బీఆర్టీయూ డ్రైవర్ల ధర్నా.. పెనాల్టీ రద్దు చేసి, రేట్‌ కార్డు అమలు చేయాలని డిమాండ్‌

ట్యాక్సీ డ్రైవర్ల సమస్యలు పరిష్కరించకపోతే శంషాబాద్‌ ఎయిర్‌పోర్ట్‌ను దిగ్బంధిస్తామని బీఆర్టీయూ ట్యాక్సీ విభాగం అధ్యక్షుడు నగేశ్‌ హెచ్చరించారు. శంషాబాద్‌ ఎయిర్‌పోర్ట్‌ పార్కింగ్‌ ఏరియాలో మంగళవారం డ్రైవర్లు ధర్నా చేశారు. ఫేర్‌ ఛార్జీలు పెంచడంతో పాటు ఓవర్‌ స్టే ఛార్జీలు తగ్గించాలని ప్లకార్డులు, పోస్టర్లను ప్రదర్శించారు.

సిటీబ్యూరో, (నమస్తే తెలంగాణ) : ట్యాక్సీ డ్రైవర్ల సమస్యలు పరిష్కరించకపోతే శంషాబాద్‌ ఎయిర్‌పోర్ట్‌ను దిగ్బంధిస్తామని బీఆర్టీయూ ట్యాక్సీ విభాగం అధ్యక్షుడు నగేశ్‌ హెచ్చరించారు. శంషాబాద్‌ ఎయిర్‌పోర్ట్‌ పార్కింగ్‌ ఏరియాలో మంగళవారం డ్రైవర్లు ధర్నా చేశారు. ఫేర్‌ ఛార్జీలు పెంచడంతో పాటు ఓవర్‌ స్టే ఛార్జీలు తగ్గించాలని ప్లకార్డులు, పోస్టర్లను ప్రదర్శించారు. పోలీసులు వారిని అదుపులోకి తీసుకున్నారు. నగేశ్‌ మాట్లాడుతూ డిపార్చర్‌లో కస్టమర్‌ను డ్రాప్‌ చేసిన తర్వాత ఓవర్‌స్టే పేరుతో 8 నిమిషాలకు రూ. 500 పెనాల్టీ తక్షణమే రద్దు చేయాలని డిమాండ్‌ చేశారు.

కిలోమీటర్‌ రేట్‌ కార్డు అమలు చేయాలని కోరారు. ఓలా, ఉబర్‌, ర్యాపిడోతో పాటు ఇతర అగ్రిగేటర్‌ కంపెనీల్లో నడుస్తున్న ట్యాక్సీలకు 2022లో ప్రభుత్వం ప్రవేశపెట్టిన కిలోమీటర్‌ రేట్లకు తగ్గకుండా పెరిగిన పెట్రోల్‌, డీజిల్‌, గ్యాస్‌ ధరలు, వాహన నిర్వహణ ఖర్చులను పరిగణనలోకి తీసుకుని రేట్‌ కార్డును అమలు చేయాలన్నారు. కొత్త రేట్లను రవాణా శాఖ, కార్మిక శాఖ, జీఎంఆర్‌, ఓలా, ఉబర్‌, ర్యాపిడో ఇతర అగ్రిగేటర్‌ కంపెనీలు తక్షణమే అమలు చేయాలన్నారు. సమస్యలు ఈనెల 28లోపు పరిష్కరించకపోతే ఉద్యమిస్తామన్నారు.