న్యూఢిల్లీ, నవంబర్ 25: దేశంలో కొన్ని ప్రధాన నగరాలకంటే హైదరాబాద్లో ఆఫీస్ స్పేస్ ఫిట్-అవుట్ (స్పేస్ను వివిధ ఫిట్టింగ్స్తో ఆఫీస్గా మార్చడం) వ్యయం తక్కువగా ఉందని రియల్టీ సర్వీసుల సంస్థ జేఎల్ఎల్ ఇండియా పేర్కొంది. జేఎల్ఎల్ ఆసియా పసిఫిక్ ఫిట్-అవుట్ కాస్ట్ గైడ్ 2021-22 ప్రకారం ముంబై నగరంలో చదరపు మీటరుకు ఫిట్అవుట్ వ్యయం రూ. 61,050కాగా, హైదరాబాద్లో ఇది రూ.53,850గా ఉంది. అయితే ముడిపదార్థాల ధరలు పెరగడంతో ఈ సంవత్సరం ఆఫీస్ స్పేస్ ఫిట్-అవుట్ వ్యయాలు 8 శాతం అధికమయ్యాయని జేఎల్ఎల్ తెలిపింది. కొవిడ్-19తో సరఫరా ఆటంకాలు, లేబర్ కొరత సైతం ఫిట్-అవుట్ వ్యయాల పెరుగుదలకు కారణమైనట్లు జేఎల్ఎల్ గురువారం విడుదల చేసిన ప్రకటన పేర్కొంది. పలు సంస్థలు వాటి కార్యాలయాల్ని పునర్ప్రారంభిస్తున్న నేపథ్యంలో ఆఫీస్ ఫిట్-అవుట్స్ వ్యయాలు మరింత పెరగవచ్చని అంచనా వేస్తున్నట్లు జేఎల్ఎల్ ఇండియా ఎగ్జిక్యూటివ్ మేనేజింగ్ డైరెక్టర్ ఎంవీ హరీష్ తెలిపారు.