సీకాయ ఉరఫ్ శికాకాయి అమ్మమ్మల సౌందర్య రహస్యం. భారతీయ ఆయుర్వేద అద్భుతం. కానీ, మార్కెటింగ్ మాయలో పడిపోయి, వాణిజ్య ప్రకటనల మత్తులో చిక్కుకుపోయి, ఇన్ఫ్లుయెన్సర్ల మాటే సత్యమని భావించి.. రసాయనాల్లో ముంచితేల్చిన ఉత్పత్తులు కొనేస్తున్నాం. ఆ షాంపూలు, సబ్బులే వాడేస్తున్నాం. అయినా కేశ సౌందర్యాన్ని కాపాడుకోవడం ‘తల’కు మించిన భారం అవుతున్నది. ఆఫీసులో, క్యాంటీన్లో, రోడ్డు మీద, మెట్రో స్టేషన్లో.. ఆ ఉక్కపోతకు మనకు తెలియకుండానే చెమటలు పట్టేస్తాయి.
ఒంటి మీదే కాదు.. తలలోనూ! చుండ్రు సమస్యకు ఇదే కారణం. మార్కెట్లో దొరికే సౌందర్య సాధనాలు చాలా సందర్భాల్లో తాత్కాలిక పరిష్కారం చూపుతాయి. వాడటం ఆపేయగానే.. మళ్లీ ఇబ్బంది మొద లవుతుంది. ఇలాంటి సమస్యలకు తిరుగులేని పరిష్కారం సీకాయ. ఇది తలలో పేరుకుపోయిన ధూళిని, వ్యర్థాలను శుభ్రంగా వదలగొడుతుంది. అకాల నెరుపు, చుండ్రు, జుట్టు చిట్లిపోవడం.. తదితర ఇబ్బందులకు ఔషధంలా పనిచేస్తుంది. మాడును చల్లగా ఉంచుతుంది. ఇందులో యాంటీఆక్సిడెంట్లు, విటమిన్లు పుష్కలం. కాబట్టే కేశాల పెరుగుదలను ప్రోత్సహిస్తుంది, జుట్టుకు కొత్త మెరుపు ఇస్తుంది. పేలు జొరబడకుండా నిరోధిస్తుంది. వారానికి ఒక్కసారి వాడి చూడండి చాలు. తేడా మీకే తెలుస్తుంది.