13న మరో అల్పపీడనం.. తెలంగాణ, ఏపీకి వర్ష సూచన

బంగాళాఖాతంలో మరో అల్పపీడనం ఏర్పడే అవకాశం ఉందని వాతావరణశాఖ వెల్లడించింది. ఈ నెల 13న ఆగ్నేయ బంగాళాఖాతంలో అల్పపీడనం ఏర్పడవచ్చని అంచనా వేస్తున్నది.

హైదరాబాద్‌, నవంబర్‌ 9 (నమస్తే తెలంగాణ) : బంగాళాఖాతంలో మరో అల్పపీడనం ఏర్పడే అవకాశం ఉందని వాతావరణశాఖ వెల్లడించింది. ఈ నెల 13న ఆగ్నేయ బంగాళాఖాతంలో అల్పపీడనం ఏర్పడవచ్చని అంచనా వేస్తున్నది. దీని ప్రభావంతో తెలంగాణ, ఆంధ్రప్రదేశ్‌తోపాటు యానాం ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని వాతావరణశాఖ తెలిపింది. అల్పపీడనం ఏర్పడిన తర్వాత దాని కదలిక, తీవ్రత ఆధారంగా వర్షాల ప్రభావంపై మరింత స్పష్టత వచ్చే అవకాశం ఉంది. మరోవైపు తెలంగాణలో చలి తీవ్రత క్రమంగా పెరుగుతున్నది.

ఈశాన్య దిశ నుంచి వీస్తున్న పొడిగాలుల ప్రభావంతో రాత్రి ఉష్ణోగ్రతలు తగ్గుతున్నాయి. హైదరాబాద్‌లో కనిష్ఠ ఉష్ణోగ్రతలు 17 నుంచి 19 డిగ్రీల సెల్సియస్‌ మధ్య నమోదవుతున్నాయి. రాజేంద్రనగర్‌, శంషాబాద్‌, మేడ్చల్‌, ఘట్‌కేసర్‌ వంటి పలు ప్రాంతాల్లో ఉదయం వేళ పొగమంచు దర్శనమిస్తున్నది. ఆదిలాబాద్‌, కుమ్రం భీం ఆసిఫాబాద్‌, నిర్మల్‌, నిజామాబాద్‌, సంగారెడ్డి ప్రాంతాల్లో కనిష్ఠ ఉష్ణోగ్రతలు 14 నుంచి 16 డిగ్రీల మధ్య నమోదవుతున్నాయి. ఏజెన్సీ ప్రాంతాల్లో సాధారణం కంటే 2 నుంచి 3 డిగ్రీలు తకువ ఉష్ణోగ్రతలు నమోదవుతున్నట్టు వాతావరణ గణాంకాలు సూచిస్తున్నాయి. ప్రజలు వాతావరణ శాఖ హెచ్చరికలు గమనించాలని, చలి, పొగమంచు, ఆకస్మిక వర్షాల నేపథ్యంలో అప్రమత్తంగా ఉండాలని నిపుణులు సూచించారు.