కేసీఆర్‌తోనే తెలంగాణ సాకారం

తెలంగాణ ఉద్యమంలో లేనోడు ముఖ్యమంత్రి అయిండు, ఉప ముఖ్యమంత్రి అయిండ్రు.. పీసీసీ ప్రెసిడెంట్‌ అయిండు. అదే పోరాడి తెలంగాణ సాధించిన మాజీ ముఖ్యమంత్రి కేసీఆర్‌ మీద వీళ్లు అవాకులు, చవాకులు పేలుతుండ్రని మాజీ మంత్రి, బాల్కొండ ఎమ్మెల్యే వేముల ప్రశాంత్‌రెడ్డి మండిపడ్డారు. ఉద్యమంతో సంబంధం లేని వ్యక్తులు పాలకులుగా చలామణి అవుతుండటం తెలంగాణ ప్రజల దురదృష్టమన్నారు.

• ఉద్యమంతో సంబంధం లేనోళ్లు పాలకులు అయిండ్రు
• విద్యార్థులు బలిదానమైన రోజు మహేశ్‌గౌడ్‌ ఎక్కడున్నాడు?
• కేసీఆర్‌ని వదులుకోవడం తెలంగాణ ప్రజల దురదృష్టం
• మాజీ మంత్రి వేముల ప్రశాంత్‌రెడ్డి
• బీఆర్‌ఎస్‌ ఆధ్వర్యంలో ఘనంగా దీక్షాదివస్‌

ఖలీల్‌వాడి, నవంబర్‌ 29: తెలంగాణ ఉద్యమంలో లేనోడు ముఖ్యమంత్రి అయిండు, ఉప ముఖ్యమంత్రి అయిండ్రు.. పీసీసీ ప్రెసిడెంట్‌ అయిండు. అదే పోరాడి తెలంగాణ సాధించిన మాజీ ముఖ్యమంత్రి కేసీఆర్‌ మీద వీళ్లు అవాకులు, చవాకులు పేలుతుండ్రని మాజీ మంత్రి, బాల్కొండ ఎమ్మెల్యే వేముల ప్రశాంత్‌రెడ్డి మండిపడ్డారు. ఉద్యమంతో సంబంధం లేని వ్యక్తులు పాలకులుగా చలామణి అవుతుండటం తెలంగాణ ప్రజల దురదృష్టమన్నారు. కేసీఆర్‌ ఆమరణ దీక్షకు శనివారంతో 16 సంవత్సరాలు పూర్తయిన సందర్భంగా నిజామాబాద్‌ జిల్లా బీఆర్‌ఎస్‌ పార్టీ కార్యాలయంలో దీక్షా దివాస్‌ కార్యక్రమాన్ని ఘనంగా నిర్వహించారు.

అంతకు ముందు వినాయక్‌నగర్‌లోని అమరవీరుల స్థూపం వద్ద మాజీ మంత్రి వేముల, మాజీ ఎమ్మెల్యేలు జీవన్‌రెడ్డి, బిగాల గణేశ్‌గుప్తా, మాజీ ఎమ్మెల్సీ వీజీగౌడ్‌, పార్టీ నేతలు కలిసి నివాళులు అర్పించారు. అనంతరం బీఆర్‌ఎస్‌ పార్టీ కార్యాలయంలో తెలంగాణ తల్లి విగ్రహానికి, కేసీఆర్‌ చిత్రపటానికి పాలాభిషేకం చేశాక, దీక్షకు కూర్చున్నారు. బీఆర్‌ఎస్‌ యువజన విభాగం నేత అభిలాశ్‌రెడ్డి ఆధ్వర్యంలో రక్తదాన శిబిరం నిర్వహించారు. దీక్షాదివస్‌ కార్యక్రమంలో పలువురు ముఖ్య నాయకులు మాట్లాడారు.

