అదానీ షేర్లపై ఎన్‌ఎస్‌ఈ అదనపు నిఘా

కొన్ని అదానీ గ్రూప్‌ కంపెనీల షేర్లపై అదనపు నిఘా ఉంచనున్నట్టు నేషనల్‌ స్టాక్‌ ఎక్సేంజ్‌ గురువారం ప్రకటించింది.

• ఏఎస్‌ఎం కింద షేర్ల ట్రేడింగ్‌పై తీసుకునే చర్యలివి…
• షేరు క్రయవిక్రయాలపై ప్రస్తుత మార్జిన్‌ లేదా 50 శాతం మార్జిన్‌ ఏది ఎక్కువైతే దానిని విధిస్తారు. ఫిబ్రవరి 3నాటి అన్ని ఓపెన్‌ పొజిషన్లపై ఈ మార్జిన్‌ వర్తిస్తుంది
• ఫిబ్రవరి 6 నుంచి క్రియేట్‌ చేసుకునే కొత్త పొజిషన్లపై గరిష్ఠంగా 100 శాతం మార్జిన్‌ ఉంటుంది.
• ఏఎస్‌ఎం ఫ్రేమ్‌వర్క్‌లోకి తీసుకొచ్చిన షేర్లు కేవలం మార్కెట్‌ పర్యవేక్షణలో భాగమే. సంబంధిత కంపెనీపై చేపట్టిన ప్రతికూల చర్య కాదు.

న్యూఢిల్లీ, ఫిబ్రవరి 2: కొన్ని అదానీ గ్రూప్‌ కంపెనీల షేర్లపై అదనపు నిఘా ఉంచనున్నట్టు నేషనల్‌ స్టాక్‌ ఎక్సేంజ్‌ గురువారం ప్రకటించింది. అదానీ ఎంటర్‌ప్రైజెస్‌, అదానీ పోర్ట్స్‌, గుజరాత్‌ అంబూజా షేర్లను స్వల్పకాలిక అదనపు పర్యవేక్షణ చర్య (ఏఎస్‌ఎం) పరిధిలోకి తీసుకు వచ్చామని ఎన్‌ఎస్‌ఈ విడుదల చేసిన నోటిఫికేషన్‌ తెలిపింది. ప్రస్తుతం అమలవుతున్న పర్యవేక్షణా చర్యలకు తోడు ఈ షేర్లపై ఏఎస్‌ఎం ఫ్రేమ్‌వర్క్‌ అమలవుతుందన్న విషయాన్ని మార్కెట్‌ భాగస్వాములు తెలుసుకోవాలని ఎక్సేంజ్‌ కోరింది. తీవ్ర ఒడిదుడుకులకు లోనవున్న షేర్ల నుంచి రిటైల్‌ ఇన్వెస్టర్లను సంరక్షించేందుకు 2018 నుంచి ఏఎస్‌ఎం ఫ్రేమ్‌వర్క్‌ను ఎన్‌ఎస్‌ఈ అమలు చేస్తున్నది.