నాడు రాజభోగం.. నేడు ఆగమాగం

ఏ దేశ చరిత్ర చూసినా ఏమున్నది గర్వకారణం అన్నట్టు..రాష్ట్రంలో ఏడ సూశినా రైతుల తిప్పలు శిన్నగ లెవ్వు. ఎద్దు ఏడ్చిన వ్యవసాయం..రైతు ఏడ్చిన రాజ్యం ఎన్నటికీ బాగుపడదనేది నానుడి. ప్రస్తుతం తెలంగాణలో ఇదే పరిస్థితి నెలకొన్నది. అన్నా రైతన్నా..అన్నా కూలన్నా..ఆనాటి నవ్వులు ఏవన్నా అన్నట్టే అంత ఆగమాగమున్నది రైతన్నల హాలత్‌. కాంగ్రెస్‌ పాలన అంటేనే ఠక్కున గుర్తొచ్చేది కరెంట్‌ గోసలు.. అన్నదాతల పాలిట యమపాశాల్లా మారిన విద్యుత్తు వైర్లు..సరిపడా కరెంట్‌, సాగునీళ్లు లేక ఎండిన పంటలు చూసి ఆగిన రైతన్న గుండెలు.

ఏ దేశ చరిత్ర చూసినా ఏమున్నది గర్వకారణం అన్నట్టు..రాష్ట్రంలో ఏడ సూశినా రైతుల తిప్పలు శిన్నగ లెవ్వు. ఎద్దు ఏడ్చిన వ్యవసాయం..రైతు ఏడ్చిన రాజ్యం ఎన్నటికీ బాగుపడదనేది నానుడి. ప్రస్తుతం తెలంగాణలో ఇదే పరిస్థితి నెలకొన్నది. అన్నా రైతన్నా..అన్నా కూలన్నా..ఆనాటి నవ్వులు ఏవన్నా అన్నట్టే అంత ఆగమాగమున్నది రైతన్నల హాలత్‌. కాంగ్రెస్‌ పాలన అంటేనే ఠక్కున గుర్తొచ్చేది కరెంట్‌ గోసలు.. అన్నదాతల పాలిట యమపాశాల్లా మారిన విద్యుత్తు వైర్లు..సరిపడా కరెంట్‌, సాగునీళ్లు లేక ఎండిన పంటలు చూసి ఆగిన రైతన్న గుండెలు. ఎప్పుడొస్తుందో తెలియదు. ఎన్ని గంటలు వస్తుందో తెలియదు. అసలు వస్తుందా? రాదా? అనే ఆందోళనతో అన్నదాతలు కన్నీటి సేద్యం చేసేవారు.

రాత్రిపూట దొంగల్లా తిరిగి, రాత్రి కరెంట్‌ కోసం టార్చిలైట్లు, చద్దర్లు పట్టుకొని పొలం గట్ల వెంబడి నడుచుకొంటూ వెళ్లి బాయికాడ కావలి పండేవారు. కరెంట్‌ వచ్చినప్పుడు మోటర్లు వేసి పొలం పారిచ్చుకొనేవారు. ఈ క్రమంలో విషపురుగులు కుట్టి ఎంతోమంది కాలంజేశారు. మరికొందరు కరెంట్‌ లేక అసహనం చెంది విద్యుత్‌ తీగలు పట్టుకొని ఆత్మహత్యలు చేసుకొన్నారు. లోవోల్టేజీ సమస్యతో కాలిపోయిన మోటర్లు..పేలిపోయిన ట్రాన్స్‌ఫార్మర్లను రిపేర్‌ చేస్తూ మరికొంతమంది మృత్యువాతపడ్డారు. కరెంట్‌, సాగునీళ్లు లేక..పంటలు పండక..అప్పులు తీర్చే మార్గం తెలియక అనేకమంది బలవన్మరణాలకు పాల్పడ్డారు. ఇలా కాంగ్రెస్‌ పాలనలో అన్నదాతలు దుక్కుల దుఃఖం అనుభవించారు.