తెలంగాణ సాధించిన దివ్యాస్త్రం దీక్షాదివస్‌

నాటి దీక్షాదివస్‌ తెలంగాణ సాధించిన దివ్యాస్త్రం. నేటి ప్రజావ్యతిరేక కాంగ్రెస్‌, బీజేపీలను బొందపెట్టే బ్రహ్మాస్త్రం. తెలంగాణ చరిత్రలో కేసీఆర్‌ది ఎప్పటికీ చేరిపేయలేని సంతకం. కేసీఆర్‌ ఆనవాళ్లు లేకుండా చేయడం ఎవరి వల్ల కాదు. కేసీఆర్‌ చచ్చుడో తెలంగాణ వచ్చుడో అనే నినాదంతో నవంబర్‌ 29న 2009 కేసీఆర్‌ చేపట్టిన నిరాహార దీక్ష తెలంగాణ ఉద్యమాన్ని ఉధృతం చేసింది. ఇది స్వరాష్ట్ర కల సాకారానికి పునాది పడిన రోజు. కాశ్మీర్‌ నుంచి కన్యాకుమారి వరకు దేశ రాజకీయ వ్యవస్థను 36 పార్టీలను ఒప్పించి మెప్పించి రాష్ట్రం సాధించిన గొప్ప ఉద్యమనేత కేసీఆర్‌. తెలంగాణ చెట్టు తల్లి వేరు లాంటి వారు కేసీఆర్‌. ఎవడో వచ్చి పీకేడానికి కేసీఆర్‌ మొక్క కాదు వటవృక్షం. కేసీఆర్‌ను ఏదో పీకుతామని శపథాలు చేసిన వైఎస్‌, చంద్రబాబు, కిరణ్‌కుమార్‌రెడ్డి వంటి వారే జెండాలు పీక్కోని పోయారు.

కాంగ్రెస్‌కు అధికారం ఇస్తే తెలంగాణకు మళ్లీ అదే అంధకారం వచ్చింది. చిట్టినాయుడి అరాచక పాలనలో అన్ని వర్గాల ప్రజలు అల్లాడిపోతున్నారు. కేసీఆర్‌ పదేళ్ల పాలనలో సంక్షేమంగా ఉన్న తెలంగాణ నేడు కాంగ్రెస్‌ పాలనలో సంక్షోభ తెలంగాణగా మారింది. కొడంగల్‌ ప్రజలే రేవంత్‌రెడ్డిపై తిరగబడుతుండ్రు. మూసీ పరీవాహక నివాసితులు శాపనార్థాలు పెడుతుండ్రు. రేవంత్‌రెడ్డిని తిట్టని వారెవరైనా ఉన్నారా ? బీఆర్‌ఎస్‌ది, కేసీఆర్‌ది పైటర్స్‌ ఫ్యామిలీ, రేవంత్‌ది చీటర్స్‌ ప్యామిలీ. కేసీఆర్‌ తెలంగాణ రాష్ట్రం సాధించి ఉండకపోతే రేవంత్‌ సీఎం కాదు కదా.. చెప్రాసీ కూడా అయి ఉండేవాడు కాదు. కాంగ్రెస్‌ సర్కారును బొంద పెట్టడానికి అన్ని వర్గాలు కదం తొక్కాలి. స్థానిక సంస్థల ఎన్నికల యుద్ధ్దానికి బీఆర్‌ఎస్‌ సిద్ధంగా ఉంది. కాంగ్రెస్‌, బీజేపీ పతనం కావడం, బీఆర్‌ఎస్‌ క్లీన్‌స్వీప్‌ చేయడం ఖాయం.

– జీవన్‌రెడ్డి, బీఆర్‌ఎస్‌ జిల్లా అధ్యక్షుడు

వాళ్లంతా ఉద్యమంలో ఎక్కడున్నారు?

దురదృష్టవశాత్తు తెలంగాణ ఉద్యమానికి సంబంధం లేని వారు సీఎం, పీసీసీ చీఫ్‌, ఉప ముఖ్యమంత్రి అయ్యారు. కేసీఆర్‌ ఉద్యమం చేసిన రోజు, విద్యార్థులు బలిదానమైన రోజు మహేశ్‌కుమార్‌గౌడ్‌ ఎక్కడున్నాడు? కేసీఆర్‌ దీక్షతో తెలంగాణ రాలేదా? ఆయన దీక్ష ఫలితంగానే 2009 నవంబర్‌ 9న కేంద్రం ప్రకటన చేసింది నిజం కాదా? తెలంగాణ ఏర్పాటు ప్రక్రియను ప్రారంభిస్తామని, కేసీఆర్‌ను దీక్ష విరమించమని అప్పటి హోం మంత్రి చిదంబరం ప్రకటన చేయలేదా? కేసీఆర్‌ దీక్షతో తెలంగాణ అంతా అట్టుడికింది. ఆయన గురించి మహేశ్‌కుమార్‌గౌడ్‌ అవాకులు చవాకులు పేలితే జాగ్రత్త.

