ఫిబ్రవరి 11.. ఉదయం 11:11.. గెట్ రెడీ పునీత్ రాజ్‌కుమార్ ఫ్యాన్స్

February 7, 2022 / 09:52 PM IST

Puneeth Rajkumar | కన్నడ పవర్ స్టార్ పునీత్ రాజ్‌కుమార్ చనిపోయి 100 రోజులు దాటిపోయింది.. కానీ ఇప్పటికీ కర్ణాటకలో ఆయన మరిచిపోలేకపోతున్నారు అభిమానులు. ఆయన మరణం తట్టుకోలేక దాదాపు 20 మందికి పైగా అభిమానులు చనిపోయారు. కన్నడ ఇండస్ట్రీలో 100 కోట్ల మార్కెట్ ఉన్న హీరో ఒక్కసారిగా అలా అర్ధాంతరంగా మరణించడంతో అంతా నిర్ఘాంతపోయారు. ఇప్పటికీ ఆ షాక్‌లో నుంచి బయటికి రాలేకపోతున్నారు. రోజూ సోషల్ మీడియాతో పునీత్ స్మరణ చేస్తూనే ఉన్నారు.

పునీత్ చేసే ఒక సినిమా బడ్జెట్ 40 నుంచి 50 కోట్ల మధ్యలో ఉంటుంది. చనిపోయే సమయంలో కూడా చేతిలో రెండు సినిమాలు ఉన్నాయి. ఒకటి జేమ్స్ రెండోది ద్విత్వ. ఇందులో జేమ్స్ షూటింగ్ మరో 10 రోజులు బాకీ ఉందన్నపుడు ఆయన చనిపోయాడు. దాంతో ఎలాగోలా టెక్నాలజీ ఉప‌యోగించి సినిమా షూటింగ్ పూర్తి చేశారు. ఇందులో బాడీ బిల్డర్‌గా నటించాడు పునీత్. ఈ సినిమా కోసమే కొన్ని రోజులుగా కష్టపడ్డాడు ఈయన. గంటలు గంటలు జిమ్‌లోనూ వర్కవుట్స్ చేశాడు. ఈ సమయంలోనే ఆయన ప్రాణాలు కోల్పోయాడు. జేమ్స్ సినిమా బడ్జెట్ దాదాపు 60 కోట్లు. ఈ సినిమాను చేతన్ కుమార్ తెరకెక్కిస్తున్నాడు. ఇప్పుడు ఈ సినిమా నుంచి అదిరిపోయే అప్‌డేట్ ఇచ్చారు దర్శక నిర్మాతలు. మొన్న జనవరి 26న జేమ్స్ ఫస్ట్ లుక్ విడుదల చేశారు. దీనికి మంచి రెస్పాన్స్ వచ్చింది. పునీత్ ఫోటోలకు పాలాభిషేకాలు చేశారు ఫ్యాన్స్. థియేటర్స్ ముందు బ్యానర్లు కట్టి పండగ చేసుకున్నారు. ఇప్పుడు జేమ్స్ టీజర్ విడుదలకు ముహూర్తం ఖరారైంది. ఫిబ్రవరి 11.. ఉదయం 11:11 టీజర్ విడుదల కానుంది. దాంతో పవర్ స్టార్ అభిమానులు ఎమోషనల్ అవుతున్నారు.

తన అభిమాన హీరో పునీత్ నటించిన చివరి సినిమా ఎలా ఉండబోతోందో చూడాలని ఫ్యాన్స్ ఆసక్తిగా ఎదురు చూస్తున్నారు. ఈ సినిమాలో పునీత్ రాజ్‌కుమార్ పాత్రకు ఆయన అన్నయ్య శివ రాజ్ కుమార్ డబ్బింగ్ చెప్తున్నాడు. ఇప్పటికే డ‌బ్బింగ్ కార్య‌క్ర‌మాల‌ను శివన్న పూర్తి చేశాడు కూడా. టాలీవుడ్ హీరో శ్రీకాంత్ ఇందులో విలన్‌గా నటించడం విశేషం. సినిమాను మార్చి 17 పునీత్ రాజ్ కుమార్ జయంతి సందర్భంగా విడుదల చేయాలని సన్నాహాలు చేస్తున్నారు. కేవలం కన్నడలో మాత్రమే కాకుండా తెలుగు, తమిళ, మలయాళ, హిందీ భాషల్లో కూడా ఈ సినిమా విడుదల కానుంది.

Follow us on Google News, Facebook, Twitter , Instagram, Youtube