నిలబడతానని రాసివ్వండి

కొత్త ఏడాదిలో అప్పుడే రెండో నెల పూర్తి కావస్తున్నది. ఈ ఏడాది చేసి తీరాలంటూ చాలానే విషయాలు అనుకుని ఉంటారు. మరి వాటిని సాధించేందుకు కృషి చేస్తున్నారా... లేదా అక్కడే ఆగిపోయారా?! లక్ష్యాలను చేరాలన్న ఆశ చాలామందిలో ఉన్నా అందుకు క్రమశిక్షణతో పనిచేయడంలోనే విఫలం అవుతుంటారు.

కొత్త ఏడాదిలో అప్పుడే రెండో నెల పూర్తి కావస్తున్నది. ఈ ఏడాది చేసి తీరాలంటూ చాలానే విషయాలు అనుకుని ఉంటారు. మరి వాటిని సాధించేందుకు కృషి చేస్తున్నారా… లేదా అక్కడే ఆగిపోయారా?! లక్ష్యాలను చేరాలన్న ఆశ చాలామందిలో ఉన్నా అందుకు క్రమశిక్షణతో పనిచేయడంలోనే విఫలం అవుతుంటారు. అలా కాకుండా ఉండేందుకు తాము అనుకున్నదాన్ని రాయడం ఒక మంచి ఉత్ప్రేరకంగా పనిచేస్తుందని చెబుతున్నారు మానసిక నిపుణులు. రాయడం మనతో మనం చేసుకునే ఒప్పందంలా, ఓ బాండ్‌ పేపర్‌లా పనిచేస్తుందట.

• హార్వర్డ్‌ విశ్వవిద్యాలయం నుంచి ఎంబీఏ పూర్తిచేసిన వారిలో మూడు శాతం మంది మిగతావారికంటే పదిరెట్లు ఎక్కువ సంపాదిస్తున్నారని ఫోర్బ్స్‌ పత్రిక వెల్లడించింది. వీళ్ల ప్రత్యేకత ఏంటో తెలుసా… వాళ్ల లక్ష్యాలన్నిటినీ కాగితం మీద రాసుకుంటారు. అదే తమ భవిష్యత్‌ జీవితానికి తాము ప్లాన్‌ చేసిన స్క్రిప్ట్‌ అన్నమాట!
• మనం అనుకున్న పనుల్ని సమయానికి క్రమబద్ధంగా పూర్తిచేసేందుకు మన ఆలోచనల్ని రోజూ ఒకే సమయానికి ఇష్టమైన చోట కూర్చుని నోట్సులా రాయడం అలవాటు చేసుకోవాలి.
• రోజూ కొన్ని ప్రోత్సాహాన్ని ఇచ్చే మాటలు రాసుకోవాలి. ‘నా కాళ్ల మీద నేను నిలబడగలను’, ‘నన్ను నేను ఆరోగ్యంగా మార్చుకోగలను. అందుకు నా దగ్గర తగిన ప్రణాళికలు ఉన్నాయి’ ఇలా అన్నమాట.
• పెద్ద లక్ష్యాలను చిన్నచిన్నవిగా మార్చి వాటికి సంబంధించిన ప్లాన్‌ని దగ్గర పెట్టుకోవాలి. సులభంగా పూర్తి చేయగలిగే ఆ చిన్నచిన్న లక్ష్యాల మీద ముందు దృష్టి పెట్టాలి.
• ప్రతి వారం మనం చేసిన పనుల్ని సమీక్షించుకోవడానికి కొద్ది నిమిషాల సమయం కేటాయించాలి. అనుకున్న పనులు సమయానికి పూర్తి చేసినప్పుడల్లా మిమ్మల్ని మీరు అభినందించుకోవాలి.
• రాయడం పూర్తయ్యాక మీరు మీ లక్ష్యాన్ని పూర్తి చేసినట్టు ఊహించుకొని ఆనందం పొందండి. మీరు అనుకున్నది సాధించేందుకు ఇది మానసికంగా మంచి ఆసరా అవుతుంది.