కలబురగి: పొలం పనులు ముగించుకుని ఓ చెట్టు కింద నిద్రిస్తున్న మహిళపైకి పాము వచ్చి పడగ విప్పింది. దాదాపు గంట పాటు ఆమెపై పడగ విప్పి తిష్టవేసింది. అయితే అదృష్టవశాత్తూ పాము కాటు నుంచి ఆ మహిళ చాకచక్యంగా తప్పించుకుంది. ఈ ఘటన కర్ణాటకలోని కలబురగి జిల్లా అఫ్జల్పురాలోని మల్లబ గ్రామంలో చోటుచేసుకున్నది. పాము ఆమె పైకి రావడంతో మెలుకువ వచ్చిన ఆమె.. కదలకుండా ఉండిపోయింది. ఎలాంటి హాని తలపెట్టకుండా గంట తర్వాత వెళ్లిపోవడంతో ఆమె ఊపిరి పీల్చుకున్నది. ఈ దృశ్యాలను స్థానికుడు ఒకరు ఫోన్లో రికార్డు చేసి సామాజిక మాధ్యమంలో పోస్టు చేశారు. దీంతో ఆ వీడియో వైరల్ అవుతున్నది.