హనుమకొండ సబర్బన్, నవంబర్ : జనగామకు చెందిన కేమిడి రవి అలియాస్ రమేశ్ది నిరుపేద కుటుంబం. నిత్యం హమాలీ పనిచేస్తే గానీ కుటుంబం గడువదు. ధాన్యాన్ని ట్రాక్టర్లలో లోడ్ చేసేందుకు రోజూ తోటి కూలీలతో కలిసి వరి కల్లాల్లోకి వెళ్లేవాడు. అయితే ట్రాక్టర్లో వడ్లు లోడ్ చేయడం ఒక ఎత్తయితే బస్తాలు కూలిపోకుండా తాడు బిగించడం మరో పని. అందరూ కలిసి తాడు గట్టిగ కట్టినా కొంతదూరం వెళ్లగానే వదులై ఒక్కోసారి బస్తాలు కూలిపోతుంటాయి. అప్పుడు మళ్లీ లోడ్ చేసి తాడు కడితే గానీ ఆ బండి గమ్యం చేరదు. మరి దూరప్రాంతాలకు వెళ్లే లారీల పరిస్థితి ఏమిటని రవికి వచ్చిన ఆలోచనే అతడికి కొత్త ఉపాధి చూపింది. దీంతో వరంగల్కు మకాం మార్చి ఓ 30మందికి పని ఇప్పిస్తూ ‘మేస్త్రీ రవన్న’ అయిపోయాడు.
పనిచేయాలనే సంకల్పం ఉండి, అందుకు కొంత చాతుర్యాన్ని ప్రదర్శిస్తే చాలు విజయం మన సొంతమవుతుందనేందుకు రవి ఉదంతమే మంచి ఉదాహరణ. ఎవరూ ఉహించని తాడు కట్టే పనిని ఎంచుకుని రెండు దశాబ్దాలుగా ఎదురులేకుండా సాగిపోతున్నాడు. ఇప్పుడు అతడి వద్ద సుమారు 30మంది వరకు పనిచేస్తున్నారు. హసన్పర్తి మండలం ఎస్సార్ యూనివర్సిటీ వద్ద, నగర శివారులోని మామునూరు వద్ద, వరంగల్ వ్యవసాయ మార్కెట్లలో ఈ తాడు కట్టేందుకు అడ్డాలు ఏర్పాటుచేసుకున్నాడు. ఒక్కో లారీకి పెద్దదైతే రూ.1400, చిన్నదైతే రూ.1300ల చొప్పున లారీల యజమానులు చెల్లిస్తారు.
మూడు నెలలు తీరుబడి లేకుండా..
రవి ప్రారంభించిన తాడు కట్టే పని ఎప్పటికీ ఉన్నా.. ఏడాదిలో మూడు నెలలు మాత్రం విపరీతంగా ఉంటుంది. ముఖ్యంగా ఏప్రిల్, మే, జూన్ నెలల్లో ఎక్కువగా లారీలు లోడ్ వేసుకుని సరుకులను తరలిస్తుంటాయి. మన రాష్ట్రంలో వరంగల్ మార్కెట్తో పాటు మాహబూబాబాద్, ఖమ్మం, వైరా, తల్లాడ.. ఆంధ్రప్రదేశ్లోని గుంటూరు, విజయవాడ ప్రాంతాల నుంచి మిర్చి, పత్తిని లోడ్ లారీలు ఢిల్లీ, నాగ్పూర్, అకోలా, అహ్మదాబాద్, ఉత్తరప్రదేశ్, పశ్చిమ బెంగాల్లోని కలకత్తా లాంటి ప్రాంతాలకు నిత్యం వందలాదిగా వెళ్తుంటాయి. ఈ తాడు కట్టే వాళ్ల అడ్డాలు లారీల డ్రైవర్లు ముందుగానే తెలుసుకుని వారితో ఫోన్లో టచ్లో ఉంటారు. ఆయా లారీ ట్రాన్స్పోర్టు కంపెనీల యజమానులు కూడా వీరి సమాచారం ఇతర రాష్ర్టాల లారీ డ్రైవర్లకు ఇస్తుంటారు.