సోనియాగాంధీకి ఎందుకు పూలమాలలు వేయాలి? వేలాది మంది విద్యార్థుల బలిదానాలకు కారణమైనందుకు సోనియాగాంధీకి పూలమాలలు వేయాల్న? ఒక రాష్ట్రం కోసం 11 రోజులు అన్నం నీళ్లు ముట్టకుండా ఒక నాయకుడు దీక్ష చేసి ఆయన అనుకున్నది సాధించిన రోజు. ఆ దీక్ష ప్రతిఫలమే తెలంగాణ. విద్యార్థుల ప్రాణ త్యాగం వల్లే తెలంగాణ రాష్ట్రం సాకారమైంది. తెలంగాణ రాష్ట్రం ఉనికి ఉన్నది అంటే అది దీక్షా దివస్‌తోనే. తెలంగాణ ప్రజలని మోసం చేసిన చరిత్ర కాంగ్రెస్‌ పార్టీది. రైతుబంధు, రైతుబీమా అమలు చేయకుండా, కల్యాణలక్ష్మి కింద తులం బంగారం ఇవ్వకుండా, పింఛన్లు పెంచకుండా మోసగించిన కాంగ్రెస్‌ ప్రభుత్వం.. తెలంగాణను సాధించిన కేసీఆర్‌ని విమర్శించడమా? జాగ్రత్త బిడ్డా.. మాట్లాడే ముందు తెలుసుకొని మాట్లాడు. ఇంకోసారి కేసీఆర్‌ గురించి తప్పుగా మాట్లడుతే ఖబర్దార్‌.

– వేముల ప్రశాంత్‌రెడ్డి మాజీ మంత్రి

మహేశ్‌గౌడ్‌వి మతిలేని మాటలు..

ఉద్యమ కాలంలో ఎక్కడా కనిపించని మహేశ్‌గౌడ్‌ ఇప్పుడు మతిలేని మాటలు మాట్లాడొద్దని మాజీ ఎమ్మెల్సీ వీజీగౌడ్‌ హితవు పలికారు. కేసీఆర్‌ గొప్ప పోరాట యోధుడని జడ్పీ మాజీ చైర్మన్‌ దాదన్నగారి విఠల్‌రావు అన్నారు. తెలంగాణను సాధించిన ఘనత కేసీఆర్‌దేనని మాజీ జడ్పీటీసీ బాజిరెడ్డి జగన్‌ తెలిపారు.

బీఆర్‌ఎస్‌కు వచ్చింది బ్రేక్‌ మాత్రమే..

ఉద్యమ సమయంలో కేసీఆర్‌ పిలుపుతో గల్లీ నుంచి ఢిల్లీ వరకు కదిలొచ్చింది. తెలంగాణ యూనివర్సిటీ హాస్టల్‌లో మెస్‌లని మూసి వేసి ఉద్యమాన్ని అణచివేయాలని అప్పటి పాలకులు ప్రయత్నిస్తే కేసీఆర్‌ మార్గదర్శకత్వంలో మేము అడ్డుకున్నాం. విద్యార్థులకు భోజన సదుపాయం కల్పించాం. కేసీఆర్‌ దీక్షతో ఢిల్లీ దిగొచ్చి తెలంగాణను ఏర్పాటు చేసింది. మొన్నటి అసెంబ్లీ ఎన్నికల్లో అసంబద్ధ హామీలతో, ఆరు గ్యారంటీలతో ప్రజలను మోసగించి కాంగ్రెస్‌ పార్టీ గెలిచింది. కార్యకర్తలు ఎవరూ అధైర్యపడొద్దు. బీఆర్‌ఎస్‌కు ఇది బ్రేక్‌ మాత్రమే. కేసీఆర్‌పై, పార్టీపై ప్రజల్లో రోజురోజుకూ ఆదరణ పెరుగుతున్నది. వచ్చే ఎన్నికల్లో బీఆర్‌ఎస్‌ మళ్లీ విజయం సాధిస్తుంది.

– బిగాల గణేశ్‌ గుప్తా, అర్బన్‌ మాజీ ఎమ్మెల్యే