తిరువనంతపురం, మే 11: కేరళలోని పలు దక్షిణ జిల్లాల్లో ఇటీవల ‘టమాటా ఫ్లూ’ వైరస్ వెలుగుచూసింది. ఐదేండ్ల లోపు వయసున్న 80 మంది చిన్నారుల్లో ఈ వైరస్ను గుర్తించారు. చర్మంపై ఎర్రగా దద్దుర్లు రావడం ఈ జ్వర ప్రత్యేక లక్షణం. డీహైడ్రేషన్, దగ్గు, జలుబు, డయేరియా వంటి లక్షణాలూ కనిపిస్తాయి. చర్మంపై టమాటా ఆకారంలో బొబ్బలు వస్తుండటంతో దీనికి టమాటా ఫ్లూ అని పేరు పెట్టారు.
ప్రసుత్తానికి ఆందోళనకర పరిస్థితులు లేకున్నా, జాగ్రత్తగా ఉండాల్సిన అవసరం ఉన్నదని వైద్య నిపుణులు పేర్కొంటున్నారు. కాచి చల్లార్చిన నీరు తాగాలని, చర్మంపై బొబ్బలు వస్తే ఆశ్రద్ధ చేయవద్దని, ఫ్లూ బారిన పడిన వారికి దూరంగా ఉండటం వంటివి పాటించాలని సూచిస్తున్నారు. టమాటా ఫ్లూ నేపథ్యంలో కేరళ వైద్యాధికారులు అప్రమత్తమయ్యారు. వైరస్ వ్యాప్తి చెందకుండా నిరోధించడంలో భాగంగా కేరళ-తమిళనాడుల సరిహద్దు పట్టణమైన వలయార్లో జ్వరం, దద్దుర్లు, ఇతర లక్షణాలు ఉన్న వారిని గుర్తించేందుకు పరీక్షలు చేపట్టారు.