Special Trains | ప్రయాణికులకు దక్షిణ మధ్య రైల్వే ( South Central Railway) శుభవార్త తెలిపింది. రానున్న సంక్రాంతి (Sankranti) పండగ సీజన్లో ప్రయాణికుల రద్దీని దృష్టిలో పెట్టుకొని 20 ప్రత్యేక రైళ్లను (Special Trains) ప్రకటించింది. పండగ కోసం సొంతూళ్లకు వెళ్లే వారి సౌకర్యార్థం పలు మార్గాల్లో ప్రత్యేక రైళ్లను నడపనున్నట్లు తెలిపింది.
సంక్రాంతి పండగ సందర్భంగా కాచిగూడ-కాకినాడ టౌన్, హైదరాబాద్-తిరుపతి రైల్వే స్టేషన్ల మధ్య 20 ప్రత్యేక రైళ్లను ఏర్పాటు చేసినట్లు అధికారులు వివరించారు. డిసెంబర్ 28వ తేదీ నుంచి జనవరి 26వ తేదీ వరకూ ఈ రైళ్ల రాకపోకలు కొనసాగుతాయని స్పష్టం చేశారు. ఈ ప్రత్యేక రైళ్లన్నింటిలోనూ ఫస్ట్ ఏసీ, సెకెండ్ ఏసీ, థర్డ్ ఏసీతో పాటు స్లీపర్, జనరల్ బోగీలు ఉంటాయని దక్షిణ మధ్య రైల్వే తెలిపింది. ఆ రైళ్ల పూర్తి వివరాలు ఎస్సీఆర్ అధికారిక వెబ్సైట్లో పొందుపరిచింది.
రైల్వే శాఖ పొందుపరిచిన వివరాల ప్రకారం..
తిరుపతి – హైదరాబాద్ రైలు (07510) డిసెంబర్ 29, జనవరి 5, 12, 19, 26 తేదీల్లో రాకపోకలు సాగిస్తుంది. ఈ రైలు శుక్రవారం రాత్రి 8:15 గంటలకు బయల్దేరి మరుసటి రోజు ఉదయం 8:40 గంటలకు గమ్యస్థానానికి చేరుకుంటుంది. అదేవిధంగా, హైదరాబాద్ – తిరుపతి రైలు (07509) డిసెంబర్ 29, జనవరి 4, 11, 18, 25 తేదీల్లో నడుస్తుంది. ఈ రైలు గురువారం రాత్రి 7:25 గంటలకు బయల్దేరి మరుసటి రోజు ఉదయం 8:20 గంటలకు గమ్యస్థానానికి చేరుకుంటుంది.
ఇక హైదరాబాద్ -తిరుపతి- హైదరాబాద్ స్పెషల్ ట్రైన్స్ సికింద్రాబాద్, నల్గొండ, మిర్యాలగూడ, నడికుడి, సత్తెనపల్లి, గుంటూరు, తెనాలి, బాపట్ల, చీరాల, ఒంగోలు, నెల్లూరు, గూడూరు, రేణిగుంట స్టేషన్ల మీదుగా ప్రయాణించనున్నాయని దక్షిణమధ్య రైల్వే వెల్లడించింది.
కాచిగూడ – కాకినాడ టౌన్ రైలు (07653) డిసెంబర్ 28, జనవరి 4, 11, 18, 25 తేదీల్లో రాకపోకలు సాగిస్తుంది. ఈ రైలు గురువారం రాత్రి 8:30 గంటలకు కాచిగూడలో బయల్దేరి మరుసటి రోజు ఉదయం 8 గంటలకు కాకినాడ చేరుతుంది. అదేవిధంగా, కాకినాడ టౌన్- కాచిగూడ రైలు (07654) డిసెంబర్ 29, జనవరి 5, 12, 19, 26 తేదీల్లో అందుబాటులో ఉంటుంది. శుక్రవారం సాయంత్రం 5.10 గంటలకు ఈ రైలు కాకినాడ టౌన్ నుంచి బయల్దేరి మరుసటి రోజు తెల్లవారుజామున 4.50 గంటలకు కాచిగూడ చేరుకుంటుంది.
అదేవిధంగా కాచిగూడ-కాకినాడ టౌన్, కాకినాడ టౌన్-కాచిగూడ స్పెషల్ రైళ్లు మల్కాజిగిరి, నల్గొండ, మిర్యాలగూడ, పిడుగురాళ్ల, సత్తెనపల్లి, గుంటూరు, విజయవాడ, ఏలూరు, తాడేపల్లిగూడెం, నిడదవోలు, రాజమండ్రి, సామర్లకోట రైల్వే స్టేషన్ల మీదుగా ప్రయాణం సాగిస్తాయి.
Also Read..
Salaar | థియేటర్స్ వద్ద సలార్ సందడి.. ఫ్యాన్స్ హంగామా మామూలుగా లేదుగా.. VIDEOS
Emmanuel Macron | గణతంత్ర వేడుకలకు చీఫ్గెస్ట్గా ఫ్రాన్స్ అధ్యక్షుడు
Coronavirus | 3 వేలకు చేరువలో యాక్టివ్ కేసులు.. కొత్తగా 328 మందికి పాజిటివ్