కాలీఫ్లవర్‌ పంట ఎండలో మాడిపోకుండా కాపాడుకోండి ఇలా..

పగటి ఎండ తగలడం వల్ల కాలీఫ్లవర్‌ రంగు మారుతున్నది. దీనివల్ల నాణ్యత లోపించి, మార్కెట్‌లో అనుకున్న ధర రావడం లేదు. ఈ సమస్యకు పరిష్కారం చెప్పండి. – రామమూర్తి, నల్గొండ.

కాలీఫ్లవర్‌ శీతాకాలపు కూరగాయ పంట. వీటి పువ్వులకు ఆకులే రక్షణగా ఉంటాయి. కానీ, కొన్ని రకాల్లో పువ్వులు బయటికి వస్తాయి. దీనివల్ల పగటి ఎండ నేరుగా పువ్వుపైనే పడుతుంది. ఫలితంగా, తెల్లగా ఉండాల్సిన పువ్వు పసుపు లేదా ఊదా రంగులోకి మారిపోతుంది. దీనిని నివారించేందుకు వాతావరణం వేడిగా ఉన్నప్పుడు పువ్వుపైన సూర్యరశ్మి నేరుగా పడకుండా ఆకులతో కప్పి ఉంచాలి. చల్లని వాతావరణంలో కోతకు వచ్చేలా కాలీఫ్లవర్‌ సాగులో మార్పులు చేసుకోవాలి. ఆకుల మధ్యలో పువ్వులు ఇమిడిపోయే రకాలు, నారింజ లేదా ఆకుపచ్చని రంగు పువ్వులనిచ్చే రకాలను సాగు చేసుకొంటే మంచిది. నీటి తడులను సక్రమంగా అందించడం ద్వారా కూడా ఈ సమస్యను అధిగమించవచ్చు.