పోరు బాట పట్టింది.

సిటీ బ్యూరో, డిసెంబర్‌ 2 (నమస్తే తెలంగాణ) ; గ్రేటర్‌ హైదరాబాద్‌లో హిల్ట్‌ పాలసీ పేరుతో కాంగ్రెస్‌ ప్రభుత్వం రూ.5 లక్షల కోట్ల విలువైన పారిశ్రామిక భూములను ప్రైవేట్‌ వ్యక్తులకు బదలాయించేందుకు చేస్తున్న కుట్రను అడ్డుకునేందుకు బీఆర్‌ఎస్‌ పోరు బాట పట్టింది.నేడు బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌, మాజీ మంత్రి హరీశ్‌రావు సహా బీఆర్‌ఎస్‌ నాయకులు, ప్రజాప్రతినిధులు అన్ని పారిశ్రామిక వాడలను సందర్శించనున్నారు. బీఆర్‌ఎస్‌ అధినేత కేసీఆర్‌ ఆదేశాల మేరకు కేటీఆర్‌ సీనియర్‌ నాయకులతో కూడిన నిజ నిర్ధారణ బృందాలను నియమించారు. వారంతా నేడు, రేపు పారిశ్రామిక వాడల్లో క్షేత్రస్థాయి పర్యటనలు చేపట్టనున్నారు. ఈ మేరకు పారిశ్రామిక వాడలను 8 క్లస్టర్లుగా విభజించారు.

క్లస్టర్ల వారీగా పర్యటనలు

• క్లస్టర్‌-1లో మాజీ మంత్రి హరీశ్‌రావు నేతృత్వంలో గంగుల కమలాకర్‌, దేశపతి శ్రీనివాస్‌, మెదక్‌ ఎమ్మెల్యేల బృందం పాశమైలారం, పటాన్‌చెరు, రామచంద్రపురం ప్రాంతాలను సందర్శిస్తారు.
• క్లస్టర్‌-2లో మాజీ మంత్రి జగదీశ్‌రెడ్డి, బండారి లక్ష్మారెడ్డి, సురభివాణీదేవి, ఉప్పల్‌ నాయకులు కలిసి నాచారం, మల్లాపూర్‌, ఉప్పల్‌, చర్లపల్లి ప్రాంతాల్లో పర్యటిస్తారు.
• క్లస్టర్‌-3లో మండలి ప్రతిపక్షనేత మధుసూదనాచారి, మర్రి రాజశేఖర్‌రెడ్డి, రవీందర్‌రావు మౌలాలి, కుషాయిగూడ ప్రాంతాలను సందర్శిస్తారు.
• క్లస్టర్‌-4లో బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌, సత్యవతి రాథోడ్‌, పల్లా రాజేశ్వర్‌రెడ్డి, మాధవరం కృష్ణారావు, కేపీ వివేకానంద కలిసి జీడిమెట్ల, కూకట్‌పల్లిలో పర్యటిస్తారు.
• క్లస్టర్‌-5లో తలసాని శ్రీనివాస్‌యాదవ్‌, కాలేరు వెంకటేశ్‌, ముఠా గోపాల్‌, నవీన్‌రావు సనత్‌నగర్‌, బాలానగర్‌ ప్రాంతాలను పరిశీలిస్తారు.
• క్లస్టర్‌-6లో చామకూర మల్లారెడ్డి, శంభీపూర్‌ రాజు సహా నాయకులు మేడ్చల్‌ ఇండస్ట్రియల్‌ పార్కును సందర్శిస్తారు.
• క్లస్టర్‌-7లో సబితా ఇంద్రారెడ్డి, దేవిరెడ్డి సుధీర్‌రెడ్డి, స్వామి గౌడ్‌, మంచిరెడ్డి కిషన్‌రెడ్డి, కార్తీక్‌రెడ్డి కలిసి కాటేదాన్‌, హయత్‌నగర్‌లో పర్యటిస్తారు.
• క్లస్టర్‌-8లో మాజీ ఉపముఖ్యమంత్రి మహమూద్‌ అలీ, దాసోజు శ్రవణ్‌, ఎండీ సలీం కలిసి చందూలాల్‌ బారాదరి పారిశ్రామిక వాడలను సందర్శి స్తారు.