Visit:
హైదరాబాద్, సెప్టెంబర్ 23 (నమస్తే తెలంగాణ): ఆదిలాబాద్లోని రిమ్స్ దవాఖానలోని ఎన్ఐసీయూ వార్డులో చికిత్స పొందుతున్న పసికందులు దురదృష్టవశాత్తు ప్రాణాలు కోల్పోవడం అత్యంత బాధాకరమని బీఆర్ఎస్ వర్కింగ్ ప్రెసిడెంట్ కేటీఆర్ విచారం వ్యక్తంచేశారు. దాదాపు 25 మంది అప్పుడే పుట్టిన చిన్నారులు ఉన్న వార్డులో ఇలాంటి దారుణ ఘటన చోటుచేసుకోవడం ప్రభుత్వ వైఫల్యానికి, దవాఖాన యాజమాన్యం నిర్లక్ష్యానికి నిదర్శనమని ఆగ్రహం వ్యక్తం చేశారు.
పసిపిల్లల ప్రాణాలు కాపాడాల్సిన వార్డులోనే ఈ ప్రమాదం జరగడంపై ప్రభుత్వం సిగ్గుతో తలదించుకోవాలని ధ్వజమెత్తారు. దవాఖానలోని తీవ్ర లోపాలు, నిర్లక్ష్యమే ఇందుకు కారణమని మండిపడ్డారు. ఈ ఘోరానికి కారకులైన బాధ్యులందరిపై సమగ్ర విచారణ జరిపి తక్షణమే కఠిన చర్యలు తీసుకోవాలని ప్రభుత్వాన్ని డిమాండ్ చేశారు.
ఈ ప్రమాదం తెలిసిన వెంటనే తమ పార్టీకి చెందిన సీనియర్ నాయకులు, మాజీ మంత్రులు ఘటనా స్థలానికి వెళ్లి పరిస్థితిని సమీక్షించినట్టు కేటీఆర్ తెలిపారు. చనిపోయిన ఒకో చిన్నారి కుటుంబానికి బీఆర్ఎస్ పార్టీ తరఫున లక్ష రూపాయల ఆర్థిక సాయం అందిస్తున్నట్టు ప్రకటించారు. రాష్ట్ర ప్రభుత్వం కూడా మానవతా దృక్పథంతో స్పందించి, మృతి చెందిన పిల్లల కుటుంబాలకు రూ.25 లక్షల చొప్పున పరిహారం చెల్లించాలని, ఘటనపై పూర్తిస్థాయి విచారణ జరిపించాలని ప్రభుత్వాన్ని కోరారు.
