Visit:
నిజాంసాగర్‌/కోటగిరి/లింగంపేట/ధర్పల్లి, నవంబర్‌ 29: స్థానిక సంస్థల తొలి విడుత ఎన్నికలకు సంబంధించి నామినేషన్ల ప్రక్రియ ముగిసింది. సర్పంచ్‌, వార్డు స్థానాలకు సింగిల్‌ నామినేషన్లు మాత్రమే దాఖలు కావడంతో అక్కడ ఎన్నిక ఏకగ్రీవం కానున్నది. ఉమ్మడి జిల్లాలోని పలు గ్రామాల్లో సర్పంచ్‌లు, వార్డు సభ్యులను ఏకగ్రీవంగా ఎన్నుకోవాలని తీర్మానించుకున్నారు. అందుకనుగుణంగా ఒక్కో నామినేషన్‌ దాఖలు చేశారు. నామినేషన్ల పరిశీలన ముగిసిన అనంతరం ఏకగ్రీవ ఎన్నికపై అధికార ప్రకటన వెలువడనున్నది.
మహ్మద్‌నగర్‌ మండలంలోని తెల్గాపూర్‌ గ్రామ పంచాయతీ కార్యవర్గాన్ని స్థానికులు ఏకగ్రీవంగా ఎన్నుకున్నారు. శనివారం సమావేశమైన గ్రామస్తులు సర్పంచ్‌గా వెల్లుట్ల మేఘన, ఉప సర్పంచ్‌గా వెల్లట్లు సాయిలును ఏకగ్రీవంగా ఎన్నుకుంటూ తీర్మానించారు. అలాగే, ఐదు వార్డు స్థానాలను కూడా ఏకగ్రీవంగా ఎన్నుకుంటున్నట్లు తెలిపారు. తెల్గపూర్‌ గ్రామం గతంలో సింగీతం జీపీలో అమ్లెట్‌ గ్రామం. కేసీఆర్‌ ప్రభుత్వం తండాలను పంచాయతీలుగా మార్చిన సమయంలోనే తెల్గాపూర్‌ గ్రామాన్ని పంచాయతీగా మార్చారు. గత ఎన్నికల్లో కూడా గ్రామస్తులంతా కలిసి సర్పంచ్‌, ఉప సర్పంచ్‌తో పాటు వార్డు సభ్యులను సైతం ఏకగ్రీవంగా ఎన్నుకున్నారు.
కోటగిరి మండలంలోని రాంపూర్‌, అడ్కాస్‌పల్లి సర్పంచ్‌ స్థానాలకు ఒక్కటే నామినేషన్‌ దాఖలైంది. రాంపూర్‌ సర్పంచ్‌గా ఎస్టీ మహిళ రిజర్వ్‌డ్‌ కావడంతో అదే జీపీ పరిధిలోని రాంపూర్‌ తండాకు చెందిన విస్లావత్‌ షామ్కిబాయి ఒక్కరే నామినేషన్‌ దాఖలు చేశారు. మరోవైపు, అడ్కాస్‌పల్లి సర్పంచ్‌ అభ్యర్థిగా రెడ్డి రామకృష్ణ ఒక్కరే నామినేషన్‌ వేశారు. దీంతో ఆ ఇద్దరు ఏకగ్రీవంగా ఎన్నికైనట్లేనని గ్రామస్తులు చెబుతున్నారు.
లింగంపేట మండలం మెంగారం జీపీ పాలకవర్గాన్ని శనివారం ఏకగ్రీవంగా ఎన్నుకున్నట్లు గ్రామస్తులు తెలిపారు. సర్పంచ్‌గా కొమ్ముల మౌనిక, ఉపసర్పంచ్‌గా కళాలి బాలాగౌడ్‌, వార్డు సభ్యులుగా చౌల సుజాత, వడ్ల ప్రసాద్‌, దాసరి గంగామణి, మార్గం శ్రీనివాస్‌, నీరడి ప్రవీణ్‌, కోరంపల్లి భీమేశ్‌గౌడ్‌, కుమ్మరి మమతను ఏకగ్రీవంగా ఎన్నుకున్నట్లు తెలిపారు.
బోధన్‌, నవంబర్‌ 29: మండలంలోని మావందికలాన్‌ సర్పంచ్‌తో పాటు 8 వార్డు స్థానాలకు సింగిల్‌ నామినేషన్లు దాఖలయ్యాయి. గ్రామస్తుల సమష్టి నిర్ణయం మేరకు.. సర్పంచ్‌ స్థానానికి శకుంతల ఒక్కరే నామినేషన్‌ వేశారు. అలాగే, 8 వార్డులకు సైతం ఒక్కొక్కరే దరఖాస్తులు సమర్పించారు. దీంతో సర్పంచ్‌తో పాటు వార్డు సభ్యుల ఎన్నిక ఏకగ్రీవం కానున్నది.
రెండోవిడుత స్థానిక సంస్థల ఎన్నికలకు నామినేషన్ల పర్వం ప్రారంభం కాకముందే ధర్పల్లి మండలంలోని నడిమి తండా పాలకవర్గాన్ని ఏకగ్రీవంగా ఎన్నుకోవాలని స్థానికులు తీర్మానించుకున్నారు. నామినేషన్ల ప్రక్రియ ఆదివారం నుంచి ప్రారంభం కానుండగా, శనివారం నడిమి తండా పరిధిలోని నడిమితండా, కార్నల్‌ తండా, లక్ష్మీ చెరువు తండా, బీరప్ప తండా సహా ఐదు తండాలకు సంబంధించిన వారు సమావేశమయ్యా రు. సర్పంచ్‌గా దారావత్‌ ఖేలును, ఉపసర్పంచ్‌గా బానావత్‌ సతీశ్‌ను ఏకగ్రీవంగా ఎన్నుకోవాలని తీర్మానించుకున్నారు. ఇందుకోసం వేలం నిర్వహించినట్లు తెలిసింది. అలాగే, మండలంలోని మద్దుల్‌తండా సర్పంచ్‌గా మెగావత్‌ అరుణను ఏకగ్రీవంగా ఎన్నుకున్నట్లు తెలిసింది.
