ఖర్చు తగ్గించినా ఆదానే!

సంపాదించిన దాంట్లో ఎంతోకొంత పొదుపు చేయాలని ప్రతి ఒక్కరూ అనుకుంటారు. అందుకు తగిన ప్రణాళికలు కూడా సిద్ధం చేసుకుంటారు. అయితే, నెలాఖరు వచ్చేసరికి అంచనాలన్నీ తలకిందులవుతాయి. పోపులపెట్టెలో కూడబెట్టిన చిల్లర కూడా వెతుక్కోవాల్సి వస్తుంది.

సంపాదించిన దాంట్లో ఎంతోకొంత పొదుపు చేయాలని ప్రతి ఒక్కరూ అనుకుంటారు. అందుకు తగిన ప్రణాళికలు కూడా సిద్ధం చేసుకుంటారు. అయితే, నెలాఖరు వచ్చేసరికి అంచనాలన్నీ తలకిందులవుతాయి. పోపులపెట్టెలో కూడబెట్టిన చిల్లర కూడా వెతుక్కోవాల్సి వస్తుంది. ఈ పరిస్థితి తలెత్తొద్దు అంటే.. ఖర్చులను నియంత్రించడం ఒక్కటే మార్గం. ఖర్చులు తగ్గించడం కూడా సంపాదనే!

ముందుగా పక్కాగా ఉండే పద్దులు ఏమిటో లిస్ట్‌ చేసుకోవాలి. ఇంటి అద్దె, పిల్లల స్కూలు ఫీజు, పాలు, వెచ్చాలు, కరెంటుబిల్లు, ఫోన్‌ రీచార్జ్‌లు ఇలా నెలవారీ ఖర్చులు ఎంతో అంచనాకు రావాలి. వీటిలో తగ్గింపులు కుదరవు. ముందుగా వీటికి కేటాయించిన సొమ్మును వేతనం నుంచి పక్కన పెట్టాలి.

కూరగాయల దగ్గర బేషుగ్గా బేరమాడొచ్చు. ఏ పూటకు ఆ పూట కాయగూరలు తెచ్చుకుంటే.. లెక్కాపత్రం ఉండదు. సమయం కూడా వృథా! అలాకాకుండా వారానికి ఒకసారి రైతుబజార్‌కో, అంగడికో వెళ్తే కాస్త తక్కువ ధరకు కాయగూరలు దొరుకుతాయి. ఎక్కువ మొత్తంలో తీసుకుంటాం కాబట్టి, డిమాండ్‌ చేసి మరీ ధరలు తగ్గించమనొచ్చు. కొసరు కూడా కొల్లగొట్టొచ్చు.

ప్రతి నెలా ఒకే బడ్జెట్‌ సూత్రాలు పాటిస్తానంటే కుదరదు. ఒక నెల పాపాయి పుట్టిన రోజు ఉండొచ్చు. మరోనెల అబ్బాయి ఇష్టపడే స్టార్‌ హీరో సినిమా విడుదల కావొచ్చు. వాటిని దృష్టిలో ఉంచుకొని నిధుల కేటాయింపు జరపాలి. బయటి ఫంక్షన్లు ఉంటే.. దగ్గరి బంధువులు అయితే తప్ప వెళ్లొద్దు.

పిల్లల పుట్టినరోజు వేడుకలు ప్రతి ఏడాదీ ఘనంగా నిర్వహించాల్సిన అవసరం లేదు. కొత్త దుస్తులు కొనిచ్చి, స్కూల్‌లో చాక్లెట్లు పంచడం వరకే పరమితం చేయండి. బంధుగణాన్నంతా పిలిచి వేడుక చేస్తే.. ఖర్చులు తడిసి మోపెడవుతాయి.