స్వరాష్ట్రంలో కేసీఆర్‌ తొమ్మిదిన్నరేండ్ల పాలనలో అన్నదాతకు కరెంట్‌ కష్టాలు దూరమయ్యాయి. 24 గంటల కరెంట్‌, జలవనరుల నిండా నీళ్లతో సాగు సంబురమైంది. రైతు ఇంట ఆనందం వెల్లివిరిసింది. ఈ తరుణంలో మళ్లీ కాంగ్రెస్‌ అధికారంలోకి వచ్చిన నాటి నుంచి రైతు కంటి నిండా నిద్ర కరువైంది. రేవంత్‌ సర్కార్‌ వ్యవసాయ రంగాన్ని నిర్లక్ష్యం చేస్తుండడంతో రైతుల గుండెల్లో గుబులు రేపుతున్నది. ఆ పాత విషాద రోజులను మళ్లీ కాంగ్రెస్‌ ప్రభుత్వం తీసుకువచ్చింది. గలగలలాడిన కాలువలు, చెరువులు మూగబోయాయి. నిండుకుండల్లాంటి జలాశయాలు బోసిపోతున్నాయి. నిన్నటిదాకా గంతులు వేసిన గంగమ్మ దాగుడు మూతలాడుతున్నది. సాగునీటి కోసం అన్నదాతలు యాతన పడుతున్నారు. పొలాల్లో ట్యాంకర్లు, బోర్ల సందడి కనిపిస్తున్నది. చెరువులు, కాలువల పూడికతీతకు క్రేన్లు తిరుగుతున్నాయి. కరెంట్‌ ఎప్పుడు వస్తుందా అని రాత్రిపూట బాయిల కాడికి పరుగులు మళ్లీ మొదలయ్యాయి.

స్వరాష్ట్రం సాధించిన తర్వాత తొలి సీఎం కేసీఆర్‌ సాగుకే పెద్దపీట వేశారు. ‘మిషన్‌ కాకతీయ’ పథకం కింద సుమారు 47 వేల చెరువులను పునరుద్ధరించారు. ప్రాజెక్టులు పూర్తిచేసి నీటి నిల్వకు మార్గం సుగమం చేశారు. కాళేశ్వరం ప్రాజెక్టుతో గోదావరి నీటిని ఎత్తిపోసి తెలంగాణకు జలాభిషేకం చేశారు. సీజన్‌కు ముందే ఎరువులు, విత్తనాలు అందుబాటులో ఉంచారు. రైతుబంధుతో పెట్టుబడి సాయం అందించారు. రైతు బీమాతో అన్నదాత కుటుంబాలకు ధీమా కల్పించారు. ధాన్యం చివరి గింజ వరకు కొంటూ డబ్బును సకాలంలో ఖాతాల్లో వేయించారు.

ఇప్పుడు రాష్ట్రంలో సాగు సడుగులిరిగాయి. నాడు దర్జాగా ఉన్న రైతుల బతుకులు ఛిన్నాభిన్నమయ్యాయి. ఈ పరిస్థితుల్లో వ్యవసాయం గుదిబండగా మారి రైతుల ఆత్మవిశ్వాసం సన్నగిల్లుతున్నది. కోతలతో రాష్ట్రంలో 20 లక్షల ఎకరాల్లో పంటలు ఎండిపోయాయని, రైతులకు రూ.25 వేల కోట్ల మేర భారీ నష్టం వాటిల్లిందని అధికారవర్గాలు చెప్తున్నాయి. కానీ, రైతులను ఆదుకొనేందుకు పంట నష్టపరిహారం చెల్లించేందుకు మాత్రం సర్కార్‌ ముందుకు రావడం లేదు. పరిహారం బాధ్యతను కేంద్రంపై నెట్టి చేతులెత్తేసే పరిస్థితి కనిపిస్తున్నది. ఆరుగాలం కష్టం చేసి పండించిన పంట కాంగ్రెస్‌ తెచ్చిన కరువుకు అర్పణమైంది. పంటనష్టంతో రైతులు విలవిల్లాడుతున్నా ప్రభుత్వంలో చలనం లేదు. పంటనష్టం, కరువుకు సంబంధించి ఇప్పటికే ముఖ్యమంత్రి రేవంత్‌రెడ్డి మూడుసార్లు సమీక్ష నిర్వహించారు. అయినా ఒక్కసారి కూడా రైతులను ప్రభుత్వం తరఫున ఆదుకుంటామనే స్పష్టమైన ప్రకటన చేయలేదు.

రైతులను ఆదుకోవాల్సిన పాలకులు సాకులు వెతుకుతున్నారు. కేసీఆర్‌ పాలనలో పండుగలా సాగిన వ్యవసాయం ఇప్పుడు అష్టకష్టాలపాలైంది. కడుపులో పెట్టుకుని కాపాడిన కేసీఆర్‌ సర్కార్‌ స్థానంలో కాళ్లల్ల కట్టెలు పెట్టే కాంగ్రెస్‌ అధికారంలోకి రావడమే ప్రస్తుత దుస్థితికి కారణమని అనడంలో ఏ మాత్రం సంశయం అవసరం లేదు. ప్రభుత్వం ఇప్పటికైనా రాజకీయ కక్షలు మాని రైతులకు ఉపశమనం కలిగించే దిశగా అడుగులు వేయకపోతే సర్కార్‌కు అన్నదాతలే ఉరితాడు బిగిస్తారనడంలో సందేహం లేదు.
(వ్యాసకర్త: బీఆర్‌ఎస్‌ రాష్ట్ర కార్యదర్శి)

కోలేటి దామోదర్‌