Ravana Dahan | రావణుడిని దహనం చేయని ఊరు.. ఈ శివాలయం వెనుక కథేంటి?

Ravana Dahan | దసరా నాడు రావణుడి దిష్టిబొమ్మలను దహనం చేయడం అనేక ప్రాంతాల్లో ఆనవాయితీ. అయితే హిమాచల్‌ప్రదేశ్‌లోని కాంగ్రా జిల్లాలో ఉన్న బైజ్‌నాథ్‌ పట్టణం మాత్రం రావణ దహనం నిర్వహించరు

Ravana Dahan | దేశవ్యాప్తంగా దసరా పండుగను చెడుపై మంచి సాధించిన విజయానికి ప్రతీకగా జరుపుకుంటారు. ఈ సందర్భంగా రావణుడి దిష్టిబొమ్మలను దహనం చేయడం అనేక ప్రాంతాల్లో ఆనవాయితీ. అయితే హిమాచల్‌ప్రదేశ్‌లోని కాంగ్రా జిల్లాలో ఉన్న బైజ్‌నాథ్‌ పట్టణం మాత్రం రావణ దహనం నిర్వహించరు. దీనికి కారణం అక్కడి పురాతన శివాలయం, రావణుడికి సంబంధించిన స్థానిక విశ్వాసాలే.

రావణుడి శివభక్తితో ముడిపడిన కథ

హిమాచల్ ప్రదేశ్ ప్రభుత్వానికి చెందిన కాంగ్రా (Kangra) జిల్లా అధికారిక వెబ్‌సైట్‌లో ఈ ఆలయం వెనుక ఉన్న చరిత్ర, స్థల పురాణం వివరించారు. దాని ప్రకారం.. శివుడిని ప్రసన్నం చేసుకునేందుకు రావణుడు హిమాలయాల్లో ఘోర తపస్సు చేశాడని చెబుతారు. పరమేశ్వరుడి అనుగ్రహం పొందాలనే సంకల్పతో రావణుడు తన తలలను ఒక్కొక్కటిగా సమర్పించేందుకు సిద్ధపడ్డాడు. దీంతో అతని అచంచల భక్తికి మెచ్చిన శివుడు ప్రతక్షమైన వరాలను ప్రసాదించాడు.. అప్పుడు శివుడిపై ఉన్న భక్తితో ఆయన్ను తన రాజ్యమైన లంకకు తీసుకెళ్లాలని రావణుడు కోరుకున్నాడు.. రావణుడి ఆ కోరిక మేరకు శివుడు లింగరూపంలో అతనితో వెళ్లేందుకు అంగీకరించాడు. అయితే ఆ ప్రయాణంలో శివలింగాన్ని ఎక్కడా నేలపై ఉంచకూడదని పరమేశ్వరుడు షరతు విధించాడు.

అలా బయల్దేరిన సమయంలో మార్గమధ్యలో రావణుడికి తీవ్ర లఘుశంక(మూత్రవిసర్జన) కలగడంతో ఆ లింగాన్ని పట్టుకోమని గొర్రెల కాపరి రూపంలో అక్కడకు వచ్చిన వినాయకుడికి ఇచ్చాడు. కానీ రావణుడు వెళ్లిన కొద్దిసేపటికే ఆ లింగం విపరీతమైన బరువుగా మారిపోయిందని నటిస్తూ వినాయకుడు బైజనాథ్‌లోని నేలపైనే ఉంచేశాడు. రావణుడు తిరిగి వచ్చి చూసేసరికి ఆ లింగం అక్కడే భూమిలో స్థిరపడిపోయింది. రావణుడు తన సర్వశక్తులు ఉపయోగించి దానిని పైకి లేపడానికి ప్రయత్నించినా అది కదల్లేదు. తాను మోసపోయానని గ్రహించిన రావణుడు తీవ్ర నిరాశతో, పశ్చాత్తాపంతో లంకకు తిరిగి వెళ్లిపోయాడు. రావణుడు ఆత్మలింగాన్ని ఉంచిన ఆ పవిత్ర స్థలంలోనే ఈనాటి బైజనాథ్ మహాదేవ్ ఆలయం నిర్మితమైంది. ఈ పౌరాణిక నేపథ్యం కారణంగా బైజనాథ్ పట్టణంలో రావణుడిని శివభక్తుడిగా గౌరవిస్తారు. అందుకే ఇక్కడ దసరా పండుగ రోజున రావణ దహనం చేయరు.