ఒక్కో లారీకి గంట పని
లారీ లోడ్కు తాడు కట్టుడు అంటే పది నిమిషాల్లో నలుగురు కలిసి అటో ఇద్దరు, ఇటో ఇద్దరు ఉండి హైసా, హైసా అంటూ తాడు గుంజుడు కాదు. ఈ లారీల తాడు కట్టుడు కూడా కళాత్మకంగానే ఉంటుంది. నైపుణ్యం ఉంటేనే ఈ పని చేయగలుగుతారు. వేల కిలోమీటర్ల మేర ప్రయాణం ఉంటుంది కనుక ఏమాత్రం అజాగ్రత్త చేసినా ఎక్కడో ఓ చోట బస్తాలు కూలిపోతాయి. ఒక్కో లారీకి తాడును బిగించాలంటే గంట పడుతుంది. వర్షం వచ్చినా నీళ్లు లోపలికి వెళ్లకుండా వేయాల్సి ఉంటుంది. ఒక్కోసారి గాయాల పాలవుతారు కూడా. అయినా అత్యంత జాగ్రత్తతో పని పూర్తిచేస్తారు.
సరుకు ఏదైనా సరే లోడ్ అయిన తర్వాత వారు ఎక్కడికి కిరాయి మాట్లాడుకున్నరో అక్కడికి క్షేమంగా చేర్చాల్సిన బాధ్యత లారీ యజమానులదే. ఈ క్రమంలో దూర ప్రాంతాలకు వెళ్లేటప్పుడు మార్గమధ్యంలో తాడు పట్టుతప్పితే బస్తాలు మొత్తం కూలిపోతాయి. ఏ అడవిలోనే, ఊరు అవతలో ఇలా జరిగితే ఇంకేముంది సరుకంతా దొంగల పాలే. అక్కడ కూడా హమాలీలు దొరక్క మళ్లీ లోడ్ చేసేందుకు రోజులు కూడా పట్టొచ్చు. అందుకే నిర్ణీత సమయంలో గమ్యం చేరేందుకు లారీకి తాడును గట్టిగ కట్టుకున్న తర్వాతే బయల్దేరుతారు. ఎంతో టెక్నిక్తో చేసే పనినే వృత్తిగా మలుచుకున్నాడు రవి.
మంచిగ కట్టినంకనే బండి తీస్తం..
నేను లారీని గుజరాత్కు తీసుకెళ్లాలి. చాలా మార్గాల్లో ప్రయాణించాల్సి ఉంటుంది. అడవిల్లోంచి కూడా వెళ్లాలి. అలాంటి ప్రదేశాల్లో తాడు వదులై లోడ్ కూలిపోతే మేం పడే ఇబ్బంది అంతా ఇంతా కాదు. సరుకును దొంగలు ఎత్తుకపోతరు. అందుకే ఇక్కడ ముందుగా తాడు గట్టిగ కట్టించినంకనే బయలుదేరుతం.
టెక్నిక్తో చేయాలె..
నేను ఇరవై యేండ్ల కింద ఈ తాడు కట్టే పని మొదలుపెట్టిన. ఇప్పటివరకు మంచిగ నడుస్తాంది. మొదట్ల లారీకి రూ.100, 150 ఇచ్చేది. తాడు కట్టుట్ల ఓ టెక్నిక్ ఉంటది. అది నేను పని జేసుకుంటనే నేర్చుకున్నా. లారీల ఓనర్లందరు నా మీద నమ్మకంతో పని ఇస్తరు. అప్పుడు ఇద్దరు, ముగ్గురమే చేసేది. ఇప్పుడు 30 మందికి పని ఇప్పిస్తున్నందుకు సంతృప్తిగా ఉంది.
14 ఏండ్ల సంది జేత్తున్న..
నేను 14 యేండ్ల సంది గీ పని జేత్తున్న. వీటితో వచ్చే పైసలతోటే నా కుటుంబాన్ని సాదుకుంటున్న, పిల్లల్ని మంచిగ సదివించుకుంటాన. మేం లారీలకు తాళ్లు మంచిగ కడితెనే ఇక్కన్నుంచి వేరే రాష్ర్టాలకు బయలుదేరుతయ్. వానకాలం మాత్రం ఎక్కువ లారీలు రావు. కొన్ని నెలలు బాగానే ఉంటుంది. సీజన్ లేని టైమ్ల కొంచెం ఇబ్బంది అయితది.