సరికొత్త ప్రయత్నం

హన్సిక మోత్వానీ ప్రధాన పాత్రలో నటిస్తున్న సినిమా ‘105 మినిట్స్‌’. రుధ్రాన్ష్‌ సెల్యూలాయిడ్‌ పతాకంపై బొమ్మక్‌ శివ ఈ చిత్రాన్ని నిర్మిస్తున్నారు. రాజు దుస్స దర్శకుడు. ఒకే షాట్‌లో, ఒకే పాత్రతో తెరకెక్కించడం ఈ సినిమా ప్రత్యేకతగా చిత్రబృందం చెబుతున్నారు. పోస్ట్‌ ప్రొడక్షన్‌ కార్యక్రమాలు పూర్తి చేసుకున్న ఈ సినిమా త్వరలో విడుదలకు సిద్ధమవుతున్నది. ఈ సందర్భంగా హన్సిక మాట్లాడుతూ…‘నా కెరీర్‌లో ఇదొక ప్రత్యేక చిత్రంగా మిగిలిపోతుంది. ప్రయోగాత్మక సినిమాలో నటించడం కొత్త అనుభూతిని కలిగించింది. విజువల్స్‌ చూశాక..చిత్రానికి పడిన కష్టం మర్చిపోయాను. సాంకేతికంగా ఆకట్టుకుంటుంది. త్వరలోనే మీ ముందుకొస్తాం’ అని చెప్పింది. ఈ చిత్రానికి సినిమాటోగ్రఫీ : దుర్గా కిషోర్‌, సంగీతం : సామ్‌ సీఎస్‌.