రక్షణ లేని జలవనరులపై ఉదాసీనంగా ఉండలేం సుప్రీంకోర్టు ఆదేశాలు

జలవనరులు రక్షణ లేకుండా ఉన్నప్పుడు న్యాయస్థానం ఉదాసీనంగా ఉండకూడదని సుప్రీంకోర్టు పేర్కొంది.

న్యూఢిల్లీ, అక్టోబర్‌ 24: జలవనరులు రక్షణ లేకుండా ఉన్నప్పుడు న్యాయస్థానం ఉదాసీనంగా ఉండకూడదని సుప్రీంకోర్టు పేర్కొంది. చిత్తడి నేలలను క్షేత్రస్థాయిలో పరిశీలించి వాటి సరిహద్దులను గుర్తించాలని అన్ని రాష్ర్టాలను న్యాయస్థానం ఆదేశించింది.

ఈ జలవనరులు అత్యంత విలువైనవని, ఇవి రాజ్యాంగం కల్పించిన జీవించే హక్కు పరిధిలోకి వస్తాయని జస్టిస్‌ అరవింద్‌ కుమార్‌, జస్టిస్‌ విపుల్‌ ఎం పంచోలీతో కూడిన ధర్మాసనం స్పష్టం చేసింది. ‘జలవనరులకు రక్షణ కల్పించకపోవడం వల్ల కలిగే పరిణామాలను ఈ కోర్టు చూస్తూ ఊరుకోలేదు’ అని ధర్మాసనం పేర్కొంది. పక్షి ప్రేమికుడు ఆనంద్‌ ఆర్య, న్యాయవాది ఎంకే బాలకృష్ణన్‌, వనశక్తి అనే ఎన్జీవో దాఖలు చేసిన ప్రజా ప్రయోజన వ్యాజ్యం(పిల్‌)పై సుప్రీంకోర్టు విచారణ జరిపింది.