P Chidambaram: పురుష జ‌ర్న‌లిస్టులు వాకౌట్ చేయాల్సింది: చిదంబ‌రం

P Chidambaram: తాలిబ‌న్ మంత్రి నిర్వ‌హించిన ప్రెస్ కాన్ఫ‌రెన్స్‌కు మ‌హిళా జ‌ర్న‌లిస్టుల‌ను ఎందుకు రానివ్వ‌లేద‌ని చిదంబ‌రంన్నారు. మ‌హిళా జ‌ర్న‌లిస్టుల‌కు అనుమ‌తి ఇవ్వ‌న‌ప్పుడు .. నా అభిప్రాయంలో పురుష జ‌ర్న‌లిస్టులు వాకౌట్ చేయాల్సి ఉండె అని ఆయ‌న అన్నారు.

న్యూఢిల్లీ: తాలిబ‌న్ విదేశాంగ మంత్రి అమిర్ ఖాన్ ముత్తాకి ఢిల్లీలో ఏర్పాటు చేసిన మీడియా స‌మావేశానికి మ‌హిళా జ‌ర్న‌లిస్టుల‌ను అనుమ‌తించ‌లేదు. ఆ అంశం వివాదాస్ప‌ద‌వుతున్న విష‌యం తెలిసిందే. అయితే కేంద్ర ప్ర‌భుత్వ , విదేశాంగ శాఖ వైఖ‌రిని ప్ర‌తిప‌క్ష నేత‌లు ఖండించారు. తృణ‌మూల్ కాంగ్రెస్ నేత మ‌హువా మొయిత్రా త‌న ఎక్స్ పోస్టులో ప్ర‌శ్నించారు. భార‌త నేల‌పై లింగ వివ‌క్షకు ఎందుకు పాల్ప‌డ్డార‌ని ఆమె ప్ర‌భుత్వాన్ని నిల‌దీశారు. తాలిబ‌న్ మంత్రికి అధికారిక ప్రోటోకాల్ క‌ల్పిస్తూ ఇలాంటి చ‌ర్య‌కు ఎందుకు దిగార‌ని ఆమె అన్నారు. ఆఫ్ఘ‌న్‌లోని తాలిబ‌న్ ప్ర‌భుత్వం మ‌హిళ‌ల ప‌ట్ల అణిచివేత ధోర‌ణితో ప్ర‌వ‌ర్తిస్తున్న‌దని పేర్కొన్నారు. భార‌తీయ నేల‌పై నిర్వ‌హించిన మీడియా స‌మావేశానికి కేవ‌లం పురుష జ‌ర్న‌లిస్టుల‌కే ఎందుకు అనుమ‌తి క‌ల్పించార‌న్నారు. మ‌హిళా జ‌ర్న‌లిస్టుల‌ను అడ్డుకోవ‌డం ఎంత వ‌ర‌కు స‌మంజ‌సం అని ఆమె అన్నారు. కాంగ్రెస్ సీనియ‌ర్ నేత పీ చిదంబ‌రం( P Chidambaram) కూడా షాక్ వ్య‌క్తం చేశారు. ప్రెస్ కాన్ఫ‌రెన్స్‌కు మ‌హిళా జ‌ర్న‌లిస్టుల‌ను ఎందుకు రానివ్వ‌లేద‌న్నారు. మ‌హిళా జ‌ర్న‌లిస్టుల‌కు అనుమ‌తి ఇవ్వ‌న‌ప్పుడు .. నా అభిప్రాయంలో పురుష జ‌ర్న‌లిస్టులు వాకౌట్ చేయాల్సి ఉండె అని చిదంబ‌రం అన్నారు.

I am shocked that women journalists were excluded from the press conference addressed by Mr Amir Khan Muttaqi of Afghanistan

In my personal view, the men journalists should have walked out when they found that their women colleagues were excluded (or not invited)

— P. Chidambaram (@PChidambaram_IN) October 11, 2025

గురువారం ఇండియాకు వ‌చ్చిన ముత్తాకి.. శుక్ర‌వారం విదేశాంగ మంత్రి జైశంక‌ర్‌తో చ‌ర్చ‌లు నిర్వ‌హించారు. ఆ మీటింగ్ త‌ర్వాత ఆఫ్ఘ‌న్ ఎంబ‌సీలో జ‌రిగిన ప్రెస్ స‌మావేశానికి మ‌హిళా జ‌ర్న‌లిస్టుల‌ను రానివ్వ‌లేదు. ముందుగా చెప్పిన‌ట్లు డ్రెస్‌కోడ్‌తో వ‌చ్చినా.. అనేక మంది మ‌హిళా రిపోర్ట‌ర్ల‌కు ఎంట్రీ క‌ల్పించ‌లేదు. దీంతో సోష‌ల్ మీడియాలో తీవ్ర విమ‌ర్శ‌లు వ‌చ్చాయి. చాలా మంది జ‌ర్న‌లిస్టులు ఆన్‌లైన్‌లో త‌మ నిర‌స‌న గళం వినిపించారు. 2021లో ఆఫ్ఘ‌న్‌లో తాలిబ‌న్ ప్ర‌భుత్వం ఏర్ప‌డిన త‌ర్వాత‌.. విద్య‌, ఉద్యోగం, ప్ర‌జా జీవితంలో మ‌హిళల పాత్ర‌పై ఆంక్ష‌లు విధించిన విష‌యం తెలిసిందే.

How dare our government allow Taliban foreign minister Amir Muttaqi to exclude women journalists & hold a ‘male-only’ news conference on Indian soil with full protocol? How dare @DrSJAishankar agree to this? & why did our emasculated spineless male journos remain in room?

— Mahua Moitra (@MahuaMoitra) October 10, 2025