Guwahati Hotel Firing: గౌహ‌తి హోట‌ల్ ఫైరింగ్ కేసులో ప్ర‌ధాన నిందితుడి ఎన్‌కౌంట‌ర్‌

Guwahati Hotel Firing: గౌహ‌తిలోని ఓ హోట‌ల్ ప్రాపర్టీ విష‌యంలో జ‌రిగిన ఫైరింగ్ ఘ‌ట‌న‌లో అయిదుగురు ప్రాణాలు కోల్పోయిన విష‌యం తెలిసిందే. అయితే ఆ కేసులో ప్ర‌ధాన నిందితుడు ఘ‌నాకంట గ‌గోయి పోలీసులు చెర నుంచి పారిపోయే ప్ర‌య‌త్నం చేశాడు. ఆ స‌మ‌యంలో జ‌రిగిన కాల్పుల్లో నిందితుడు హ‌త‌మైన‌ట్లు పోలీసులు చెప్పారు.

గౌహ‌తి: అస్సాంలోని గౌహ‌తిలోని ఓ హోట‌ల్ ప్రాపర్టీ విష‌యంలో జ‌రిగిన ఫైరింగ్(Guwahati Hotel Firing) ఘ‌ట‌న‌లో అయిదుగురు ప్రాణాలు కోల్పోయిన విష‌యం తెలిసిందే. అయితే ఆ కేసులో ప్ర‌ధాన నిందితుడు ఒక‌రు పోలీసులు చెర నుంచి పారిపోయే ప్ర‌య‌త్నం చేశాడు. ఆ స‌మ‌యంలో జ‌రిగిన కాల్పుల్లో ప్ర‌ధాన నిందితుడు హ‌త‌మైన‌ట్లు పోలీసులు చెప్పారు. క‌స్ట‌డీ నుంచి త‌ప్పించుకునే ప్ర‌య‌త్నం చేసిన నిందితుడిని కాల్చిన‌ట్లు పోలీసులు వెల్ల‌డించారు. తెల్ల‌వారుజామున 3.10 నిమిషాల‌కు గౌరిసాగ‌ర్ వ‌ద్ద ఎన్‌కౌంట‌ర్ జ‌రిగింది.

మ‌రో కేసులో శివసాగ‌ర్ జిల్లాకు అత‌న్ని తీసుకువెళ్తున్న క్ర‌మంలో ఈ ఘ‌ట‌న జ‌రిగిన‌ట్లు ఎస్పీ పాపోరి చేతియా తెలిపారు. హోట‌ల్ ఫైరింగ్ కేసులో ఏడు రోజుల పాటు పోలీసుల క‌స్ట‌డీలో ఉన్న నిందితుడు ఘ‌నాకంట గ‌గోయిని.. 2024 నాటి బ్యాంక్ ఫ్రాడ్ కేసులోనూ నిందితుడిగా ఉన్నాడు. అయితే అక్క‌డ‌కు అత‌న్ని తీసుకెళ్తున్న స‌మ‌యంలో ఎన్‌కౌంట‌ర్ జ‌రిగింది. ప్ర‌ధాన నిందితుడు ఘ‌నాకంట గ‌గోయి .. శిక్ష‌ణ పొందిన షూట‌ర్‌. ర‌క‌ర‌కాల ఆయుధాల్లో అత‌ను నిపుణుడు.

పోలీసు వాహ‌నం నుంచి దిగిన త‌ర్వాత స‌ర్వీస్ వెప‌న్ లాక్కునే ప్ర‌య‌త్నం చేశాడు. ఆ స‌య‌మంలో పోలీసుల‌పై దాడి చేశాడ‌త‌ను. అయితే ఆఫీస‌ర్‌ను ర‌క్షించే క్ర‌మంలో నిందితుడిపై కాల్పులు జ‌రిపిన‌ట్లు ఎస్పీ చేతియా తెలిపారు. గాయ‌ప‌డ్డ గ‌గోయిని ఆస్ప‌త్రిలో చేర్పించారు. కానీ అత‌ను మృతిచెందిన‌ట్లు డాక్ట‌ర్లు నిర్ధారించారు.