Visit:
చండీగఢ్‌: ఒక ఇంట్లోకి ప్రవేశించేందుకు దొంగలు ప్రయత్నించారు. బలవంతంగా డోర్‌ తెరిచి లోనికి వెళ్లేందుకు యత్నించారు. అయితే ఇంట్లో ఉన్న మహిళ దొంగల ప్రయత్నాన్ని ఒంటరిగా ఎదుర్కొంది. తన శక్తి మేర డోర్‌ తెరువకుండా అడ్డుకున్నది. (Woman Single Handedly Fights Off Burglars) భయాందోళన చెందిన పిల్లలకు ధైర్యం చెప్పింది. ఈ వీడియో క్లిప్‌ సోషల్‌ మీడియాలో వైరల్‌ అయ్యింది. పంజాబ్‌లోని అమృత్‌సర్‌లో ఈ సంఘటన జరిగింది. సెప్టెంబర్‌ 30న సాయంత్రం వేళ నగల వ్యాపారి జగ్జీత్ సింగ్ ఇంటి నుంచి బయటకు వెళ్లాడు. ఇంట్లో ఆయన భార్య మన్దీప్ కౌర్, ఇద్దరు పిల్లలు ఉన్నారు.
కాగా, మన్దీప్ కౌర్ బట్టలు ఆరేస్తుండగా ముసుగులు ధరించిన ముగ్గురు వ్యక్తులు ఇంటి సమీపంలో ఉండటాన్ని ఆమె గమనించింది. ఆ తర్వాత వారు గోడ దూకి ప్రధాన ద్వారం వద్దకు చేరుకున్నారు.
బలవంతంగా డోర్‌ తెరిచేందుకు ప్రయత్నించారు. అప్రమత్తమైన మన్దీప్ కౌర్ దొంగల ప్రయత్నాన్ని ఎదుర్కొన్నది. దొంగలు డోర్‌ తెరువకుండా తన బలమంతా ఉపయోగించింది. గట్టిగా అరుస్తూ చివరకు ఆ డోర్‌ను లాక్‌ చేసింది. అలాగే జాగ్రత్త కోసం సోఫాను డోర్‌ ముందుకు లాగింది. భయాందోళన చెందిన కుమారుడు, కుమార్తెకు ధైర్యం చెప్పింది. పోలీసులు, భర్తకు ఆమె ఫోన్‌ చేసింది. అలాగే దొంగలు ఆ ఇంటి నుంచి పారిపోవడాన్ని కిటికీ నుంచి చూసింది.
మరోవైపు ఈ సంఘటనపై ఫిర్యాదు అందుకున్న పోలీసులు కేసు నమోదు చేసి దర్యాప్తు చేస్తున్నారు. జగ్జీత్ సింగ్ నగల వ్యాపారి కావడంతో అతడి ఇంట్లో చోరీకి దొంగలు ప్రయత్నించి ఉంటారని అనుమానిస్తున్నారు. సీసీటీవీ ఫుటేజ్ ద్వారా దొంగలను గుర్తించేందుకు ప్రయత్నిస్తున్నారు. మరోవైపు ఆ ఇంట్లోని సీసీటీవీలో రికార్డైన మహిళ ఒంటరి పోరాటం వీడియో క్లిప్‌ సోషల్‌ మీడియాలో వైరల్‌ అయ్యింది.
Robbers tried to loot a house, But the robbers could not do anything in front of the Brave Woman present in the house. The brave woman single-handedly overpowered three robbers🫡, Amritsar
pic.twitter.com/NQuAwauAYf— Ghar Ke Kalesh (@gharkekalesh) October 1, 2024
